Fransız cəmiyyəti barbarlaşır - daha bir fakt, Makronun növbəti cinayəti...
Mübariz Göyüşlü :"Fransa cəmiyyətində mədəniyyətə qarşı barbar davranışlar Makronun yarıtmaz siyasətindən qaynaqlanır"
Rəsmi Parisin yürütdüyü siyasətin nəticəsidir ki, fransız cəmiyyətində barbarlıq nümunələri özünü büruzə verir. "Demokratiya", "azadlıq" libası geyinən, lakin onun içində dağıdıcılıqla məşğul olan fransız hökumətinin başqa xalqların özlərinə, mədəniyyətinə qısqanc yanaşdığı məlumdur.
Emmanuel Makron hökuməti elə şərait yaradıb ki, cəmiyyətin özündə təbii olaraq barbarlaşma gedir. Bir müddət əvvəl Azərbaycanın böyük şairəsi Xurşidbanu Natəvanın abidəsinə qarşı zorakılıq, vandalizm aktı törədən şəxslərə Fransa polisi gözünüz üstündə qaşınız var demədi. Təbii, bu da onu göstərir ki, o cəmiyyətdə artıq bu, normaya çevrilir.
İndi isə xəbər yayılıb ki, Fransanın paytaxtı Parisdə yerləşən Luvr muzeyində ekofəallar məşhur rəssam Leonardo Da Vinçinin şah əsəri olan "Mona Liza" (Cakonda) tablosuna şorba töküblər.
Üzərində "Riposte Alimentaire" ("Qidaya reaksiya") yazılmış köynək geyinmiş iki qadın tablonun üzərini örtən qoruyucu şüşəni şorba ilə isladıb. Sonra onlar "qida hüququ", "Fransanın kənd təsərrüfatı sistemi xəstədir" və "hər üç fransızdan biri yeməkdən imtina etməlidir" kimi şüarlar səsləndirməyə başlayıblar.
Qeyd edilənə görə, bu tablo son 20 ildə dəfələrlə vandalların hücumuna məruz qalıb. 2009-cu ildə bir turist tabloya çay ataraq ovaxtkı adi şüşəni sındırıb, bundan sonra rəsmin üzərinə zirehli ekran quraşdırılıb. 2022-ci ilin may ayında isə zirehli şüşənin üzərinə tort sürtülüb.
Fransız cəmiyyəti barbarlaşır, yoxsa bu, Makronun növbəti cinayətidir?
"... Fransada dözümsüzlük, irqi ayrıseçkilik, radikallıq həddən artıq artıb"
Müasir İnkişaf Birliyinin sədri Mübariz Göyüşlü "Bakı-Xəbər"ə şərhində "Fransa xalqı dünyada mədəniyyət yaratmış, mədəni xalq kimi tanımış xalq olsa da, təəssüf ki, Makronun hakimiyyəti dövründə fransızlar vaxtilə olduqlarının əksi kimi tanınmağa başlayıblar. Makronun yürütdüyü siyasət, adminatarisiyasının həyata keçirdiyi fəaliyyət fransız cəmiyyətini belə bir duruma gətirib çıxarıb. Fransa cəmiyyətində mədəniyyətə qarşı barbar davranışlar Makronun yarıtmaz siyasətindən qaynaqlanır" - deyə bildirdi.
M.Göyüşlü qeyd etdi ki, bu ölkədə artıq mədəniyyət əsərlərinə, digər xalqların şəxsiyyətlərinə, sənət nümunələrinə qarşı dözümsüzlük, irqçilik baş alıb gedir. "Səhv etmirəmsə, Fransanın Milli Cəbhə Partiyasının rəhbəri Le Pen, bu ultra millətçi, radikal şəxs az qala seçkilərdə qalib gəlmişdi, hakimiyyətə gəlirdi. Baxın, Fransa cəmiyyəti Makron kimilərinin hakimiyyəti nəticəsində necə radikallaşıb, marginallaşıb. Fransada dözümsüzlük, irqi ayrıseçkilik, radikallıq həddən artıq artıb.
Halbuki, Fransa belə məsələlərdə başqalarını ittiham edir, amma düşünürəm ki, o öz siyasətinə diqqət etsə daha yaxşı olar. Vəziyyət belə davam edərsə, yaxın gələcəkdə də Fransada belə hallar artar, bu da cəmiyyət üçün yaxşı heç nə vəd etməz" - deyə M.Göyüşlü qeyd etdi.
Müsahibimiz əlavə etdi ki, Makron başqa ölkələrdə səhv axtarmaqdansa, gedib öz ölkəsində mədəni, sosial, siyasi, iqtisadi böhranları aradan qaldırsın.
İradə SARIYEVA
