GUAM-ın 7 fevral müşahidələri digər beynəlxalq müşahidələrdən nə ilə fərqlənəcək...
Məhərrəm Zülfüqarlı: “Builki Prezident seçkilərini də GUAM-ın müşahidə etməsi müsbət haldır, çünki GUAM beynəlxalq aləmdə demokratik qurum kimi tanınır”
GUAM-ın müşahidə missiyası fevralın 7-də Azərbaycanda keçiriləcək Prezident seçkilərini izləyəcək. Secki-2024.az xəbər verir ki, 5 nəfərdən ibarət olacaq nümayəndə heyətinə GUAM-ın Baş katibi Altay Əfəndiyev, Ukrayna Ali Radasının deputatları Svyatoslav Yuraş, Mixail Papiyev, Gürcüstan parlamentinin deputatı David Matikaşvili və GUAM Katibliyinin proqram koordinatoru Teymuraz Kiladze daxildir.
Qeyd edək ki, GUAM-ın müşahidə missiyası səsvermədən sonra seçkinin nəticələrinə dair hesabat yayacaq.
Məlum olduğu kimi, Gürcüstan, Ukrayna, Moldova, Azərbaycan GUAM-ın üzvləridir.
Bu təşkilatın seçkiləri müşahidə etməsinin prinsipial hansı üstünlükləri var?
“Bu, seçkilərin daha çox demokratik imic qazanmasına kömək edir”
Azərbaycanda Vətəndaş Cəmiyyətinin İnkişafına Yardım Assosiasiyası (AVCİYA) Seçki Qərargahının rəhbəri, professor Məhərrəm Zülfüqarlı “Bakı-Xəbər”ə şərhində “Bilirsiz ki, GUAM MDB daxilində olan ölkələrdən təşkil olunub. Yəni keçmiş SSRİ məkanında Müstəqil Dövlətlər Birliyi yaranandan sonra onun daxilində bir neçə ölkə - Gürcüstan, Azərbaycan, Moldava və Ukrayna ayrılaraq belə bir qurum yaratdı. Məqsəd də Qərbi Avropaya daha da yaxınlaşmaq, demokratiyanın inkişafına nail olmaq, Şərq Tərəfdaşlığı Proqramına qoşulmaq və sair idi.Yəni bu respublikalar MDB daxilində Qərbə inteqrasiya edən respublikalar olduğundan belə bir qurum yaratdılar. MDB bir ölü quruma çevirilmişdi, işlək mexanizmləri demək olar ki, yox idi. Burada da artıq aydın idi ki, MDB Rusiya tərəfindən idarə olunur və keçmiş SSRİ-ni bərpa etmək məqsədi daşıyır. Ona görə də GUAM yarandı və bu artıq MDB-nin parçalanması demək idi. Yəni daha demokratik respublikalar Qərbə inteqrasiya etmək üçün bu yolu tutdular. Hətta Özbəkistan da bir müddət GUAM-a qoşulmuşdu. Sonra Özbəkistan çıxdı.
Bu təşkilatın müşahidə missiyasının 7 fevral Prezident seçkilərini izləməsi bu seçkilərin daha çox demokratik imic qazanmasına kömək edir. Bu təşkilatın bu prosesə qatılmasının yalnız müsbət əhəmiyyəti var. Bilirsiz ki, inkiışaf etməkdə olan ölkələrdə keçirilən seçkiləri Avropa Birliyi, Avropa Şurası, GUAM, ATƏT-in Demokratik Təsisatlar və İnsan Haqları Bürosü və sair müşahidə edir” - deyə bildirdi.
M.Zülfüqarlı qeyd etdi ki, Seçki Məcəlləsinin yenidən hazırlanmasında Avropa Şurasının Venesiya Komissiyası Azərbaycanla əməkdaşlıq edir. “Builki Prezident seçkilərini də GUAM-ın müşahidə etməsi müsbət haldır, çünki GUAM beynəlxalq aləmdə demokratik qurum kimi tanınır.Təbii ki, MDB ilə müqayisədə. Bu qurumun seçkiləri müşahidə etməsi seçkilərin gələcəkdə demokratik imic qazanmasında müsbət rol oynaya bilər. Çünki bu müşahidəçilərin verəcəyi rəy seçkilərin daha demokratik, daha ədalətli olmasına imkan verəcək. Bu mənada, seçkiləri daha çox demokratik qurumların müşahidə etməsi müsbət haldır. 7 fevral seçkilərinə Ukrayna, Moldova, Gürcüstan respublikalarından müşahidəçilətin GUAM adından gəlməsi də müsbət haldır”-deyə bildirən M.Zülfüqarlı əlavə etdi ki, hələ seçkilərə var və ola bilsin, digər təşkilatlar da müraciət etsinlər.
İradə SARIYEVA
