Düşmən Fransanın vətəndaşı Bakı metrosuna xoş niyyətlə gələ bilməzdi…
Şəmsəddin Əliyev: "Bütün bunlar kəşfiyyat xarakteri daşıyır, bunun davamı da olacaqdır"
Bakıda metro qatarlarının dayandığı depoya gizlincə daxil olub bir neçə vaqonu boyayaraq əmlaka qəsdən ziyan vuran Fransa vətəndaşı həbs edilib. DİN-in Mətbuat Xidmətindən bildirilib ki, araşdırmalarla Avstraliya İttifaqının vətəndaşı P.Han Paul, Yeni Zelandiya vətəndaşı İsmael De Saint Quent və Fransa Respublikasının vətəndaşı Clerc Theqo Huqonun 30 mart 2024-cü il gecə saatlarında "Bakı Metropoliteni" Qapalı Səhmdar Cəmiyyətinə məxsus depoya qanunsuz daxil olaraq qəsdən dövlət əmlakına ziyan vurmalarına dair şübhələr müəyyən edilib.
Əməldə cinayət tərkibi yarandığından, Cinayət Məcəlləsinin müvafiq maddəsi ilə polis idarəsində fakta görə başlanmış cinayət işi üzrə Fransa Respublikasının vətəndaşı Clerc Theqo Huqo barəsində məhkəmənin qərarı ilə 3 ay müddətinə həbs, digərləri barəsində həbslə əlaqədar olmayan qətimkan tədbirləri seçilib.
Fransa ilə bağlı əcnəbi vətəndaşların metro kimi strateji obyektə gizli daxil olması Fransanın ölkəmizdə terror aktı da planlaşdıra bilmək niyyətindən xəbər verə bilərmi? Bu hadisə təsadüfdür, yoxsa düşünülmüş planın tərkib hissəsi?
Hüquqşunas Şəmsəddin Əliyev "Bakı-Xəbər"ə açıqlamasında bildirdi ki, bu təsadüfi hadisə sayıla bilməz: "Mən öncədən Respublika Daxili İşlər Nazirliyinin bu hadisəyə çevik münasibətini, vətənə sədaqətin canlı təzahürü kimi atılan addımlarını alqışlayıram. İndiki həssas zamanda, ayın 5-də keçiriləcək Brüssel görüşü ilə bağlı ABŞ rəsmisi bir fikir irəli sürdü ki, bu görüşdə Ermənistanla Azərbaycan arasında sülh danışıqlarının bağlanması ilə bağlı məsələ gündəlikdə deyil. Bizim sərhədlərimizdən kənarda, Avropada, Amerikada Azərbaycana qarşı münasibət tamamilə başqa xarakter daşıyır. Diplomatik münasibətlərin qorunması, mühafizəsi, bütün hallarda terrora qarşı birgə əməkdaşlıq, Azərbaycana qarşı münasibət qənaətbəxş deyil. Sözün həqiqi mənasında, beynəlxalq hüquq prinsiplərinə zidd davranılır. Bu həssas məqamda hər gün təəssüf doğuracaq hadisələrim törədilməsi mümkündür. Fransa dövlətinin, digər Qərb ölkələrinin Azərbaycanda kifayət qədər kəşfiyyat xarakterli dayaqları var. Onlar müxtəlif məlumatlar toplayırlar, strateji obyektlərimizdə terror xarakterli hadisələrin törədilməsində yüzdə-yüz maraqlıdırlar. Fransa, ABŞ, Yeni Zelandiya vətəndaşlarının strateji obyektə daxil olub əmlaka qəsdən ziyan vurulmasının da pərdə arxasında ciddi məqamlar var. İlk öncə demək istəyirəm ki, bütün bunlar kəşfiyyat xarakteri daşıyır. Bunun davamı da olacaqdı. Ancaq sağ olsunlar ki, bütün bunlar vaxtında aşkarlandı. Bu cinayətlər qəsdən törədilir. Əgər düşüncələrində hansısa psixi problem olsaydı, onlar Azərbaycana buraxılmazdı. Ancaq bu insanların əməlləri tamamilə onların təfəkkürünə uyğundur, nə etdiklərinin fərqindədirlər və pis nəticəsini arzulayırlar. Bilə-bilə bu əməllər törədildiyinə görə qəsdən törədilmiş hesab edilir, onun cəzası da sərt olmalıdır. Düşünürəm ki, burda başqa ağır cinayətlər də baş verə bilərdi, şükür qarşısı vaxtında, çevik alındı. Yəqin, Xarici İşlər Nazirliyi Fransanın Azərbaycandakı səfirinə də nota xarakterli müraciət edə bilər. Bundan sonra mən düşünürəm ki, hüquq-mühafizə orqanları, Daxili İşlər Nazirliyinin polis orqanları strukturları, həm də kəşfiyyat xarakterli xidmət həyata keçirən digər qurumlar da çox ayıq-sayıq, prinsipial olmalıdırlar. Belə olduğu halda biz digər bizə qarşı olan dövlətlərin də əməllərinin qarşısını ala bilərik".
Məhəmmədəli QƏRİBLİ
