Yeni taksi qaydalarından sonra "Priuslar" "küçələrdə qalacaq"…
Aslan Əsədov: “Gələcəkdə “Prius”ların qiymətlərində enmələr və başqa avtomobillər kimi ucuz satışlar olacaq”
Nazirlər Kabinetinin bir neçə gün əvvəl təsdiqlədiyi “Müntəzəm və taksi minik avtomobili ilə sərnişin daşımalarında istifadə olunan avtonəqliyyat vasitələrinin texniki göstəriciləri, daxili və xarici tərtibatına dair tələblər”ə əsasən, Azərbaycanda dövlət qeydiyyat şəhadətnaməsində göstərilən buraxılış tarixindən 15 ildən artıq müddət keçən avtomobil nəqliyyatı vasitələri taksi minik avtomobilləri ilə sərnişin daşımalarında istifadə oluna bilməz.
Danılmaz faktdır ki, Azərbaycanda taksi fəaliyyətində ən çox istifadə olunan avtomobil modellərindən biri "Toyota Prius"dur. Ölkədə taksilərin əksəriyyəti məhz bu modeldir. Avtomobilin ilk buraxılışlarının istehsal ili əsasən 2005-2009-ci illər arasındadır. Yeni qərara əsasən, onların əksəriyyəti taksi fəaliyyətində istifadə oluna bilməyəcək.
Qeyd edək ki, taksilərlə bağlı qərarın açıqlanmasından sonra avtomobil bazarında "Prius" markalı maşınlarla bağlı ajiotaj yaradıb. Bəzi sürücülər avtomobillərini daha ucuz qiymətə satışa çıxarıb, bəziləri satmağa tələsmir.
Maraqlıdır, taksilərlə bağlı qərar "Prius”ların qiymətinə necə təsir göstərəcək? Qərarın avtomobil bazarına təsirini necə dəyərləndirmək olar?
“İndiki vəziyyətə görə təlaşlanıb bu maşınları satmaq düzgün deyil”
Nəqliyyat məsələləri üzrə ekspert Aslan Əsədov “Bakı-Xəbər”ə şərhində bildirdi ki, qərar istehsal ili 2016 və 2008-ci ildən yuxarı olan nəqliyyat vasitələrinə aiddir: “Yəni nəqliyyat vasitələrinin ölkəyə gətirilməsi və istismar müddəti 8-15 ildən ibarət olacaq. “Toyota Prius” markalı avtomobillərə gəlincə, bu avtomobillərin istismarı davam edəcək. Qərarda hər hansı marka adı çəkilmir. Orada deyilir ki, 15 yaşdan yuxarı olan nəqliyyat vasitələrinə taksi kartları verilməyəcək. Amma “Toyota Prius” və digər nəqliyyat vasitələrinə heç bir qadağa yoxdur. “Toyota Prius”u öz sinfindən olan hibrid avtomobillər əvəz edəcək. “Prius”lardan hazırda Paris, Barselona, Madrid, İtaliyanın digər şəhərlərində də istifadə olunur. Avtomobil elektriklə işləyir, bu qane edirsə, biz başqa niyə problem axtarmalıyıq? Ölkədə yaşı 15-dən aşağı olan “Prius”ların sayı azdır. Çünki Azərbaycanda əsasən 2008, 2009, 2010, 2012-ci illərin “Prius”larıdır. Gələcəkdə “Prius”ların qiymətlərində enmələr və başqa avtomobillər kimi ucuz satışlar olacaq. İndiki vəziyyətə görə təlaşlanıb bu maşınları satmaq düzgün deyil. Qabaqda hələ 2-3 il müddətimiz var”.
Günel CƏLİLOVA
