Paşinyan sülh sazişindən başqa hər şeydən danışır- silahlara nəzarət, hücum etməmək paktı, güzgü qaydasında sərhəddən çəkilmə...
Son günlər Ermənistanın baş naziri Nikol Paşinyan Azərbaycanla sülh sazişi imzalanmasına mane olacaq açıqlamalarla çıxış edir, ən absurd ittiham tipli fikirlər səsləndirməklə əslində şəxsən özünün sülh sazişinə qarşı olduğunu açıqca ortaya qoyur. “Bakı-Xəbər” Media Qrupunun rəhbəri, politoloq Aydın Quliyev öz Facebook səhifəsində Ermənistan hökümətinin rəhbərinin son addımları barədə fikirlərini paylaşıb. A.Quliyev daha sonra yazır:
"Bu Paşinyanın bəzi mövzularda nə danışdığını tam anlamaq mümkün olmasa da, onun sülh sazişini uzatmaq cəhdləri gün kimi aydındır. İndi də deyir ki, əsas vəzifələrimizdən biri Ermənistan respublikasının ərazisini beynəlxalq hüquq əsasında legitimləşdirməkdir, yəni indiki Ermənistan ərazisinin 1991- ci ilə qədərki Ermənistan SSR- in ərazisinə uyğun olduğunu sübut etməliyik .
Sanki Azərbaycan bunun tam əksinə olan iddialarda imiş....Bəs 1991- çi ilə qədərki Ermənistan SSR və Azərbaycan SSR inzibati sərhədlərinin hazırda iki dövlətin sərhəddi kimi tanınmasına Azərbaycan 6 oktyabr 2022- ci ildə Praqada imza atmadı? 91- ci ilə qədərki inzibati sərhədlərin dövlət sərhəddinə çevrilməsinə kim imkan vermədi, Paşinyan? Sənin aqressiv millətin və yarımçıq dövlətin imkan vermədi. Əgər 90- cı illərdə Ermənistan təcavüz etməsəydi, 91- ci ildəki inzibati sərhədlər çoxdan iki dövlətin sərhəddinə çevrilmişdi.
İndi də " xəritə oyununu " atıb ortaya.Azərbaycan prezidenti aydın mətnlə deyir ki, 91- ci il Alma- ata sazişinə uyğun şəkildə sərhədləri müəyyən edək, Ekspert qrupları yaradaq ki, Alma- ata prinsiplərinə uyğun sərhədlərin haralardan keçəcəyini müəyyən edək. Burada nə mürəkkəblik var ki?! Ancaq Əliyevin tam aydın mövqeyinə qarşı Paşinyan hansısa mücərrəd "sovet xəritələrindən" danışır.
Hansı məntiqlə sənin dediyin 70- 90- cı illərin sovet xəritələrindən yapışaq, Paşinyan? Niyə məsələn, 20- ci ilin xəritələrindən yapışmayaq? Qorxursan ki, Yerevanımızın, Mehrimizin, Zəngəzurumuzun ermənilərə verildiyini dünya görər? Paşinyan təklif etdiyi yolun dalan olduğunu əla bilir və Azərbaycan prezidentinin şərait üçün ən optimal çıxış təklifi olan delimitasiya üzrə Ekspert qruplarının yaradılmasına qarşı pozucu ideyalara əl atır .
Gah deyir 91- ci ilin inzibati sərhədlərindən güzgü qaydasında qoşunları çəkək, gah deyir silahlara nəzarət üzrə saziş bağlayaq, gah deyir Hücum etməmək haqda pakt imzalayaq və sair.Bircə " sülh sazişini tez imzalayaq" sözünü dilə gətirmir.
Paşinyandan soruşulsa ki, '" bəs 91- ci ilin inzibati sərhədləri haralardan keçir ki onlara uyğun güzgü qaydasında qoşunları geri çəkək? " ,yəqin gözlərini döyəcək. Axı 91- ci ilin inzibati sərhədləri heç o zamanlar da yox idi, sonra da olmasına təcavüzkar ermənilər imkan vermədi...."
Mətləb Salahov
