Azərbaycan-Ermənistan prosesində Fransa heç bir rol ala bilmədi - tam fiaskonun səbəbi...
Sahil Kərimli: “Fransanın Azərbaycanla bağlı siyasəti daim düşməçikik və ikili standartlar üzərində qurulub”
Tarixi boyu müstəmləkəçi ölkə kimi tanınan, beynəlxalq aləmdə nüfuzunu günbəgün itirən Fransa özünü demokratiyanın mərkəzi hesab etsə də, bunun tam əksinə siyasət yürüdür.
ATƏT-in keçmiş Minsk qrupunun həmsədr ölkəsi olaraq Azərbaycan ilə Ermənistan arasında münaqişənin həllinə deyil, uzadılmasına səy göstərən, İkinci Qarabağ müharibəsindən sonra da ölkəmizin qalibiyyəti ilə barışmayaraq Cənubi Qafqazda sabitliyin bərqərar olmasına imkan verməyən Fransa Ermənistanla ortaq mövqe nümayiş etdirərək yeni münaqişə ocağı yaratmaq üçün bütün imkanlarını səfərbər edib.
Tarixi müstəmləkəçilik siyasəti ilə ləkələnmiş Fransa bu gün də işğalçı Ermənistana qol-qanad gərməkdə davam edir. Cənubi Qafqazda sülhə, sabitliyə nail olmaq üçün geniş şərait yaranması rəsmi Parisi çox narahat edir. Hətta dünya ölkələri arasında Azərbaycanın humanist siyasət yürüdən, etibarlı tərəfdaş kimi tanınması 3 ildir ölkəmizin əleyhinə ardı-arası kəsilməyən qərəzli qətnamələr qəbul edən rəsmi Parisi respublikamızda casus şəbəkəsi yaratmağa belə vadar edib.
Fransanın Azərbaycan-Ermənistan normallaşmasında rəsmi rol almaq, vasitəçi statusu qazanmaq səyləri tam iflasa uğradı. Fransa nəyi düz etmədi? Niyə iflasa uğradı?
Siyasi şərhçi Sahil Kərimli “Bakı-Xəbər”ə açıqlamasında bildirdi ki, Fransanın Azərbaycandakı səfiri Ann Buayon dekabrın 26-da Xarici İşlər Nazirliyinə çağırılıb: “Səfirliyin iki əməkdaşının diplomatik statuslarına uyğun olmayan və “Diplomatik əlaqələr haqqında” 1961-ci il Vyana Konvensiyası ilə ziddiyyət təşkil edən fəaliyyətinə görə Azərbaycan hökuməti tərəfindən “persona-non-grata” (arzuolunmaz şəxs) elan olunduğu Fransa səfirinin diqqətinə çatdırılıb, həmin şəxslərin 48 saat ərzində Azərbaycan ərazisini tərk etməsi tələb edilib və XİN-in müvafiq notası Fransa səfirinə təqdim edilib. Fransanın Azərbaycanla bağlı siyasəti daim düşməçikik və ikili standartlar üzərində qurulub. Bu, özünü son illərdə daha kəskin büruzə verir. 44 günlük Vətən müharibəsi və ondan sonrakı dönəmdə Fransa daim riyakar siyasətini davam etdirib. İşğalçılığı dəstəkləyib, Ermənistanı müdafiə etməklə həm siyasi, həm iqtisadi, həm də silah-sursat verməklə İrəvana hərbi dəstəyini verib. Bütün bunlar Cənubi Qafqazda gedən siyasəti daha da qəlizləşdirməyə hesablanıb və təhlükəsizliyə böyük təhdidlər yaradıb. Bu da Azərbaycan dövlətinin haqlı-ədalətli siyasəti nəticəsində dəf edilib. Fransanın Azərbaycanla bağlı siyasəti konkret olaraq iflasa uğrayıb. Fransa əvvəlcə BMT-də bizə qarşı qətnamə qəbul etdirməyə çalışıb. Buna nail ola bilmədi. Sonra Azərbaycanın xüsusi xidmət orqanları həmin ölkənin kəşfiyyat, təxribat və pozuçuluq fəaliyyəti ilə məşğul olan dəstəsini ifşa etdi. Bütün bunları Fransanın məkrli siyasətinin tam ifşası kimi qəbul etmək olar. Fransa Azərbaycanla bağlı siyasətində böyük səhvlərə yol verib. Ən başııcası isə, Azərbaycanın dövlətçilik və milli maraqlarına qarşı çıxışlar edib. Təbiidir ki, belə ölkənin vasitəçilik səyləri də səmimi ola bilməzdi. Çünki vasitəçilik obyektivlik tələb edir. Fransa isə Ermənistanı açıq müdafiə etdiyi üçün özünü neytral apara bilmədi”.
Məhəmmədəli QƏRİBLİ
