Paşinyanı Qarabağdan imtinaya kim məcbur etdi - NATO, Moskva, ya Bakının gücü? ...Zaxarovanın səhvi...
Elşad Musayev: “Rusiya beynəlxalq hüquqa, başqa dövlətlərin ərazi bütövlüyünə hörmət edən ölkə deyil”
İrəvan Qarabağla bağlı qərarları məhz NATO-nun təsiri altında qəbul edib.
Bunu Rusiya XİN-in sözçüsü Mariya Zaxarova “Zvezda” telekanalının “Mejdu tem” verilişində bildirib: “Mən bu fikri söyləyən və yayan hər kəsi ittiham edirəm. Bu doğru deyil, bu yalandır. Rəsmi İrəvan bu qərarı Qərblə məsləhətləşmələrdən sonra verib. Mən İrəvanın Qarabağla bağlı qəbul etdiyi qərarlara görə Rusiya və KTMT-nin ittiham edən hamını yalan danışmaqda ittiham edirəm”. Onun sözlərinə görə, Qərb ölkələri Ermənistanın Dağlıq Qarabağdan rəsmən imtina etməsini təbliğ ediblər: “NATO-nun diqtəsi ilə imzalanan sənədlərdə Qarabağ sakinlərinin hüquqları heç bir şəkildə təsbit edilməyib və təmin edilməyib”.
Bu nə deməkdir? Zaxarova bununla demək istəyir ki, İrəvan NATO-ya deyil, Rusiyaya arxalansaydı Qarabağın Azərbaycanın nəzarətinə keçməsini əngəlləyərdi? Yəni bizlə olsaydız Qarabağdan imtina etməyəcəkdiniz və məsələ Azərbaycanın xeyrinə həll olunmayacaqdı. Halbuki, burada məsələ belə deyil ki, Ermənistan NATO ilə olduğuna görə Qarabağdan imtina etdi. Yaxud da Rusiya ilə olsaydı Qarabağdan imtina etməzdi. Ermənistan bütün hallarda bundan imtina etməli idi. Ona görə imtina etməli idi ki, Qarabağ Azərbaycan torpağı idi. Yoxsa kiminsə yanında olmağı ilə bağlı yox. Rusiyanın yanaşmasında strteji səhv budur ki, onlar burada Azərbaycanın mövqeyini nəzərə almırlar.
“Hörmət etsəydi, Zaxarova Azərbaycanın suverenliyinə qarşı belə məsuliyyətsiz fikirlər səsləndirməzdi”
Sözügedən məsələ ilə bağlı “Bakı-Xəbər”ə açıqlama verən Böyük Azərbaycan Partiyasının sədri Elşad Musayevin fikrincə, Zaxarovadan belə açıqlama təəccüblü deyil: “Ona görə ki, Rusiya beynəlxalq hüquqa, başqa dövlətlərin ərazi bütövlüyünə hörmət edən ölkə deyil. Bu günlərdə xarici işlər naziri Lavrov bəyan etdi ki, Putin Paşinyanın Qarabağı Azərbaycanın bir hissəsi kimi tanımaq qərarına təəccübləndi. Bax bunlar belə bir zehniyyətə malikdilər. Rusiya özü çoxmillətli ölkə olduğu halda, bir sıra ölkələrdə separatizmi dəstəkləyir. Nəinki dəstəkləyir, hətta birbaşa himayə edir. O baxımdan istər Zaxarova olsun, istərsə də digər dövlət yetkililəri, bunlar açıq-aşkar Rusiya dövlətinin mövqeyini ortaya qoyurlar. Ancaq nədənsə, Azərbaycanda müəyyən siyasi çevrələr hər vəchlə Rusiyanı “süddən çıxmış ağ qaşıq” kimi təqdim etmək istəyirlər. Bu proseslərdə Rusiyanı Azərbaycana müttəfiq kimi təqdim etmək istəyirlər. Ancaq Zaxarovanın çıxışından biz görürük ki, Rusiya öz imperiya maraqlarından çıxış edir. Eyni zamanda Zaxarova Rusiyanı Ermənistanın dostu kimi qələmə vermək istəyir. Bütün günahları da Paşinyan hakimiyyətinin üstünə atmaq istəyir. Digər tərəfdən, Rusiyanın başı Ukraynada qarışsa da öz imperiya ambisiyalarından bir addım geri çəkilməyib. Rusiya bir sıra dövlətlərin, o cümlədən Azərbaycanın ərazi bütövlüyünə hörmət etmir. Hörmət etsəydi, Zaxarova Azərbaycanın suverenliyinə qarşı belə məsuliyyətsiz fikirlər səsləndirməzdi. Ona görə də Azərbaycan hər zaman maksimum ehtiyatlı mövqedən çıxış etməlidir. Bundan sonra da Ermənistanla Rusiya arasında münasibətlər gərginləşəcək. O üzdən, biz dövlət olaraq öz ölkəmizin mənafeyi üçün bundan maksimum yararlanmalıyıq”.
Vidadi ORDAHALLI
