Ukraynaya xəyanətin yeni şok təfərrüatları üzə çıxır...

Rusiyanın bu il mayın sonu və ya iyunda Ukraynaya qarşı yeni genişmiqyaslı hücuma keçməsi gözlənilir. Bunu Ukrayna prezidenti Volodimir Zelenski “CBS News”a açıqlamasında deyib. O bildirib ki, silah-sursat çatışmazlığı ilə üzləşən Ukrayna müdafiəçiləri bu hücuma hazır deyil və Qərbin göndərəcəyi silahlara ehtiyacı var.

Zelenski Rusiyanın tükənməz raket ehtiyatları və mərmilərinin bəzi kəndləri məhv etdiyini əlavə edib: “Bizim mərmilərimiz, artilleriya mərmilərimiz, bir çox müxtəlif nəsnələrimiz yoxdur. Bizim yardıma indi ehtiyacımız var”. Ukrayna prezidenti vurğulayıb ki, onun qüvvələri Rusiyanın hücumunu dayandırsa da növbəti genişmiqyaslı hücuma qarşı müdafiəyə hazır deyil. O, Rusiyanın xüsusilə də uzaqvuran artilleriya imkanlarının Ukrayna ilə müqayisədə daha yaxşı olduğunu etiraf edib: “Baxmut, Avdeyevka, Lisiçansk, Soledar və digər yerlərdə artilleriya mərmisinin vuruş məsafəsi 20 kilometrdən çox olan düşmənə qarşı döyüşmək həqiqətən də çətin idi, bizim artilleriyamız isə 20 kilometrdən qısa məsafəyə atəş açır”. O, Ukraynanın daha çox “Patriot” hava hücumundan müdafiə sisteminə və artilleriyaya ehtiyac duyduğunu qeyd edib. Zelenski ABŞ-nin ayırdığı milyardlarla dolların hələ də ABŞ-də qaldığını deyib: "On milyardlarla dollar ABŞ-də qalır. Gəlin dürüst olaq, Konqres, administrasiya tərəfindən ayırılan vəsaitin əksər hallarda 80%-i, ən azı 75%-dən çoxu ABŞ-da qalır. Bizə sursat gəlir, lakin istehsal orada baş verir və pul da ABŞ-də qalır, vergilər ABŞ-da qalır. Bəli, bizə nəhəng dəstək gəlir, lakin bizim buna ehtiyacımız var”. Zelenski onu da bildirib ki, ABŞ və Avropada hələ müharibə yoxdur, lakin çox yaxında bu müharibə başlaya bilər və Rusiya raketləri o istiqamətdə uçacaq. Ukrayna rəhbərinin sözlərinə görə, Avropa İttifaqı (Aİ) Rusiya ilə hərbi münaqişəyə girərsə, o zaman Amerika əsgərləri bütün Avropanı müdafiə etməli olacaq, çünki ABŞ NATO-nun üzvüdür: “Hazırda Birləşmiş Ştatlarda müharibə yoxdur, amma çox tezliklə müharibə ora gəlib çata bilər. Həm Avropaya, həm də ABŞ-yə. Hələlik Rusiya raketləri ABŞ-yə çatmır, amma sabah bu raketlər istənilən ölkəyə uça bilər”. Beləliklə, səslənən açıqlamalar göstərir ki, Qərb indiki halda Ukraynanı çox çətin durumda qoyub. Britaniyanın Civitas analitik mərkəzinin hərbi eksperti Robert Klark da bunu etiraf edir: “Qərb Rusiyanın uğurlarına görə Ukraynadan üz döndərə və ona yardımı dayandıra bilər. Kiyevin müttəfiqləri səbrsizlikdən xəbər verməyə başlayır və bu, hərbi və iqtisadi yardımların kəsilməsinə gətirib çıxarır. Eyni zamanda, Rusiya sənayesi Aİ və Ukraynanı qabaqlayır. Ukrayna üçün 2024-cü il amansız xəyanətlə başa çata bilər. Kiyev bir il əvvəlkindən daha qaranlıq vəziyyətdədir”.

ABŞ-ın NATO-dakı keçmiş səfiri İvo Daalder də bildirib ki, ABŞ-dakı siyasi dəyişikliklər və prezidentliyə potensial namizəd Donald Trampın fəaliyyəti Ukraynaya yardımın həcminə təsir edir. Diplomat etiraf edib ki, Ukrayna ABŞ yardımını itirəcək. Buna görə də o, Kiyevin 2024-cü ilin birinci yarısında Moskvaya uduzacağını güman edir. Məhşur “Forbes” nəşri isə qeyd edir: “Ağ Ev administrasiyası maliyyə və hərbi yardımı dayandırmaqla Ukraynaya xəyanət etdi. Amerikanın Ukraynaya yardımı ötən il dekabrın sonlarında başa çatdıqda və ABŞ Konqresindəki rusiyapərəst respublikaçılar Co Baydenin təklifinə səs verməkdən imtina edəndə ilk olaraq Ukrayna artilleriya batareyaları ABŞ-ın xəyanətini hiss etdi. Bu vəziyyət Rusiya Silahlı Qüvvələrinə ağır silahları cəbhə xəttinə daha yaxın yerləşdirməyə imkan verir. Bir il əvvəl rus qoşunları cəbhəyə yaxın bu qədər kiçik bir ərazidə bu qədər ağır silah yerləşdirmək risqinə girə bilməzdi”. Avropa Parlamentinin İrlandiyadan olan üzvü Kler Deyli də bu xüsusda maraqlı açıqlamalr verib: “Qərb dövlətləri Ukraynanı münaqişənin onun üçün əlverişsiz olan sülh yolu ilə həllinə məcbur etməyə çalışır.       Artıq Qərbin qaçılmaz xəyanəti başlayıb. İndi on minlərlə insanın öldüyü vaxt Ukrayna NATO dostlarının onu mübarizəni davam etdirməyə çağırdığı 2022-ci ilin aprelindən daha pis vəziyyətə düşür”. Bu arada Qərb analitikləri Ukrayna prezidenti Volodimir Zelenskinin çevriliş qorxusundan sülh yolu ilə nizamlanmaya qərar verməyəcəyini iddia edirlər. Onların fikrincə, o, təkbaşına Rusiya ilə danışıqlar masasına əyləşməyəcəyinə görə Vaşinqton onu buna məcbur etməlidir. Ukraynanın müdafiə naziri Rustem Umerov Aİ-dən olan həmkarlarına məktub yazaraq, sursat çatışmazlığı ilə bağlı vəziyyəti kritik adlandırıb. Hələ bu il yanvarın ortalarında prezident Volodimir Zelenski etiraf etdi ki, dünyada Ukraynanın Rusiya ordusu ilə qarşıdurmaya tab gətirməsi üçün kifayət qədər hərbi-sənaye kompleksi resursları yoxdur. Amma Qərb daha bu ehtiyacı qarşılamaq istəmir. Yuxarıda qeyd olunduğu kimi, ötən il dekabrın sonunda Vaşinqton son hərbi yardım paketini Kiyevə təhvil verib. Ağ Evin yeni tələbi Konqresdə təsdiqini gözləyir, lakin heç bir irəliləyiş yoxdur. ABŞ rəhbərliyi etiraf edir ki, ABŞ-ın dəstəyinin olmaması səbəbindən digər Qərb ölkələri də Kiyev hakimiyyətinə sponsorluq etməkdən “yaxşı” imtina edə bilər.

Nahid SALAYEV