Qondarma “Arsax”ın “rəhbərləri” beynəlxalq təmaslara yenidən baş vurdular...
Elnur Kəlbizadə: “...Vaxtilə Qarabağda mövcud olmuş oyuncaq rejimin təmsilçilərinin yenidən dirilməsinə xarici ölkələr də dəstək göstərir”
Məhv olmuş və tarixin zibilliyinə atılmış qondarma “Artsax respublikası”nı xortlatmaq üçün Ermənistanda fəal işlər aparılır. Gələn məlumatlara görə, İrəvanda qondarma “Artsax respublikasının” fəaliyyətini bərpa etmək üçün dəridən-qabıqdan çıxırlar.
Məlumatlara görə, Ermənistanın Baş naziri Nikol Paşinyan özü də bu cəfəng prosesə dəstək verir. Artıq keçmiş "Artsaxın" “rəhbərliyi" də Qərbdə əlaqələr qurmaq üçün axtarışlara baş vurur, hətta xarici ölkələrdə yeni təmsilçiliklər açmağı planlayır. Bildiyimiz kimi, İrəvanın mərkəzində, Fransa meydanında "Artsax bayrağını" endirmişdilər, iki-üç gün qabaq onu yenidən bərpa ediblər və sair.
“Onların hər biri tarixin müxtəlif dövrlərində olduğu kimi, yenə də ermənilərdən, Ermənistandan maşa olaraq istifadə etməyə çalışır, “erməni məsələsini” yenidən diriltməyə cəhd edirlər”
Məsələ ilə bağlı “Bakı-Xəbər”ə şərh verən AMEA-nın Qafqazşünaslıq İnstitutunun Ermənişünaslıq şöbəsinin müdiri, dosent Elnur Kəlbizadə “Hazırkı şəraitdə Ermənistanda revanşist əhval-ruhiyyənin güclənməsinə, vaxtilə Azərbaycanın işğal olunmuş ərazilərində yaradılmış oyuncaq rejimin başçılarının yenidən baş qaldırmasına bir neçə amil təsir göstərir. Bunların içərisində xarici amillər xüsusi yer tutur. Qafqazda öz nüfuzunu, öz təsirini qoruyub saxlamağa çalışan xarici güc mərkəzləri, xarici dövlətlər, eyni zamanda ermənilər və Ermənistan vasitəsilə Qafqaz regionuna daxil olmağa çalışan xarici dövlətlər müxtəlif formalarda bu revanşist əhval-ruhiyyədən, bu proseslərdən faydalanmağa çalışırlar. Bir tərəfdən, Fransa və Hindistan kimi dövlətlər Ermənistanı müxtəlif silahlarla silahlandırırlar. Bəyan olunan hərbi əməkdaşlıq çərçivəsində Ermənistana müdafiə silahlarını satdıqlarını söyləsələr də, əslində taktiki-texniki xüsusiyyətlərinə görə hücum üçün nəzərdə tutulan bir çox silahlar verirlər. İstisna deyil ki, Ermənistanda hazırda revşanşist əhval-ruhiyyənin yüksəlməsinə, həmçinin vaxtilə Qarabağda mövcud olmuş oyuncaq rejimin təmsilçilərinin yenidən dirilməsinə xarici ölkələr də dəstək göstərir”-deyə bildirdi.
E.Kəlbizadənin fikrincə, ola bilsin, Nikol Paşinyan hökumətinin mövcudluğu onların maraqlarına cavab vermədiyindən keçmiş oyuncaq rejimin təmsilçilərindən yenidən istifadə etmək cəhdləri var.
E.Kəlbizadənin sözlərinə görə, hazırda Ermənistandakı daxili ictimai-siyasi vəziyyət elə xaotikdir ki, indiki halda baş verən proseslərin xarici sifarişçisinin kim olduğunu konkretləşdirmək o qədər də asan deyil: “Qeyd etdiyimiz kimi, bu məsələdə ən müxtəlif güc mərkəzlərinin, ən müxtəlif dövlətlərin maraqları var və onların hər biri, tarixin müxtəlif dövrlərində olduğu kimi, yenə də ermənilərdən, Ermənistandan maşa olaraq istifadə etməyə çalışır, “erməni məsələsini” yenidən diriltməyə cəhd edirlər. Ermənistanda baş verən proseslərin, revanşist əhval-ruhiyyənin güclənməsinin hansı dövlət, hansı güc mərkəzləri tərəfindən sifariş verilməsindən asılı olmayaraq, Azərbaycan bütün situasiyalara hazır olmalıdır, Ermənistanın atdığı dekonstruktiv, sülhü dağıdan, bölgədə sabitliyi pozan addımlar rasional şəkildə, soyuqqanlılıqla qiymətləndirilməlidir, atılacaq hər bir addımda yalnız və yalnız Azərbaycanın milli maraqları, dövlət maraqları əsas götürülməlidir. Azərbaycan son illərdə baş verən bütün siyasi proseslərdə atdığı addımlarla aydın şəkildə göstərib ki, bizim mövqeyimiz Qafqazda sülhün, sabitliyin yaradılmasına istiqamətlənib və Azərbaycan dövləti hər hansı bir addım atarkən üçüncü dövlətlərin marağını deyil, özünün milli maraqlarını nəzərə alır, bu kontekstdə hərəkət edir. İndiki halda da biz bütün addımlarımızı milli maraqlar çərçivəsində atmalıyıq, Azərbaycanın mənafelərinə xidmət edən bütün məqamları nəzərə almalıyıq, bir daha göstərməliyik ki, biz Ermənistandan fərqli olaraq regionda hansısa xarici güclərin, hansısa xarici dövlətlərin forpostu deyilik, yaxınlığından və uzaqlığından asılı olmayaraq, hansısa güc mərkəzlərinin maraqlarını yerinə yetirmirik”-deyə E.Kəlbizadə qeyd etdi.
İradə SARIYEVA
