Əliyevin Ərdoğan barədə sözləri çoxlarının yuxusunu qaçıracaq...
Aydın Mirzəzadə: “Beynəlxalq ictimaiyyət Azərbaycanla Türkiyənin yaxınlığını, qardaşlığını görür, bu münasibət istər-istəməz bəzi dövlətləri narahat edir”
Xəbər verdiyimiz kimi, Prezident İlha Əliyev bu günlərdə yerli televiziya kanallarına müsahibə verib. Müsahibə zamanı Prezident İlham Əliyevə belə bir sual ünvanlanıb: Mürəkkəb şərait yaranacağı halda “Azərbaycan Respublikasının Prezidenti kimi Siz kimə zəng edərdiniz?”.
Prezident İlham Əliyev isə cavabında bildirib ki, o çox nadir hallarda hansısa dövlət başçısını telefon zəngi ilə narahat edir: “Çünki hesab edirəm ki, mənim həmkarlarımın hamısı çox məşğul insanlardır və elə bir ciddi mövzu yoxdur ki, bu mövzu ilə bağlı nəsə təcili demək lazımdır. İkinci Qarabağ müharibəsi zamanı ən çox telefonla danışdığım insanlar Türkiyə Prezidenti və Rusiya Prezidenti idi. Bu da təbiidir, Türkiyə Prezidenti müharibənin ilk günündən son gününə qədər bizim yanımızda idi və Azərbaycana verdiyi siyasi və mənəvi dəstək bir çoxlarına bir mesaj idi. Əgər hansısa ciddi bir məsələ ölkəmiz qarşısında dursa, əlbəttə, ilk növbədə, qardaşım Rəcəb Tayyib Ərdoğana zəng edərəm, onu məlumatlandıraram”.
Prezident İ.Əliyevin ilk növbədə Türkiyə Prezidenti R.T.Ərdoğana zəng edərəm ifadəsi Azərbaycanın və Türkiyənin düşmənlərinə və dostlarına nə kimi mesajlar ötürür?
“İki dövlət arasında sıx qardaşlıq münasibəti o dərəcədə möhkəmdir ki, bir-birinin hansısa probleminin həllində birgə hərəkət edirlər”
Millət vəkili Aydın Mirzəzadə “Bakı-Xəbər”ə açıqlamasında bildirdi ki, Prezident İlham Əliyevin müsahibəsində onun Türkiyə ilə dostluq əlaqələri barədə fikirləri qırmızı xətt üzrə keçdi: “Türkiyə Azərbaycanın ərazi bütövlüyü uğrunda mübarizədə daim yanımızda olub, siyasi və mənəvi cəhətdən dəstək olub. Qardaş ölkənin bu hərəkəti daim yüksək qiymətləndirilib. Eyni zamanda, hansısa məsələ ilə bağlı Türkiyə Prezidentinə zəng edib məlumatlandırması o deməkdir ki, münasibətlərimiz möhkəmlənir, etimad yüksək səviyyədədir və bütün məsələlərdə hər iki tərəf eyni düşüncədədir. Həmçinin, iki dövlət arasında sıx qardaşlıq münasibəti o dərəcədə möhkəmdir ki, bir-birinin hansısa probleminin həllində birgə hərəkət edirlər. Bu münasibət, yanaşma cəmiyyətdən gələn sosial sifarişdir. Cənab Prezidentdə xalqın bir nümayəndəsi kimi əhalinin bu istəyini, münasibətini real şəkildə həyata keçirir. Azərbaycan hər zaman Türkiyə ilə birlikdə olub. Bu belə də davam edəcək”.
Millət vəkili onu da əlavə etdi ki, beynəlxalq ictimaiyyət Azərbaycanla Türkiyənin yaxınlığını, qardaşlığını görür. Bu münasibət istər-istəməz bəzi dövlətləri narahat edir.
Günel CƏLİLOVA
