Robert Kennedi qanmadığı şeyi danışdı - o “qədim erməni ərazisi” deyil...
Elşən Manafov: “Kennedi klanının tarixən ABŞ-dakı erməni konqresi və diasporası ilə sıx münasibətləri olub”
ABŞ-ın keçmiş prezidenti, 1963-cü ildə Dallasda qətlə yetirilən Con Kennedinin qardaşı oğlu Robert Kennedi prezidentliyə namizədliyini irəli sürərək, erməni seçicilərinə müraciətində Azərbaycanla bağlı olduqca qərəzli fikirlər səsləndirib:
“Növbəti müharibənin qarşısını almaq, azadlıq və demokratiya prinsiplərini qorumaq üçün ABŞ ermənilərin özünümüdafiə, eləcə də öz müqəddəratını təyinetmə hüququna regional dəstəyi səfərbər etməlidir. Eyni zamanda, “artsax” ermənilərinin öz “ata-baba yurdlarına” təhlükəsiz qayıtmasını müdafiə etməlidir. Bu ilin sentyabrında Azərbaycan “hücuma keçdi” və 120 min erməni əhalisini deportasiya etdi. Dünyanın diqqəti Qəzzaya və İsrailə yönəldiyi halda, “qədim erməni ərazilərindən” birinin bütün əhalisinin “kütləvi surətdə deportasiyası” barədə heç kim heç nə eşitmir”.
Kiçik Kennedi, ABŞ prezidenti postuna seçiləcəyi təqdirdə, Ermənistan və Qarabağın bərpasına “töhfə verəcəyinə” əmin edib.
Maraqlıdır, niyə ABŞ-da bəzi prezidentliyə iddialı şəxslər ermənilərə yarınmaq, onların səsini almaq üçün bu cür iftiralarla, məsuliyyətsiz açıqlamalarla çıxış edirlər?
“Yalan və qərəzli bəyanatlar verməklə erməni diasporasından ciddi maliyyə dəstəyi alacağına ümid edə bilər”
Sözügedən məsələyə aydınlıq gətirən politoloq Elşən Manafov “Bakı-Xəbər”ə açıqlamasında bununla bağlı çox maraqlı məqamlara toxundu: “Kennedini belə qərəzli məzmunlu çıxışa sövq edən bir neçə amil var əlbəttə. Əvvəla o, prezidentliyə namizədliyinin təsdiq olunması üçün ABŞ-ın 50 ştatında əhalinin say göstəricilərindən asılı olaraq seçici səsi qazanmalıdır. Ən az əhalisi olan Yuta ştatından azı 1000, ən çox əhalisi olan Kaliforniyaya qədər 219 mindən yuxarı səs toplamalıdır. Üstəlik, namizəd olaraq rüsum da ödəməlidir. Kennedi ABŞ-da məşhur Kennedi klanının üzvi olsa da, hazırda bir aparıcı və siyasi icmalçı kimi tanınır. Deməli, onun həm seçici səsinə, həm də ciddi maliyyə dəstəyinə ehtiyacı var. Digər tərəfdən, Kennedi seçkilərə müstəqil siyasətçi olaraq qatılmaq istəyir. Bu halda o həm demokratların, həm də respublikaçıların elektoral imkanlarından bəhrələnmək, səs qazanmaq istəyir. Lakin hələlik keçirilən sorğuların nəticələri göstərir ki, o, ən yaxşi halda 14% səsə ümid edə bilər. ABŞ-da siyasi isteblişmentin seçkilərə münasibəti, habelə siyasi innovasiyaların seçkilərə təsir imkanları nəzərə alınarsa. müstəqil namizədlər bu ölkədə prezident seçkilərində yalniz bir dəfə qələbə çala biliblər. O da ABŞ-ın ilk prezidenti Corc Vaşinqtondur. İndiki halda Kennedinin demokratlara yaxın olması nəzərə alınarsa, onun seçkilərə qatılacağı halda demokratların cəbhəsində səslərin respublikaçıların xeyrinə bölünəcəyi birmənalıdır. R.Kennedinin prezident seçkilərinə erməni faktorunu qabartmaqla getməsinin səbəbinə gəlincə, ilk əvvəl bu onun seçici səsinə, habelə onlarin maliyyə dəstəyinə ehtiyacı ilə izah edilməlidir. Xüsusilə Kaliforniyada Kennedinin onların səsinə ehtiyacı birmənalıdır. Digər tərəfdən seçki kompaniyası ərəfəsində ümumdünya ermənilərini məmnun edəcək bəyanatlar verməklə erməni diasporasından ciddi maliyyə dəstəyi alacağına ümid edə bilər. Ümumiyyətlə, Kennedi klanının tarixən ABŞ-dakı erməni konqresi və diasporası ilə sıx münasibətləri olub. ABŞ-dakı KİV-lər qeyd edir ki, klanın erməni diaporası ilə münasibətlərinin tarixi hələ keçən əsrin əvvəllərindən Bostondan, Massaçusets ştatından başlanır. Bu mənada Kennedi klanının tanınmış təmsilçilərindən olan Con Kennedinin erməni əsilli iş adamı Muqar ilə işbirliyində olması maraqlıdır. Bu münasibətlər sonradan ABŞ-dakı ermənilərin 1960-cı ilin prezident seçkiləri zamanı Kennedi klanının digər üzvi Con Kennedinin namizədliyinin dəstəklənməsinə gətirib çıxarıb. Maraqlidir ki, 1963-cu ildə qətlə yetirilmiş prezident Con Kennedi 1951-ci ildə Massaçusets ştatından ABŞ Konqresinə seçkilərdə erməni diasporasının elektoral və maliyyə dəstəyi ilə İcmalar Palatasının üzvi olub. Məhz onun təşəbbüsu ilə Konqresdə məşhur "erməni genosidi" ilə bağlı qətnamə qəbul olunub. O da maraqlıdır ki, dünyanı istilik, nüvə müharibəsi həddinə gətirmiş Karib böhranı zamanı ABŞ prezidenti Kennedi ilə danışıqları SSRİ adından erməni əsilli Anastas Mikoyan aparıb. Kennedinin dəfnində SSRİ-ni təmsil edən nümayəndə heyətinin rəhbəri məhz o olub. Bütövlükdə isə, Kennedinin seçkilərə qatılacağı halda qələbə çalması indiki reallıqlar şəraitində mümkün deyil. Digər tərəfdən, ABŞ-da heç bir sanballı siyasətçi bir ovuc erməniyə görə Türkiyə və Azərbaycanla münasibətlərdə radikal dəyişikliklərə səbəb ola biləcək addımlar atmayacaq. Elə ABŞ-ın özünün həyati maraqlarına görə”.
Vidadi ORDAHALLI
