Lənkəranın “daşa dirənmiş” yol problemi...
Lənkəranda bu gün əhalini narazı salan baxımsız yollar, küçələr çoxdur. İllərlə təmir üzü görməyən, cala-çuxurları saya gəlməz yollarda hərəkət etmək qeyri-mümkündür. Payızın palçığından, yayın toz-torpağından heç danışmağa dəyməz. Yaranan ağır vəziyyətdən camaat əziyyət çəksə də, elə bil baxıb-görməyə aidiyyəti qurumların gözləri tutulub.
Paşa Təhməzov küçəsi şəhərin ən münasib yerində olsa da, yararsız haldadır. Örtüyü dağılıb, üstündəki çuxurların sayı da bilinmir. Artıq dağılmış küçəni gedib-gəlmək adamı tam əldən salır. Üstü açıq qalmış xəndək avtomobillərin hərəkətinə təhlükə yaradır. Yol ikitərəfli nəzərdə tutulsa da, iki avtomobil üzbəüz gəldikdə çıxılmaz vəziyyət yaranır. Yolu keçmək üçün mütləq avtomobillərin biri ya çuxura, ya da xəndəyə düşməlidir.
İndi bəziləri elə başa düşər ki, rayonda vəzifə başında duranların bundan xəbəri yoxdur. Xeyr, vəziyyəti yaxşı bilirlər. Dəfələrlə onlara bu barədə müraciətlər olub. Sadəcə özlərinə əziyyət vermək istəmirlər. Bir də onlar tutduğu vəzifəyə Sabir demişkən belə yanaşırlar: Qoy mən tox olum, özgələr ilə nədi karım, Dünyavü cahan aç olur olsun, nə işim var?!
Onu da deyim ki, bir balaca yağış yağanda Lənkəranın küçələrini, həyətlərini su basır. Çünki burada kanalizasiya sistemi bərbad haldadır. 70-ci illərdə qurulan, cəmi 20 min nəfər üçün nəzərdə tutulan bu sistem müasir dövrün tələblərindən çox geri qalır. Həmçinin əvvəllər şəhər ərazisində açıq və qapalı kanalizasiya şəbəkəsi fəaliyyət göstərib. Son illər kimlərinsə məsuliyyətsiz əməlləri hesabına onların tutulması problemi qəlizləşdirir. Problemi düşünüb əməli bir ış görən yoxdur.
Əhalinin daha bir narahatlığı şəhərdəki Etibar Əliyev və Mir Mustafa xan küçələrinin kəsişdiyi yerdə piyada zolağın silinməsi və piyada keçid nişanının olmamasındandır. Bu, hər an sürücüləri, piyadalari ölümcül təhlükə qarşısında qoya bilər. Bununla bağlı sakinlər tərəfindən səlahiyyət sahiblərinə bildirilsə də, təhlükəli vəziyyət olduğu kimi qalır.
Lənkəranın kəndlərində olan keçilməz yollardan da gileylər bitmir. Uzun illər təmirsiz qalan yollar əhalinin tələbatını ödəmir. Rayonun ən iri yaşayış məntəqəsi Cil kəndinin camaatı deyir ki, illərdir bir yerə getməkdə əziyyət çəkirlər. Yolları öz hesablarına bir neçə dəfə təmir etsələr də, yenə də pis gündədir. Üst örtüyü dağılıb, gediş-gəlişə yararsızdır. Yolu qaydaya salmaqdan ötrü onlar dövlətdən kömək istəyir.
Zəfər ORUCOĞLU
Azərbaycan Jurnalistlər Birliyinin üzvü
