Azərbaycanda təhsil müddətinin uzadılmasının daha çox ziyanı dəyə bilər... Ekspert bölüşür..
Elmin Nuri: “Tədris ilinin müddətini uzatmaq istəyiriksə, digər keyfiyyətləri də bir etməliyik”
Azərbaycanda təhsil müəssisələrində təhsil müddəti uzadıla bilər. Bu günlərdə Elm və təhsil naziri Emin Əmrullayev mətbuata müsahibəsində bildirib ki, təhsil sahəsində qısa müddətdə uğur əldə etmək çətindir:
"Elmi tədqiqatların nəticəsinə görə, tədris müddətinin çox olması akademik göstəricələrə müsbət təsir edir. Bura məktəbəqədər təhsil müəssisələrinin fəaliyyətinin yüksək səviyyədə təşkil edilməsi də aiddir. Azərbaycan ictimaiyyəti tədris müddətinin artırılması məsələsini müzakirə etməlidir. Amma onu da təəssüflə demək lazımdır ki, mediada aparılan monitorinqlərin nətisinə görə, ölkəmizdə ictimai müzakirənin keyfiyyətində də problem var".
Təhsil müddətinin uzadılması ilə bağlı nazirin açıqlaması isə xoş qarşılanmır.
“Bu gün təhsilimizdə bir-birini əvəz edən problemlərin içərisində bir dərs ilinin müddəti, onun yaratdığı fəsadlar o qədər də ön sıralarda deyil”
Təhsil məsələləri üzrə ekspert Elmin Nuri bildirdi ki, elm və təhsil naziri Emin Əmrullayevin təhsil müddətinin uzadılması ilə bağlı fikirləri sosial şəbəkələrdə, mediada birmənalı qarşılanmır: “Bu gün əsas müzakirə olunan məsələlərdən birinə çevrilib. Bu gün təhsilimizdə bir-birini əvəz edən problemlərin içərisində bir dərs ilinin müddəti, onun yaratdığı fəsadlar o qədər də ön sıralarda deyil. Doğrudur, xarici ölkə təcrübələrinə baxdıqda Azərbaycanda dərs ilinin müddəti qısadır. Bir sıra ölkələrdə dərs ili adətən yayın sonlarında, ən yaxşı halda iyun ayının sonunda bitir. Əsasən isə sentyabrda başlayır. Təbii ki, oktyabrda başlanan tədris illəri də var. Tədris ili oktyabrın 1-5-də başlayan ölkələr də var. Ümumilikdə götürəndə, elə ölkələr var ki, onlarda dərs ilinin uzunluğu hətta 10-11 aya çatır. Dərs ilinin müddəti kəmiyyət göstəricidir. Məsələnin məzmununu keyfiyyət üzərində qurmaq lazımdır. Tutaq ki, artırdıq. Dərslər əvvəl sentyabrın 1-i başlayırdı. Sonra isə sentyabrın 15-i oldu. Təzədən senytabrın 15-ni senytabr ayının 1-nə gətirdik. Deyək ki, iyunun 30-da bitirdik dərsləri. 1 ay artdı. Bəs sonra? Məsələnin məzmun göstəricisi tamam ayrıdır. Hələ mən demirəm ki, bunun uşaqlara nə kimi zərərləri olacaq. Bizdə şagird sıxlığı ucbatından, müəyyən problemlərə görə şagirdlərin yüklənmə tendensiyası xarici ölkələrə nisbətdə daha çoxdur. Xarici ölkələrdə - Finlandiya, Almaniya, İspaniya, Avstriya və Danimarkada artıq bu, cəmiyyətdə norma şəklində cərəyan edir. Şagirdlər onlarda yüklənmir. Çünki tədris ilinin müddəti 11 aydır. Bizdən çoxdur. Amma bu tədris ili özü necədir? Onun keyfiyyəti uşaqları nə dərəcədə qane edir, yaxud yorur anlayışını vermək lazımdır. Mən də etiraf edirəm ki, Azərbaycanda tədris ilinin müddəti adını çəkdiyim ölkələrə nisbətdə qısadır. Yaponiyada az qala 11 aya çatır. Amma yapon şagirdi ilə bizim şagird bir deyil axı. Yaponiyada məktəbin infrastrukturu, məktəbin şagirdə verdiyi əlavə imkanlar, əlavə göstərici bir deyil. Tədris ilinin müddətini uzatmaq istəyiriksə, digər keyfiyyətləri də bir etməliyik".
Günel CƏLİLOVA
