Makron tank göndərdi, Avropa İttifaqı "Ermənistanı gücləndirəcəyik" dedi...
Abutalıb Səmədov: “Qərb dövlətləri daha çox Rusiyanı Ermənistanı cəzalandırmaqdan çəkindirməyə çalışır”
Avropa Birliyinin siyasi xətti Ermənistanı dəstəkləmək və ölkənin müqavimətini gücləndirməkdir. Bunu Aİ Xarici Əlaqələr Xidmətinin yüksək rütbəli nümayəndəsi noyabrın 13-14-də Brüsseldə keçiriləcək Aİ Xarici İşlər Nazirləri Şurasının iclasından əvvəl müxbirin sualını cavablandırarkən deyib. Daha sonra o bildirib:
“Bizdə olan məlumata görə, danışıqlar masası üzərində sülh sazişi var, onun ətrafında əməkdaşlıq etmək lazımdır. Mən Ermənistanın baş nazirinin Azərbaycanın ərazi bütövlüyünü tanımasını yüksək qiymətləndirirəm. Azərbaycan prezidenti də Ermənistanın ərazi bütövlüyünü tanıyıb və Aİ buna böyük ümid bəsləyir. Çox təhlükəli məsələlər var: məhbuslar, sərhədlər, lakin biz hələ də müzakirə olunan, iki ölkə arasında qarşıdurma mövzusu olan məsələlərə yenidən baxmaq istəyirik. Bizim siyasi xəttimiz Ermənistanı dəstəkləmək, Rusiyanın əhəmiyyətli təzyiqi altında olan Ermənistanın müqavimətini gücləndirməkdir və bizim istədiyimiz də budur”.
Çox maraqlı tendensiyadır. Bir tərəfdən Makron Ermənistana tank göndərir, digər tərəfdən isə Avropa Birliyi Ermənistanla Rusiya əleyinə gizli sövdələşmə qurur.
Bu addımları necə izah etmək olar?
Müstəqil siyasətçi Abutalıb Səmədov “Bakı-Xəbər”ə açıqlamasında bildirdi ki, 44 günlük müharibə və ondan sonrakı dönəmdə Qərbin Cənubi Qafqaza yönəlik siyasəti bir neçə dəfə dəyişdi: “Ukrayna müharibəsinə qədər ABŞ və Qərb Ermənistanı dəstəkləyirdi. Bu dövrdə Qarabağa statusun verilməsi ilə bağlı dalbadal bəyanatlar verildi. Ermənistan və Qarabağ ermənilərinə ardıcıl yardımlar göstərilirdi. Ukrayna müharibəsi başlandıqdan sonra və Ermənistan Qərbin istədiyi mövqeni ortaya qoymayanda münasibət dəyişdi. ABŞ və onun müttəfiqləri gördü ki, Ermənistandan fərqli olaraq, Azərbaycan kifayət qədər müstəqil və cəsarətli xarici siyasət yürüdür. Qərb gördü ki, bölgədən Rusiyanı çıxarmaq üçün yaxşı imkan yaranıb. Üstəlik də İranla bağlı Azərbaycanın cəsarətli mövqe sərgiləməsi, Ermənistanın isə İranla yaxınlaşması bu münasibətlərin dəyişməsində mühüm rol oynadı. Bu dönəmdə Qərb Azərbaycanın mövqeyini gücləndirmək üçün müəyyən addımlar atdı. Ortaya Vaşinqton sənədi çıxdı, Ermənistana təzyiqlər başladı. Ermənistandan Qarabağ siyasətini dəyişməsi tələb edildi. 2022-ci ilin oktyabr ayında Putin Valdayda bəyanat verdi və Ermənistanın mövqeyini tənqid etdi. Ortaya sülh sazişi ilə bağlı layihə qoydu. Onun 15-ci bəndində deyilirdi ki, Qarabağın statusunu gələcək nəsillər müəyyənləşdirəcək. Bundan sonra Paşinyan aktiv şəkildə Rusiyanın layihəsini dəstəklədi. Soçi sammitindən sonra Paşinyan Rusiyadan öz layihəsinin arxasında durmağı tələb etdi. Rusiya həmin təklifi müzakirəyə çıxarmadı. Soçi sammitindən sonra Paşinyan anladı ki, Rusiyanın Azərbaycana təsir imkanları yoxdur. Bundan sonra Ermənistan anti-Rusiya addımları atmağa və bu yöndə bəyanatlar verməyə başladı. Hətta ABŞ-la birgə hərbi təlim də keçirdi. Sonradan Azərbaycan uğurlu antiterror əməliyyatı keçirdi və Qarabağ erməniləri bölgəni tərk etdi. Bu gün Ermənistan anti-Rusiya fəaliyyətinin öndəridir. Qərb də bu səbəbdən Ermənistana hər cür dəstək verməyə hazırdlr. BMT-nin son iki iclasında Ermənistana açıq dəstək verdilər. Ermənistana dəstək onu gücləndirmək və revanşist əhval-ruhiyəyyə salmağa qətiyyən kifayət etmir. Azərbayan qarşısında hərbi güc qoymaq şansı yaxın 10 il üçün mümkün olmayacaq.
Azərbaycanın həm də Türkiyə kimi müttəfiqi var. Paşinyan Rusiya ilə birgə olan bütün layihələri tərk etmək istiqamətində fəaliyyət göstərir. Qərb dövlətləri daha çox Rusiyanı Ermənistanı cəzalandırmaqdan çəkindirməyə çalışır. Mümkündür ki, gələn il Qərb Ukraynanı sülh sazişinə getməyə vadar etsin. Bu da Zelenskinin sonu olacaq. Bundan sonra Rusiyanın Ermənistana güclü təzyiqi ola bilər. Qərbin məqsədi Ermənistanı həmin dönəm üçün mümkün qədər yaxşı hazırlamaqdır. Azərbaycan kifayət qədər ağıllı siyasət yeridir və öz istəyinə nail olacaq”.
Məhəmmədəli QƏRİBLİ
