Moskva İrəvanın bu hərəkətlərinə də sakit qalsa...
“Böyük Britaniya müdafiə nazirinin müavininin sözləri Qərbin Ermənistanı Rusiya Federasiyasına qarşı alətə çevirmək istəyinin birbaşa təsdiqidir”. Belə bir açıqlama ilə Rusiya Xarici İşlər Nazirliyi çıxış edib.
Rusiyanın xarici siyasət idarəsinin şərhində bu xüsusda daha sonra qeyd olunur: “Londonun postsovet məkanında, o cümlədən Cənubi Qafqazda atdığı bütün addımların anti-Rusiya mahiyyətini gizlətməkdən əl çəkməsi bizi artıq təəccübləndirmir. Lakin Hippinin etirafı Qərbin Ermənistanı Moskvaya qarşı yönəlmiş xəttin alətinə çevirmək istəyinin birbaşa təsdiqidir”. O da bildirilib ki, bu vəziyyət İrəvandakı məsul siyasətçilərin düşünməsi üçün əsasdır. Qeyd edək ki, Britaniya müdafiə nazirinin müavini Ceyms Hippinin sözlərinə görə, London Rusiyadan gələn təhlükələr qarşısında Ermənistanı dəstəkləməyə hazırdır və bütün məsələ baş nazir Nikol Paşinyanın Ermənistanın KTMT-də iştirakını dondurmaq istəyindədir. London İrəvanın bu qərarını Ermənistanın suveren hüququnun həyata keçirilməsi kimi qiymətləndirib: “Böyük Britaniya KTMT üzvlüyünün dondurulmasını Ermənistanın suveren hüququnun həyata keçirilməsi kimi tanıyır və Rusiyadan gələn cavab tədbirləri təhlükəsi qarşısında onu dəstəkləmək üçün Avro-Atlantik müttəfiqləri ilə əməkdaşlıq edəcək”. Hippi bu barədə deputat Robert Baklandın sorğusuna yazılı cavabında danışıb. Parlamentari Ermənistanın Kollektiv Təhlükəsizlik Müqaviləsi Təşkilatından çıxacağı təqdirdə Böyük Britaniyanın müdafiə sənayesinə potensial faydalar barədə sual verib. Hippi qeyd edib ki, istənilən fayda Böyük Britaniyanın imzaladığı ATƏT-in silah embarqosunun razılaşdırılmış hüdudlarına uyğun olmalıdır. Eyni zamanda o vurğulayıb ki, London əməkdaşlığın dərinləşdirilməsi imkanları fonunda Ermənistanla yaxından işləməyə davam edəcək. Ceyms Hippinin açıqlamalarına istinad edən erməni politoloq Suren Surenyants qeyd edib: “Qərb tərəfdaşları son dərəcə “səmimidirlər”. Onlar Azərbaycandan gələn təhdidlər qarşısında bizi dəstəkləmək fikrində deyillər, amma bizi ruslardan “qoruyurlar” və bu yolla bizi “ümid astanasına” – Ankaraya doğru sürükləyirlər. “Rus boyunduruğunu” atmaq üçün bizə belə zəmanətlər verirlər. Bizə açıq şəkildə Ukrayna-2 olmağı təklif edirlər. Və bu halda Qərbi bu prosesin nəticəsi deyil, Ermənistan dövlətçiliyinin itirilməsi ilə nəticələnə biləcək prosesin özü maraqlandırır. Axı Qərb mərkəzlərinin məqsədi regionda Rusiya və İranın təsirini zəiflətməkdir. Və bunun nəticəsində erməni xalqının və ya Ermənistanın başına nə gələcəyi isə onları qətiyyən maraqlandırmır. Həm də ona görə yox ki, onlar erməni xalqının “şər” və ya “düşmənləri”dirlər. Qətiyyən. Sadəcə olaraq Qərbin Türkiyə və Azərbaycanla qarşıdurmada bizi dəstəkləməkdə heç bir siyasi marağı yoxdur. Qərb eksklüziv olaraq bizim “anti-Rusiya” potensialımızla maraqlanır. London Rusiyanın təhdidlərinə, sırf nəzəri xarakter daşısa da, dərhal reaksiya verir. Bununla belə, onlar Bakının bizim qarşımızda tələblərini tamamilə qanuni hesab edirlər”.
Bunlar fonunda ehtiyatda olan erməni general-mayor İşxan Matevosyan etiraf edir ki, Ermənistan böyük güclərin əlində növbəti vasitəyə çevrilib: “Dövlətimizin ətrafında və ümumilikdə Cənubi Qafqazda yaranmış son dərəcə təhlükəli vəziyyət bir günün işi deyil, çoxdan başlayıb”. Onun sözlərinə görə, Ermənistandakı vəziyyət hazırkı hakimiyyətin siyasi dəhşət nümayiş etdirən fəaliyyətinin və apardığı siyasətin nəticəsidir: “Regionda qüvvələrin və reallıqların düzülüşü bir gündə, nə dünən, nə də bir ay əvvəl formalaşmayıb. 2018-ci ildən formalaşıb və dövrün hakimiyyətinin antimilli siyasətinin nəticəsidir. Artıq heç kimə sirr deyil ki, bu hakimiyyət Ermənistanın maraqlarından başqa hər hansı digər güc mərkəzinin maraqlarına xidmət edir. Bu, bir qayda olaraq, Ermənistanın mənafeyinin ziyanına və onun hesabına həyata keçirilir”. Matevosyan bildirib ki, ölkə Ermənistandan başqa hər kəsin maraqlarının təmin olunduğu xarici rəhbərlik rejiminə verilir. Ermənistan parlamentinin sabiq deputatı Naira Zöhrabyan qeyd edir ki, bu halda Rusiya İrəvana qarşı daha sərt addımlar atmaq məcburiyyətində qalacaq: “İrəvanın “Zvartnots” hava limanından rus sərhədçilərin çıxarılması ilə bağlı Rusiya tərəfinə müraciətdən sonra Ermənistandakı Rusiya bazasının bağlanması məsələsi gündəmə gəlib. Erməni mediası hökumət nümayəndələrinin artıq 102-ci bazanın Ermənistandan çıxarılmasının vaxtı çatdığı barədə müzakirə apardıqları məlumatını yayıb. Beləliklə, rus sərhədçilərin çıxarılmasının ardınca 102-ci bazanın bağlanmasının hədəfləndiyini açıqlayırlar. Paşinyan bu addımı atacaq, ancaq Rusiyanın da cavabı olacaq. Artıq bir neçə gündür ki, Larsda vəziyyət kifayət qədər gərgindir: Rusiya tərəfi bəzi maşınları buraxır, bəzilərinə süni maneələr yaradılır və bu yanaşmalar daha da sərtləşəcək”. Zöhrabyan Rusiyanın əlində ciddi iqtisadi təsir vasitələri olduğunu, Rusiyada 3 milyondan çox erməni yaşadığını da xatırladıb. Ermənistanın keçmiş baş naziri Qrant Baqratyan da etiraf edir ki, 102 saylı hərbi bazanı Gümrüdən çıxarmaq istəyirlər: “Biz belə şeylər deyəndə deyirlər ki, siz rusiyapərəstsiniz. Bəs necə olaq, türkpərəst olaq? Rusiyapərəstsiniz nə deməkdir? Qaçacaqlar. Rusları “Zvartnots”dan çıxarırlar ki, özləri lazım olanda qaça bilsinlər”.
Nahid SALAYEV
