Xankəndidə separatçı quldurbaşıların həbs planının detalları açılır...
Elşən Həsənov: “Bu həm də onun göstəricisidir ki, Azərbaycanın təhlükəsizliyi etibarlı əllərdədir”
Təbii ki, günahı olmayan hərbçilərə qarşı biz hər hansı bir sanksiya tətbiq etmək fikrində deyilik. Halbuki, separatçıların başçıları ilə bağlı bizim mövqeyimiz birmənalı idi – onların tutulması.
Bu barədə Prezident İlham Əliyev yerli televiziya kanallarına müsahibəsində bildirib. Prezident deyib ki, bəziləri artıq Laçın yolunda oradan qaçmağa cəhd edəndə, bəziləri Xankəndidə, bəzilərini də başqa yerlərdə biz tapıb tutmuşduq: “Biz onların yerlərini bilirdik”.
Belə aydın olur ki, 19-20 sentyabradək Azərbaycan kəşfiyyatı lazım olan işi görüb, onların yerlərini təyin etmişdi. Xüsusi xidmət orqanlarının bu peşəkarlığını necə dəyərləndirə bilərik?
Təhlükəsizlik qurumlarının sabiq əməkdaşı Elşən Həsənov “Bakı-Xəbər”ə açıqlamasında bildirdi ki, dövlət başçısı İlham Əliyevin dediyi kimi, günahı olmayan hərbçilərə qarşı biz hər hansı bir sanksiya tətbiq etmək fikrində deyiik və separatçıların başçıları ilə bağlı bizim mövqeyimiz də birmənalı olmalıdır:”Düzdür, əlinə silah götürüb Azərbaycana qarşı – vətəndaşı olduğu ölkəyə qarşı cinayətlər törətmiş hər hansı bir şəxs layiq olduğu cəzanı da almalıdır. Sadəcə olaraq, dünya siyasəti miqyasında xoşməramlı jest nümayiş etdirərək Azərbaycan tərəfi günahsız saydığı şəxslərin ölkədən azad surətdə çıxışına mane olmadı.
Amma təbii ki, bütün bunların arxasında dayanmış olan, verdiyi əmrlərlə minlərlə günahsız insanın qanını tökmüş, evlərini-eşiklərini viran etmiş və s. cinayətlər, o cümlədən hərbi cinayətlər törətmiş şəxslər barəsində qəti mövqe sərgilənməliydi.
Əlbəttə ki, onların yerlərinin təyin edilməsi, marşrutlarının izlənilməsi, bu istiqamətdə əməliyyat tədbirlərinin həyata keçirilməsi uzun sürən bir prosesdir, ayları, bəzən də illəri əhatə edərək gərgin əmək, bir çox hallarda əzmkarlıq və risq tələb edir. Amma son nəticə, göründüyü kimi, uğurlu alındı. Separatçı hərəkata rəhbərlik etmiş şəxslər həbs edilərək Bakıya gətirildilər və yəqin ki, yaxın zamanlarda layiqli cəzalarını da alacaqlar.
Düşünürəm ki, qaçmağa müvəffəq olmuş, azadlıqda qalmış bir neçə nəfər cinayətkarın da ölkəyə gətirilməsi istiqamətində işlər aparılır və bu işlər də müvəffəqiyyətlə sonuclanacaq.
Yüksək peşəkarlıq nümayiş etdirmiş DTX, XKX, Azərbaycan MN – in xüsusi idarələri, DİN və SQ, eyni zamanda əməliyyat tədbirlərində əməyi keçmiş digər strukturların birgə əməli fəaliyyətləri təqdirəlayiqdir və yalnız alqışlana bilər.
Bu həm də onun göstəricisidir ki, Azərbaycanın təhlükəsizliyi etibarlı əllərdədir.
Bu işdə əməyi keçmiş hər kəsə uğurlar diləyirəm”.
Məhəmmədəli QƏRİBLİ
