ABŞ Departamentindən Paşinyanın demarkasiya bəyanatlarına reaksiya...
ABŞ Dövlət Departamenti Ermənistanın baş naziri Nikol Paşinyanın Azərbaycanla sərhədin tez bir zamanda demarkasiyasının zəruriliyi ilə bağlı bəyanatlarına cavab verib.
Trend xəbər verir ki, bugünkü brifinqdə ABŞ Dövlət Departamentinin mətbuat katibinin baş müavini Vedant Patel qeyd edib ki, ABŞ bu məsələyə ciddi diqqət yetirir: "Bu, diqqətimizi yetirməyə davam etdirdiyimiz bir məsələdir. Bu, təkcə dövlət katibinin deyil, həm də katibin köməkçisi O'Brayen və baş koordinator Bono-nun müvafiq tərəflərlə diqqətini davam etdirdiyi bir məsələdir".
Qeyd edək ki, bu gün Paşinyan bildirib ki, əgər Ermənistan Azərbaycanla sərhədin delimitasiyası və demarkasiyası məsələsini müzakirə etməsə, “həftənin sonunda müharibə olacaq”.
"Amma bu o deməkdir ki, həftənin sonunda müharibə olacaq. Və bu müharibənin sonunda nə olacağını bilirəm", - deyə o bildirib.
Paşinyanın sözlərinə görə, “Ermənistan Azərbaycanla müharibənin baş verməsinə imkan verməməlidir” və ona görə də “sərhədi yerində dəqiqləşdirmək” lazımdır.
Ermənistanın baş nazirinin sözlərinə görə, iki ölkə arasında sərhədin delimitasiyası və demarkasiyası prosesinə başlamaq üçün “real imkan var”.
Xatırladaq ki, 7 mart tarixində Azərbaycan Respublikası və Ermənistan Respublikası arasında sərhəddə Azərbaycan Respublikası Baş nazirinin müavini Şahin Mustafayev və Ermənistan Respublikası Baş nazirinin müavini Mher Qriqoryanın sədrliyi altında Azərbaycan Respublikası və Ermənistan Respublikası arasında dövlət sərhədinin delimitasiyası üzrə Dövlət Komissiyasının və Ermənistan Respublikası ilə Azərbaycan Respublikası arasında dövlət sərhədinin delimitasiyası və sərhəd təhlükəsizliyi məsələləri üzrə Komissiyanın yeddinci görüşü keçirilib.
30 noyabr 2023-cü il tarixində Azərbaycan Respublikası ilə Ermənistan Respublikası arasında sərhəddə (Qazax-İcevan) beşinci görüş baş tutdu.
