Paşinyan ölkənin yeni "demoqrafik strategiyasını" hazırlatdırır...
Ramiyyə Məmmədova: “Paşinyanın açıqladığı hədəflər, strategiya absurdluğun da fövqündə dayanan düşüncədən o tərəfə getmir”
Nikol Paşinyanın rəhbərliyi ilə məsləhətləşmə keçirilib və bu məsləhətləşmə zamanı Ermənistanın demoqrafik strategiyasının layihəsinin hazırlanması ilə bağlı müzakirələr davam etdirilib.
Əvvəlki müzakirələr nəticəsində görülmüş işlər, strategiyanın məqsədləri və ondan irəli gələn planlar və tədbirlər təqdim edilib.
Sonra məsləhətləşmə iştirakçıları layihə ilə bağlı fikir mübadiləsi aparıb, strategiyanın məqsədləri və gözlənilən tədbirlərlə bağlı öz müşahidələrini təqdim ediblər:
“Bu bizim əsas strategiyamızdır, çünki son nəticədə məqsədimiz Ermənistanda yaşayan insanların özlərini rahat hiss etmələridir. Əsasən bizim bütün strategiyalarımız və siyasətlərimiz böyük ölçüdə buna yönəlib”.
Nikol Paşinyan strategiya layihəsi ilə bağlı aparılmış müşahidələri və maraqlı tərəflərin müzakirələrini əsas götürərək layihədə müvafiq düzəlişlərin edilməsini tapşırıb.
Paşinyanın hazırlatdığı ölkənin yeni "Demoqrafik strategiyası” perspektiv üçün nə vəd edir?
Politoloq Ramiyyə Məmmədova “Bakı-Xəbər”ə açıqlamasında bildirdi ki, Nikol Paşinyanın xəyal dünyası zəngindir və utopik ideyaları sosial gərginlikdən sarsılmış erməni xalqına sırımağa çalışır:
“Nikol Paşinyan ölkəsində mövcud durumdakı sosial problemlərin həlli, yaranan ağır iqtisadi vəziyyətdən, demoqrafik böhrandan çıxış yolları axtarmaq əvəzinə yenidən populizmə əl atır. İşğalçı siyasətin gətirdiyi sarsıdıcı böhran Ermənistanı labirintin içinə saldığı məqamda Paşinyan 2050-ci ilədək qarşıya qoyulan hədəfləri açıqlayır. Onun fikrincə, Ermənistan hökumətinin 2050-ci ilə qədərki strategiyasının ideyası milli dəyərlərə, milli hədəflərə və ictimai tələbata əsaslanır.
Nikol Paşinyan bildirir ki, 2050-ci ilədək Ermənistan əhalisinin sayını 5 milyona çatdırmaq hədəf kimi qarşıya qoyulub.
1990-cı ildən Ermənistan əhalisi sürətlə azalır, hazırda ölkədə 3 milyona yaxın əhali var. Ermənistanda orta yaş 35,4 ildir. BMT-nin İqtisadi və Sosial Münasibətlər Departamentinin əhali bölgüsü haqqında açıqlamasına görə, 2050-ci ildə Ermənistan əhalisinin sayı təxminən 2 milyon 397 min nəfər olacaq. BMT-nin proqnozlarına əsasən, Ermənistanda əhali sayı ən nikbin halda üç milyona yaxınlaşa bilər.
BMT hesab edir ki, 2015-2020-ci illər ərzində hər min nəfərə düşən təbii artım göstəricisi 14,5 olduğu halda, 2045-2050-ci illərdə bu rəqəm 9,6-ya enəcək.
Dünya Bankının məlumatlarına əsasən, 2019-cu ildə Ermənistanda hər qadına 1,6 doğuş düşüb. Bu isə Ermənistanı doğum sayına görə kateqoriyada axır sıralara salır.
Dünya Bankının proqnozlarında qeyd edilir ki, Ermənistan əhalisi 2050-ci ilə qədər təxminən 10 faiz azalaraq 2,7 milyona düşəcək. Ermənistanda sonsuzluq nisbəti də yüksək səviyyədədir. BMT-nin Əhali Fondunun 2014-cü ildə apardığı tədqiqatlara əsasən, Ermənistanda qadınlar arasında sonsuzluq nisbəti müəyyən edilib.
Ermənistanda əhalinin sayının azalmasına təsir göstərən amillərdən biri də işsizlik və sosial gərginlikdən doğan miqrasiyadır.
Ölkədə ölüm sayı doğum sayını ildən-ilə üstələyir, nikahların sayı azalır.
Demoqrafik böhran fonunda Paşinyanın dedikləri absurd və gülünc təsir bağışlayır.
Ümumiyyətlə, Paşinyanın bu qədər iddialı hədəflərə çıxış etməsi müasir geosiyasi və iqtisadi şərtlər çərçivəsində reallıqla səsləşmir.
Paşinyanın açıqladığı hədəflər, strategiya absurdluğun da fövqündə dayanan düşüncədən o tərəfə getmir”.
Məhəmmədəli QƏRİBLİ
