33 ildə ilk - azad rayonlarımızda 26 seçki məntəqəsi quruldu...
Azər Həsrət: “İşğaldan azad olunan ərazilərdə seçkinin keçirilməsi Azərbaycana başucalığı gətirən bir faktdır”
Fevralın 7-nə təyin olunan növbədənkənar prezident seçkisi ilk dəfə olaraq bütün ölkə ərazisində keçiriləcək. Bunun üçün işğaldan azad edilmiş Qarabağ və Şərqi Zəngəzurda 26 seçki məntəqəsi yaradılıb.
Fevral seçkilərinin şərəfli və qürurlu anı ondan ibarətdir ki, 30 il əvvəl evlərindən didərgin salınan azərbaycanlıların bir hissəsi daha müvəqqəti məskunlaşdıqları bölgələrdə deyil, öz doğma torpaqlarında - Zəngilanda, Laçında, Şuşada, Füzulidə, Cəbrayılda və azad olunmuş digər yerlərdə səs verəcəklər.
“Siyasi kampaniyanın ölkənin bütün ərazisini, o cümlədən də işğaldan azad edilən əraziləri əhatə etməsi birmənalı olaraq bu torpaqların Azərbaycana aid olmasını təsdiq edir”
Siyasi şərhçi Azər Həsrət “Bakı-Xəbər”ə açıqlamasında bildirdi ki, fevral ayında keçiriləcək seçki dünyaya bir çox mesajlar verir: “İşğaldan azad olunan ərazilərdə seçkinin keçirilməsi bir daha sübut edəcək ki, Azərbaycan bir qarış torpağında belə başqa güclərin, ölkənin hakim olmasına imkan vermir və verməyəcək də. Bu seçki böyük siyasi kampaniyadır. Siyasi kampaniyanın ölkənin bütün ərazisini, o cümlədən də işğaldan azad edilən əraziləri əhatə etməsi birmənalı olaraq bu torpaqların Azərbaycana aid olmasını təsdiq edir. Dünya ölkələri, beynəlxalq təşkilatlar bilməlidir ki, Azərbaycan hər daim öz torpağına sahib çıxır. Fevralın 7-nə təyin olunan növbədənkənar prezident seçkisi ilk dəfə azad olunan ərazilərdə keçiriləcək. Əhali tam olaraq ora yerləşdirilməsə belə, orada olan az sayda insanlar üçün seçki keçiriləcək. Həmin ərazidə yaşayan insanlar səsvermədə iştirak edəcək. İşğaldan azad olunan ərazilərdə seçkinin keçirilməsi Azərbaycan üçün başucalığı gətirən bir faktdır”.
Həmsöhbətimiz son olaraq bildirdi ki, Azərbaycan xalqı fevralın 7-də əvvəlki seçkilərdə olduğu kimi, yenə tarixi seçimini edəcək - sabitliyə, əminamanlığa, bütövlüyə səs verəcək. 2024-cü il fevral seçkiləri hətta Azərbaycanın yüz illik tarixinə düşəcək bir seçki olacaq. İşğaldan azad olunmuş bütün torpaqlarda - Xankəndi, Şuşa, Laçın, Kəlbəcər, Xocalı, Cəbrayıl, Zəngilan və s. torpaqlarda Azərbaycan bayrağı dalğalanır. Tam əminliklə deyə bilərik ki, Azərbaycan xalqı müdrik lider, böyük diplomat, qalib sərkərdə İlham Əliyevin rəhbərliyi altında bu sınaqdan da uğurla çıxacaq.
Günel CƏLİLOVA
