Qərb 30 ildə Azərbaycanın müdafiəsi üçün belə 3-tərəfli formatlara niyə əl atmadı?!..
İbrahim Rüstəmli: “Obyektiv olsaydılar, zamanında bizim haqq işimizlə bağlı da belə təşəbbüs göstərərdilər”
Son zamanlar Ermənistan-Azərbaycan şərti sərhədinin müxtəlif istiqamətlərində Ermənistan silahlı qüvvələrinin canlı qüvvəsi, zirehli texnikası, artilleriya qurğuları, habelə digər ağır atəş vasitələrinin cəmləşdirilməsi və qoşunların intensiv hərəkəti müşahidə olunur.
Müdafiə Nazirliyinin məlumatında deyilir ki, son vaxtlar Ermənistanda Azərbaycanı müharibə ilə hədələyən revanşist qüvvələrin daha da fəallaşması, ölkəmizə qarşı aqressiv ritorikanın yüksək həddə çatması və təxribat cəhdlərinə hazırlıq məqsədilə informasiya məkanında vəziyyətin gərginləşməsinə xidmət edən təhrikçi məlumatların sayının artması özünü büruzə verir. Belə nəticəyə gəlmək olar ki, baş verənlər ABŞ və Aİ-nin Ermənistanla planlaşdırdığı 5 aprel görüşünün nəticəsidir. Regionda üçlü hərbi alyans yaradılır. Regionda sülh və sabitliyə təhdid olan Qərb çirkin və riyakar siyasət yürüdür. Qərbin riyakar siyasəti həm də özünü başqa aspektdən göstərir. 30 illik işğal dövründə ABŞ və Aİ işğala məruz qalan Azərbaycan üçün niyə belə konfrans keçirmirdi? Müharibədən sonra dağıdılmış Azərbaycan ərazilərində mina probleminin həllinə hər hansı dəstək verdimi, bir kəndin bərpasına yardım etdimi?
Hərbi-siyasi şərhçi, ehtiyatda olan polkovnik-leytenant İbrahim Rüstəmli “Bakı-Xəbər”ə açıqlamasında bildirdi ki, məsələnin kökündə dayanan başlıca faktor Cənubi Qafqazda yaradılımış yeni geosiyasi reallıqdır: “Bu reallığı yaradan Azərbaycandır. Artıq parametrlər də çox dəyişib. Biz 30 il işğal altında qalan böyük bir ərazimizi tam azad etmişik. Bunu ciddi siyasi iradəmiz hesabına sərgiləmişik. Söhbət ABŞ və Aİ-nin Ermənistanla münasibətlərindən gedirsə, onların məqsədi İrəvanı Rusiyadan qoparıb, öz tərəfinə keçirməkdən ibarətdir. Biz bu haqda dəfələrlə bildirmişik ki, regionda Rusiya ilə Qərbin mövqe savaşı gedir. Qonşularımızın bu məsələyə münasibəti birmənalı deyil. Dünənə kimi Ermənistanı dəstəkləyən İran bu gün ondan izahat tələb edir. ABŞ və Qərb regionda mövqe tutmaq üçün bir zəif nöqtə axtarırdı. Həmin ölkə Ermənistandır. Dünənə kimi Rusiyanın qucağında olan bu ölkə, bu gün başqa qucağa getməyə hazırdır. Bu ölkənin sabit yolu olmayıb. ABŞ öz sözünü deyən Azərbaycanı dəstəkləmək istəməz. Onlara marionet dövlət lazımdır. Fransa 500 hərbçini sülhməramlı adı ilə Qarabağa göndərmək istəyirdi. Həmin 500 nəfəri onlar Xankəndiyə soxa bilsəydi, bizim üçün vəziyyəti nəzarətə almaq çətin olardı. Düşünürəm ki, ABŞ nə qədər çox Ermənistanın yanında görünürsə, Rusiyanı da bir o qədər uzaqda görür. Rusiyanın Ermənistanla bağlı gözləntiləri özünü doğrultmadı. Müharibə zamanı bu özünü daha aydın büruzə verdi. Ermənistan məhz Rusiyanın dəstəyi ilə bizim ərazilərimizi işğal etdi. Azərbaycan öz ordusunu daha da gücləndirməlidir. Sülh istəyiriksə, müharibəyə hazır olmalıyıq. Biz açıq şəkildə ABŞ və Avropanın ikiüzlülüyünü görürük. Onlar bizim ərazilərimiz işğal altında olanda belə təşəbbüslər göstərmirdi. ATƏT-in Minsk qrupu həmsədrləri içərisində həm ABŞ, həm də Avropanı təmsil edən Fransa vardı. Onlar yalnız başlarını girləməklə məşğul oldular. Deməli, onlar üçün əvvəlcə öz maraqları var. Obyektiv olsaydılalar, zamanında bizim haqq işimizlə bağlı da belə təşəbbüs göstərərdilər. Müharibədən sonra da heç bir humanitar təşəbbüslə çıxış etmirlər”.
Məhəmmədəli QƏRİBLİ
