Ermənistanda eyforiya var - "Bakı separatçı caniləri qaytaracaq"...
Akif Nağı: “Bakıda saxlanılan separatçı “liderlər”, canilər o cinayətlərə rəhbərlik etmiş adamlardır”.
Ermənistan mediası, eləcə də bu ölkənin müxtəlif qurumları, QHT-ləri Azərbaycana qarşı əsassız ittihamlar səsləndirməkdən əl çəkmək istəmirlər. Hər addımda çalışırlar ki, ortaya həqiqətə uyğun olmayan fikirlər atsınlar. Məhv olmuş, tarix səhnəsindən silinmiş separatçı qurumun hazırda Bakıda saxlanılan “liderlərini” “qəhrəman” kimi qələmə verməkdən çəkinmirlər. Hətta erməni cəmiyyətində belə eyforiya yaranıb ki, guya separatçılar həbsdən azad olunub Ermənistana təhvil veriləcək. Təpədən-dırnağa cinayətkar olan bu ünsürlərin Azərbaycan xalqına qarşı işlətdikləri cinayətləri, ərazilərimizdə bölücülüklə, separatçılıqla məşğul olmuş olduqlarını nədənsə yada salmaq istəmirlər. Bir qrup insan Ermənistanda belə eyforiya yaradır ki, guya separatçı “liderlər” qaytarılacaq.
Məsələn, Beynəlxalq və Müqayisəli Hüquq Mərkəzinin prezidenti Siranuş Saakyan mətbuata açıqlamasında iddia edib ki, guya “Arsaxın” “yüksək rütbəli liderləri” sonuncu mərhələdə azad ediləcəklər.
S.Saakyan aprelin 1-də keçirdiyi mətbuat konfransında dabir sıra cəfəngiyatlar səsləndirib. O vurğulayıb ki, Azərbaycandan Ermənistana 210-a yaxın hərbiçi repatriasiya edilib. “Sülh müqaviləsi də daxil olmaqla, dövlətlərarası xarakter daşıyan tərəflər razılaşıblar ki, problemlər həll edildikdən sonra orada saxlanılan ermənilər də öz vətənlərinə qaytarılacaqlar. Hesab edirəm ki, “yüksək rütbəli” “liderlər” son nəticədə vətənə qaytarılacaq…”-deyə bildirən Saakyanın sözlərinə görə, Ermənistan Azərbaycana qarşı iddialarından əl çəksə, həmin şəxslərin repatriasiyası üçün hüquqi rıçaqlarını da itirəcək.
“Bu səbəbdən də onların azad olunacaqlarına dair uydurmaların səsləndirilməsi anormal haldır”
Məsələyə şərh verən Azad Vətən Partiyasının sədri, tarix üzrə fəlsəfə doktoru, dosent Akif Nağı “Bakı-Xəbər”ə bildirdi ki, Ermənistanda müəyyən şəxslər bu məslədən özlərinə xal qazanmaq üçün istifadə edirlər. “Bu dırnaqarası xadim Saakyan da özünə qondarma bir təşkilat yaradıb onun adından nəsə deməyə, beynəlxalq hüquqa müraciət etməyə, Ermənistanın mövqeyini ortaya qoymağa çalışır. Əslində isə onlar işin hansısa düzgün istiqamətə getməsinə xidmət etmirlər. Onlar özlərinin təbliği, özlərini gündəmə gətirməklə məşğuldurlar. Saakyanın açıqlaması tamamilə məntiqsizdir.
Bu proses Ermənistanla Azərbaycan arasında münasibətlərin normallaşmasından gedir. Ermənistan tərəfindən Azərbaycana qarşı işğal aktı törədildi, Azərbaycan torpaqları 30 il müddətində işğal altında saxlanıldı. Azərbaycan çalışdı ki, ərazilərini işğaldan azad edib öz torpaqlarında suverenliyini bərpa etsin, eyni zamanda da regionda sülh və sabitlik üçün Ermənistanla münasibətləri normallaşdırsın. Yeri gəlsə, Azərbaycanın bu istiqamətdə təşəbbüsünə heç ehtiyac da yoxdur. Çünki Ermənistan Azərbaycana qarşı cinayət törədib. Bu cinayətlərə görə Azərbaycanın onunla münasibətlərini normallaşdırmasından daha çox beynəlxalq müstəvidə Ermənistanın bu hərəkətlərinə hüquqi qiymət verilməsi, bu ölkəyə qarşı beynəlxalq səviyyədə tədbirlərin görülməsi, hərbi cinayətlərin araşdırılması ilə bağlı beynəlxalq tribunalın yaradılması istiqamətində fəaliyyət göstərməlidir. Amma yenə də Azərbaycan humanistliyini, regionda sabitliyin olmasında maraqlı olduğunu göstərir. O müstəvidə deyil, münasibətlərin normallaşdırılması istiqamətində fəliyyət göstərir. Onlar da bunu düzgün dəyərləndirmirlər. Bizim yerimizdə ermənilər olsa, heç bizimlə danşıqlara gəlməzdilər. Halbiki, biz onları konstruktiv mövqeyə gəlmələri üçün 30 il ərzində Masaya oturda bilmirdik. Bu gün də baxırsız ki, olmayan məsələlərdə Azərbaycanı ittiham etməyə çalışırlar, beynəlxalq təşkilatlara müraciət edirlər ki, guya Azərbaycan “etnik təmizləmə” ilə məşğul olub, Qarabağdakı erməniləri zorla çıxarıb, onlara qarşı hansısa təzyiq və təhdidlər varmış. Yəni olmayan məsələləri qabartmağa çalışırlar. Əslində bizim daha çox haqqımız var ki, 30 il ərzində baş verənlərə bütün dünyanı cəlb edək, əsas diqqət o istiqamətdə olsun. O canilərin həbs olunması, Bakıya gətirilməsi, onlara məhkəmə qurulması ilə bağlı heç ermənilər səslərini də çıxara bilməzdilər. Bizim bu humanist mövqeyimizdən onlar sui-istifadə edirlər”-deyə A.Nağı bildirdi.
A.Nağının sözlərinə görə, Ermənistandakı bəzi qüvvələr Bakıda saxlanılan hərbi canilərlə, separatçılrla bağlı proses aparmağa cəhd edirlər, amma əslində onların “hüquqlarının qorunması” da həmin şəxsləri maraqlandırmır. Onların özlərini reklam etməyə, Azərbaycanı ittiham etməyə çalışdıqlarını deyən A.Nağı vurğuladı ki, həmin qüvvələr bu şəkildə həmin situasiyadan istifadə etmək istəyirlər. “Təkcə Saakyan deyil, Lemkin İnstitutu da ortaya düşüb separatçıları müdafiə edir. Başqa qurumlar da onların guya “azad olunması” məsələsini qoyurlar. Birinci, onların yanaşmaları düzgün deyil. Guya o adamları siyasi proseslərin “qurbanı” kimi təqdim etməyə çalışırlar. Bakıda saxlanılan separatçılar hərbi canidirlər, Azərbaycana qarşı törədilmiş müharibə cinayətlərində iştirak ediblər. Burada saxlanılanlar cinayətkarların bir hissəsidir, digəriləri də saxlanılacaq, gələcəklər, Azərbaycan məhkəmələri qarşısında cavab verəcəklər. Onlar hamısı hökmən öz cəzalarını alacaqlar, alırlar, məhkəmə prosesi gedir, onların törətdikləri cinayətlərə hüquqi qiymət verilir, bu cinayətlərə görə məsuliyyətə cəlb olunurlar.
Separatçılardan bu cür siyasi manipulyasiyalarda istifadə etmək qətiyyən yolverilməzdir, onlara hüquq müstəvisində yanaşılmalıdır. Kimsə doğrudan da Azərbaycan hakimiyyətinin, Azərbaycan məhkəməsinin humanist mövqeyini görmək istəyirlərsə hüquq müstəvisində danışmalıdırlar, bu məsələni siyasi müstəviyə keçirməməlidirlər. Guya sülh prosesi getdikcə orada nəticə əldə edildikcə guya separatçılar da sərbəst buraxılacaqlar. Elə deyil. Onlar qanuni şəkildə sübutlarla, şahidlərlə mühakimə olunurlar, cəzalarını Azərbaycanda çəkirlər. Hesab edirəm ki, hansısa bir məqamda onların Ermənistana qaytarılması ilə bağlı məsələ gündəmdə olmamalıdır. Zaman-zaman Azərbaycan humanist addımlar atıb müəyyən hərbi cinayətkarları Ermənistana qaytarır. Amma Bakıda saxlanılan separatçı “liderlər” o cinayətlərə rəhbərlik etmiş adamlardır. Bu səbəbdən də onların azad olunacaqlarına dair uydurmaların səsləndirilməsi anormal haldır. Ermənistanda eyforiyaya qapılanlar bilməlidirlər ki, Köçəryan, Sarkisyan. Ohanyan, Şahramanyan, Babayan da gəlib Azərbaycan məhkəməsi qarşısında dayanıb cavab verməlidirlər, onlar da gələcəklər, hökmən gəlib cavab verəcəklər”-deyə A.Nağı bildirdi.
İradə SARIYEVA
