Ümid qaldı məktəblərin "optimallaşdırılmasına"...
Elşən Qafarov: “Əsas məqsəd təhsilalanın yaşadığı ərazidə tam orta təhsil alması üçün müvafiq şəraitin yaradılmasıdır”
“2024-cü ilin fəaliyyət planında məktəblərin optimallaşdırılması nəzərdə tutulub”. Bunu Məktəbəqədər və Ümumi Təhsil üzrə Dövlət Agentliyinin rəhbəri Eşqi Bağırov media nümayəndələrinə açıqlamasında deyib.
O bildirib ki, burada bəzi məktəblərin birləşdirilməsi, bəzilərinin ləğvi, bəzilərinin ümumi ortadan tam ortaya keçidi nəzərdə tutulur: "Bu il də bənzər addımlar atılıb. Bir neçə məktəbə ibtidai sinifdən qəbulu dayandırmışıq. Yalnız yuxarı siniflərdə qəbul aparılıb. Bu, xüsusən böyük qayıdışla əlaqədar məcburi köçkün məktəblərini əhatə edir".
Məktəblərin optimallaşdırılması bu sahədə problemləri həll edəcəkmi? Ümumiyyətlə, hansı ərazilərdəki məktəblər birləşdiriləcək?
“Əhalinin sıx olduğu yerlərdə yeni məktəblərin tikintisi ilə yanaşı şagird sayının kəskin azalmasına səbəb ola bilər”
Təhsil eksperti Elşən Qafarov “Bakı-Xəbər”ə açıqlamasında bildirdi ki, “Azərbaycan Respublikasında təhsilin inkişafı üzrə Dövlət Strategiyası”nda təhsil müəssisələrinin rasionallaşdırılması nəzərdə tutulur: “Məlumat üçün deyim ki, eyni ərazidə elə məktəblər var ki, orada şagird sayı azdır. Bir kənddə yerləşən bir neçə məktəbdə şagird sayı kəskin azalıb, eyni ərazidə yerləşdiyi üçün həmin məktəblərin birləşdirilməsi nəzərdə tutulur. Eyni zamanda, tam orta təhsili təmin etmək üçün ümumi orta məktəblərin tam orta təhsil məktəblərinə çevrilməsi də həmin ərazidə olan ehtiyacdan irəli gəlir”. Ekspert bildirdi ki, əsas məqsəd təhsilalanın yaşadığı ərazidə tam orta təhsil alması üçün müvafiq şəraitin yaradılmasıdır. Bununla bağlı işlər görülərkən, addımlar atılarkən ilk növbədə məktəbin yerləşdiyi ərazi və tələbat öyrənilir. Bu kimi işlər araşdırıldıqdan sonra qərar qəbul edilir.
E.Qafarovun sözlərinə görə, məktəblərin optimallaşdırılması ilə bağlı islahatlar davam edir: “Hesab edirəm ki, əhalinin sıx olduğu yerlərdə yeni məktəblərin tikintisi ilə yanaşı, şagird sayının kəskin azalmasına səbəb ola bilər. Həmçinin, birdən çox məktəbə ehtiyac duyulmayan yerlərdə məktəblər birləşdirilə bilər. Bu normal haldır”.
Günel CƏLİLOVA
