Naxçıvanda "erməni xaçkarlar" yalanı Avroparlamentdə səsləndirildi...
Faiq İsmayılov: “Ermənilərin Avroparlamentə “Naxçıvanda minlərlə erməni xaçkarı məhv edilib” adı ilə təqdim etdikləri tamamilə dezinformasiyadır, saxta məlumatdır”
Uzun illərdir ki, Ermənistan tərəfindən Azərbaycanın tarixi, mədəni irsinin dağıdılmasına, talan edilməsinə, yer üzündən silinməsinə seyrçi qalan Avropa Parlamenti erməni yalanlarına dəstək verir.
Avroparlament erməni saxtakarlığına o qədər aludə olub ki, Azərbaycan ərazisində tarixən mövcud olmayan uydurma “erməni mədəni irsi” ilə bağlı konfrans keçirməyə hazırlaşır.
Bu işdə Avropa Parlamentinin slovakiyalı üzvü Miriam Leksman xüsusi canfəşanlıq göstərir, bir-birinin ardınca uydurmalar əsasında bəyanatlar verir. Onu da qeyd edək ki, Ermənistanın Belçika Krallığındakı səfiri, Ermənistanın Aİ-dəki daimi nümayəndəsi Tiqran Balayan çıxışında daha böyük bir ağ yalanı dilə gətirib. Səfir iddia edib ki, guya Azərbaycan tərəfindən “erməni mədəni irsi” “vaxtaşırı dağıdılıb, “Naxçıvanda 2005-ci ildə, minlərlə erməni xaçkarı məhv edilib”. Balayanın iddialarının tamamilə əsassız olduğu məlumdur. Onu da dünya bilməlidir ki, Naxçıvanda tarixən ermənilər yaşamayıb, onların orada nə xaçkarı, nə kilsəsi, nə də hansısa bir irsi olub. Qondarma “erməni xaçkarları” məsələsinin də Avroparlamentə çıxarılması gülünc bir haldır və antiazərbaycan mövqeyinin ifadəsidir.
“Avroparlamentin belə absurd bir iddiaya yer ayırması Azərbaycana qarşı qərəzin ifadəsidir”
AMEA-nın Tarix İnstitutunun əməkdaşı Faiq İsmayılov “Bakı-Xəbər”ə şərhində “Avroparlamentin belə absurd bir iddiaya yer ayırması Azərbaycana qarşı qərəzin ifadəsidir. Ermənilər mütəmadi olaraq Azərbaycanı qaralamaq məqsədilə bu cür cəfəng iddalarla beynəlxalq qurumlara müraciət edirlər, oradakı ermənipərəst qüvvələr isə bu yalanlardan Azərbaycana qarşı istifadə edir.
Bu iddiaya gəlincə, məlumat üçün deyim ki, o “hadisə” 2005-ci ildə deyil, keçən əsrin 90-cı illərinin əvvəllərində baş vermişdi. O daşlar ermənilərin özləri tərəfindən vandalcasına dağıdılıb. Bu, ermənilərin törətdiyi vandalizm aktıdır. Halbuki, Naxçıvandakı həmin o qəbirüstü abidələrin, baş daşlarının qətiyyən ermənilərə aidiyyəti yox idi” - deyə bildirdi.
O qeyd etdi ki, o daşların ermənilərlə heç bir əlaqəsi olmasa da, amma ermənilər o daşları müxtəlif nəşrlərdə “xaç daşları” adlandırırlar. “Bu məzarlıq erməni məzarlığı olmayıb, o, XIII-XV əsrlərdə əsasən Səlcuqlar tərəfindən salınıb. Bu daşların memarlıq quruluşlarını dəqiqliklə izləyib tədqiq edəndə görürsən ki, bunun ermənilərə heç bir aidiyyəti yoxdur. Həmin daşların qırılması ilə bağlı ermənilər müxtəlif fotolar paylaşırlar. Həmin fotolarda yük maşını və insanlar var. Bu insanların sifətləri görsənmir. İkinci, mənim özümdə bir fotoşəkil var, həmin fotoşəkildə o daşları sındırıb maşına yükələyirlər, həmin maşının isə Sovet Ermənistanına aid olduğu nömrə nişanı ilə bilinir. Açıq görsənir ki, bu QAZ-21 markalı maşın Ermənistan maşınıdır. Yəni görüntüləri var. Amma təəssüf ki, hazırda işdə olduğum üşün o şəkli sizə təqdim edə bilmirəm, şəkil şəxsi arxivimdədir. Birincisi, ermənilərin Avroparlamentə “Naxçıvanda minlərlə erməni xaçkarı məhv edilib” adı ilə təqdim etdikləri tamamilə dezinformasiyadır, saxta məlumatdır. Oradakı qəbir daşlarının sayı elə fotolardan sayılır, onların təqdim etdikləri dəqiq say deyil. Yəni ermənilərin dedikləri tamamilə cəfəndiyatdır. İkinci tərəfdən, bu dezinformasiyanı gerçəklik kimi müzakirəyə çıxarmaq Avroparlamentin Azərbaycana qarşı aqressiyasından başqa bir şey deyil. Təkcə Avropa Parlamenti deyil, Avropa Şurası da, Avropa İttifaqı da, başqa Avropa yönlü təşkilatlar da belə saxta məlumatlardan bizə qarşı istifadə edirlər, onlar belə bir xətt götürüblər. Amma onların bu düşmənçilik addımları baş tutmayacaq” - deyə F.İsmayılov qeyd etdi.
F.İsmayılov vurğuladı ki, ermənilər hara ayaq qoyurlarsa, ora xaç daşları basdırırlar. Onun sözlərinə görə, hətta torpaqlarımız işğalda olduğu dövrlərdə ermənilər bizim Qarabağ və Şərqi Zəngəzur ərazilərinə də çox böyük sayda xaç daşları basdırıblar. “Onlar kustar üsulla xaç daşları düzəldiblər, onun üzərinə xüsusi maddə vurub “qədimləşdiriblər”, sonra isə torpağa basdırıblar. Bu gün Qərbi Azərbaycan ərazisi də xaç daşlı qəbiristanlıqlara çevrilib. Hətta böyük xaç daşları düzəldib, kranla gətirib basdırırlar. Bununla bağlı əlimizdə təkzibolunmaz sübutlar var. Bu baxımdan, ermənilərin bu iddialarını əsassız hesab edirəm, digər iddiaları kimi bu da uğursuzluğa düçar olacaq” - deyə F.İsmayılov vurğuladı.
İradə SARIYEVA
