4 vilayət Rusiyaya, Ukrayna NATO-ya verilir - Qərb-Rusiya sövdəsi aşkara çıxır...
Elxan Şıxəliyev: “Ukrayna masaya oturmasa, burada hökümət dəyişikliyi də mümkündür”
Rusiya prezidentinin mətbuat katibi bəyan edir ki, Vladimir Putin danışıqlara hazırdır, ancaq yalnız Rusiyanın məqsədlərinə çatmaq üçün addımlar atır.
Dmitri Peskov Amerikanın “Nyu York Tayms” nəşrinin Rusiya prezidentinin qeyri-rəsmi kanallar vasitəsilə mövcud təmas xəttini qoruyaraq Ukraynada atəşkəslə bağlı danışıqlar aparmağa hazır olduğu barədə yazılan məqaləsini bu cür şərh edib.
Qəzet yazıb ki, bu məlumatı Kremlə yaxın olan iki keçmiş məmurdan, həmçinin Putinin emissarından mesaj alan amerikalı və beynəlxalq yüksək rütbəli məmurlardan alıb.
Məqalədə deyildiyinə əsasən, danışıqlara başlamaq üçün Putinin öz qələbəsini elan etməsi vacibdir. Bununla yanaşı nəşr yazır ki, “Rusiyanın işğal olunmuş Zaporojye, Xerson, Donetsk və Luqansk vilayətləri ilə bağlı iddiaları, Zelenski administrasiyasının devrilməsi, eləcə də Ukraynanın NATO-ya üzv olmaması kimi məsələlər Putin üçün fundamental tələblər deyil”.
Eyni zamanda, nəşr qeyd edir ki, ABŞ-ın heç vaxt Ukrayna adından Rusiya ilə danışıqlar aparmaması Amerika tərəfi üçün problemdir və Vaşinqton bunu etmək istəmir.
Ola bilərmi ki, ABŞ işğal olunmuş 4 vilayətinin Rusyada qalması və Zelenskinun hakimiyyətini qoruması müqabilində atəşkəs əldə etmək və bundan sonra Ukraynanı NATO-ya qəbul etmək niyyəti ilə manipulyasiya edir?
Hərbi-siyasi şərhçi, ehtiyatda olan polkovnik-leytenant Elxan Şıxəliyev “Bakı-Xəbər”ə açıqlamasında bildirdi ki, Rusiya-Ukrayna müharibəsi iki aydan sonra iki ilinə gəlib çatmış olacaq: “Müharibələrin tərəflər olaraq siyasi və hərbi hədəfləri olur. Bunun üzərindən indiki vəziyyəti qiymətləndirməliyik. Əslində Rusiyanın siyasi-hərbi hədəfi Ukraynanın denasifikasiyası və demilitarizasiyası idi. Yəni məqsəd Ukraynada nasistləri məhv etmək, ya da ölkədən çıxarmaq, buranı silahsızlaşdırılmış bir bölgəyə çevirmək idi. Bunun üzərindən Rusiyanın siyasi - hərbi hədəfləri əməliyyatlar səhnəsində müharibənin gedişatında hansı istiqamətdə olması idi. Ən azından, Rusiya bu gün Ukraynanın 20 faizə qədər ərazisini nəzarətə götürmüş sayılır. Xüsusən də Donetsk, Zaporojye, Krım istiqamətini nəzərə alsaq, müharibənin gedişatında taktiki səviyyədə Rusiya müharibəni lehinə çevirmiş görsənir. Yəni artıq əməliyyatlarda taktiki qruplar səviyyəsində ruslar hücum edir, ukraynalılar müharibə etmək məcburiyyətində qalır. İndi bu siyasi - hərbi hədəflərini Rusiya yerinə yetirə bilir, ya bilmir, bu sual altındadır. Ukraynanın siyasi - hərbi hədəfləri nədən ibarət idi? Ukrayna 91-ci ilin sərhədlərinə çıxaraq, öz ərazi bütövlüyünü bərpa etmək istəyirdi. Həmçinin, Rusiya silahlı qüvvələrini də ərazilərindən çıxarmaq istəyirdi. Ukrayna da bu hədəflərinə nail ola bilmir. Ona görə də indi müharibənin güc nisbəti Rusiyanın lehinə çevrildiyi üçün, artıq Ukraynanı dəstəkləyən güclər, xüsusən də Pentaqon, Şimali Atlantikaya daxil olan ölkə rəhbərləri ABŞ-ın rəhbərliyində Ukraynanın planlarının baş tutmadığını gördü. Bütün planlar Ukraynanı dəstəkləmək üzərindən qurulmuşdu. Ortalama hərbi - iqtisadi güc Ukraynanı əməliyyatlar səhnəsində, müharibədə dəstəkləyirdi. Bu güclər gördülər ki, bu dəstəkləmənin arxasındakı məqsəd Ukraynanın üzərindən Avropa İttifaqının təhlükəsizliyini təmin etmək olsa da, digər niyyətləri Rusiyanı daxildə təslimçi bir vəziyyətə gətirməkdən ibarət idi. Bu planlar baş tutmadı. Ukrayna müharibədə uğurlu olmadığı üçün, indi bu güclərin Rusiyanı masada görmək istəkləri artıb. Əslində, Rusiya da bunu hiss etdi ki, Ukraynanı dəstəkləyən güclər Kremlə mesajlar göndərir. Ona görə də, Rusiya öz istəklərinin plankasını qaldıracaq masada karlı çıxmaq üçün. Rusiya prezidentinin reytinqi də çox yüksəkdir. Ukrayna da hiss etdi ki, böyük güclər bir yerə qədər onu dəstəkləyəndən sonra, davamını gətirə bilmirlər. ABŞ 110 milyard dollarlıq paketi konqresdən keçirə bilmədi. Avropa İttifaqı Ukraynaya 54 milyard dollar yardım nəzərdə tutmuşdu, onu da Macarıstan blokladı. Çox böyük şəxsi heyət itkiləri də var. Bütün bunlar da Qərb tərəfdaşlarında tərəddüd yaratdı. Rusiya-Ukrayna müharibəsi də bitəcək. Görünən odur ki, Rusiya Ukraynanı dəstəkləyən böyük gücləri məyus etdi. Rusiya müharibə dövründə həm iqtisadi, həm də siyasi gücünü qoruyub saxlaya bildi. Ona görə də, müharibənin bu vəziyətinin davamı Ukraynanı dəstləkləyən güclərin Ukraynanı masaya sövq etməsinə səbəb olacaq. Ukrayna prezidenti buna maksimum dirənir. Qərb tərəfdaşları ona maksimum dəstək versələr, Ukrayna siyasi - hərbi hədəflərinə çata bilər. Ancaq dəstəkləyənlər də gördülər ki, Ukrayna əks-hücum əməliyyatlarında da heç nə edə bilmədi. Ona görə də məyus oldular. Ukrayna masaya oturmasa, burada hökümət dəyişikliyi də mümkündür. Müharibəni sonlandıra biləcək birinin hakimiyyətə gətirilməsi də mümkündür. Düşünürəm ki, Rusiyanın müharibəni 2026 - ci ilə qədər apara bilərik deməsi də onun hələ də gücünün olduğunu göstərir. İndiki mərhələdə Ukraynanın daha çox masada oturmağa, atəşkəs istəməyə ehtiyacı var”.
Məhəmmədəli QƏRİBLİ
