Ermənistan hakimiyyətində bütün əsas fiqurlar Azərbaycanla sazişdən danışır...
Bəhruz Quliyev: “Ermənistan tərəfi sülh danışıqları prosesinə artıq məcburən hazırdır”
Ermənistan parlamentinin spikeri Alen Simonyan bəyan edib ki, sülh heç vaxt bu qədər yaxın olmayıb: “Biz sülh prosesini irəli aparırıq. Azərbaycan tərəfinin də oxşar yanaşması var. Bəzi məsələlər qalır, amma düşünürəm ki, biz bunu danışıqlar yolu ilə həll edə bilərik”.
Ölkənin xarici işlər naziri Ararat Mirzoyan da analoji mövqedən çıxış edib və deyib ki, Bakı ilə sülh üçün fürsət pəncərəsi açılıb. Mirzoyanın sözlərinə görə, Ermənistan sülhün bərqərar olması, münasibətlərin normallaşdırılması üçün Azərbaycanla xoş niyyətli və konstruktiv danışıqlar aparır: “Biz Azərbaycanla bir neçə istiqamətdə və mərhələli danışıqlar aparmışıq, konkret sülh sazişi üzərində işləyirik. Bir çoxları prosesi məntiqi sonluğa çatdırmaq üçün real imkanların olduğunu təsdiqləyir”.
Maraqlıdır, iki erməni rəsmisinin sülhlə bağlı eyni vaxtda bu cür əminliklə danışması nə deməkdir? Həqiqi irəliləyişə işarədir, yoxsa baş qatmaq?
“Hadisələri qızışdırmaqda maraqlı olan Fransa kimi dövlətlər var”
Sözügedən məsələ ilə bağlı fikirlərini “Bakı-Xəbər”lə bölüşən “SƏS” Media Qrupunun rəhbəri, politoloq Bəhruz Quliyev hesab edir ki, Ermənistan tərəfi artıq müstəqil qərar verməyi bacarmalıdır: “Ermənistan tərəfi sülh danışıqları prosesinə artıq məcburən hazırdır. Son dövrlər erməni parlamentarilər müxtəlif mətbu orqanlarda, tribunalarda, müsahibələrində açıq şəkildə etiraf edirlər ki, sülhə getməlidirlər. Birincisi, onların başqa çıxış yolu yoxdur. İkincisi, rəsmi İrəvanın rifahı məhz regiondakı layihələrə qoşulmaqdan keçir”.
Politoloq B.Quliyevin sözlərinə görə, Ermənistanın indiki rəhbərliyi də artıq dərk edir ki, reallığı görmək və Azərbaycanla sülh danışıqlarına getmək vacib amil olaraq qalır: “Bu yaxınlarda hərbiçilərin dəyişdirilməsi prosesi həyata keçirildi. Burada əsas konseptual məqsəd etimad mühiti yaradaraq regionda sülhə nail olmaqdır. Bu mənada manipuliyasiyalara yol verilməməli, prosesə zərər vuran ritorikadan çəkinməliyik. Hesab edirəm ki, əsirlərin dəyişdirilməsi sülh danışıqlarına gedən yolu daha da tezləşdirdi. Bütün bunlarla yanaşı, Ermənistan Baş naziri Nikol Paşinyan özü də loyal formada sülhə getməyin vacib olduğunu bildirir. Bir sözlə, onlar artıq reallığı başa düşüb. Digər tərəfdən, hadisələri qızışdırmaqda maraqlı olan Fransa kimi dövlətlər var. Onlar artıq bu münaqişə ilə siyasi manipulyasiya etmək istəyirlər. Ermənistan onsuz da illərlə forpost olub. Onlar forpostluqdan çıxmaq üçün müstəqil qərar verməyi bacarmalıdırlar. Prezident İlham Əliyevin açıq şəkildə Qərbi Azərbaycanla, İrəvanın ata-baba yurdumuz olması ilə bağlı səsləndirdiyi fikirlər Ermənistanı təlaşa salıb. Onlar 44 günlük Vətən müharibəsindən dərs götürüblər. Çünki bilirlər ki, cənab İlham Əliyev hansısa sözü dedisə, onu dərhal həyata keçirəcək. Prezidentimizin sözü ilə əməli hər zaman üst-üstə düşüb. Ona görə də Paşinyan bəzi məqamlarda Azərbaycan ərazisini tanıdığını bildirir. Ermənistan tərəfi dərk edir ki, Azərbaycan gec-tez öz ata-baba yurdu olan bu torpaqlara da nail olacaq”.
Vidadi ORDAHALLI
