Azərbaycanın COP29 qələbəsi Fransanı da sındıracaq...
Yadigar Məmmədli: “Məlum oldu ki, heç də bütün dövlətlər Fransa kimi düşünmür”
BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasının - COP29-un gələn il ölkəmizdə keçirilməsi ilə əlaqədar Prezident İlham Əliyevin sədrliyi ilə keçirilən müşavirədə ölkə başçısı tədbirin önəmi ilə bağlı bir sıra məqamlara toxundu.
Dövlət başçısının fikrincə, bu hadisənin önəmi, o cümlədən ondadır ki, bu qərar antiterror əməliyyatından iki ay yarım sonra qəbul olunub: “Və beləliklə, bir daha bütün dünya ictimaiyyəti Azərbaycana öz dəstəyini ifadə etmişdir. Onu da bildirməliyəm ki, Bakıda COP29 konfransının keçirilməsi beynəlxalq aləmin hər bir üzvünün razılığı ilə mümkün olmuşdur. Yəni, burada yekdil mövqe bir daha özünü göstərdi. Düzdür, antiterror əməliyyatından sonra bəzi Qərb ölkələri Azərbaycana əsassız ittihamlar irəli sürmüşdür. Bəzi Qərb ölkələri, onların arasında təbii ki, ənənəvi olaraq Fransa bununla barışmaq fikrində deyil. Halbuki artıq beynəlxalq birlik də görür ki, hətta Ermənistan bu vəziyyətlə barışıb və COP29 konfransının keçirilməsi bunu bir daha göstərir. Ancaq Fransada bəzi siyasi liderlər ermənilərdən daha çox erməni olmağa çalışırlar. Ancaq onlar da bu vəziyyətlə barışmağa məcbur olacaqlar”.
“Dəstəkləməsəydilər, belə möhtəşəm tədbirin Azərbaycanda keçirilməsinə razılıq verməzdilər”
Sözügedən məsələ ilə bağlı fikirlərini “Bakı-Xəbər”lə bölüşən media eksperti Yadigar Məmmədli hesab edir ki, Fransa bununla bağlı Azərbaycana mane ola bilməyəcək: “Əvvəla, BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasının - COP29-un gələn il Azərbaycanda keçirilməsi çox ciddi hadisəditr. O səbəbdən ki, Azərbaycan bütün ərazilərində suverenliyini təmin edəndən sonra nüfuzu daha da artıb. Tamamilə fərqli və yeni reallıq yaranıb. Bəli, bir sutkalıq antiterror əməliyyatlarından sonra bəzi Qərb ölkələrində, oradakı dairələrdə Azərbaycana xoş olmayan bir münasibət vardı. Bunların da başında Fransa dururdu. Fransa bütün vasitələrlə çalışırdı ki, Avropa İttifaqı, müəyyən beynəlxalq təşkilatlar Azərbaycana qarşı sanksiyalar qəbul etsinlər. Ancaq çox keçmədən daşlar yerinə oturdu və məlum oldu ki, heç də bütün dövlətlər Fransa kimi düşünmür. Dünya dövlətləri Azərbaycanın öz suverenliyini təmin etməsini dəstəkləyirlər. Dəstəkləməsəydilər, belə möhtəşəm tədbirin Azərbaycanda keçirilməsinə razılıq verməzdilər. Ona görə də Fransadakı dairələrin buna mane olmaq cəhdləri bir nəticə vermədi. O üzdən, düşünmürəm ki, bundan sonrakı dövrdə Fransa ölkəmizə qarşı hansısa maneə törədə bilsin. Azərbaycan dünyada yeni çağırışlara cavab verir”.
Vidadi ORDAHALLI
