İşlə təminat üçün Füzulidə əmək yarmarkaları keçirilir - Millət vəkili...
Vüqar Bayramov: “İlin sonuna qədər 2000 vətəndaşımızın məskunlaşacağı gözlənilir”
44 günlük Vətən müharibəsində qazandığımız Zəfər regionun reallıqlarını dəyişdirməsi ilə yanaşı, məcburi köçkünlərimizin də 30 ilə yaxın yurd həsrətinə son qoydu. Vətəndaşlarımızın doğma torpaqlarına qayıtmasına imkan yarandı.
İşğaldan azad edilmiş ərazilərdə quruculuq işlərinin görülməsi, “Böyük Qayıdış” prosesinin sürətləndirilməsi gücümüzü, məqsədimizi, birliyimizi, xalqımızın böyüklüyünü bir daha göstərir. Ali Baş Komandanın qətiyyətli mövqeyi, xalqımızın birliyi və ordumuzun əzmi ilə ölkəmiz istədiyi bütün hədəflərə nail ola bilmə bacarığına sahibdir.
Bu gün işğaldan azad edilmiş ərazilərimizdə yeni ab-hava var. Bu istiqamətdə yeni layihələr və planlar həyata keçirilir. Azad edilən rayon və şəhərlərdə genişmiqyaslı və intensiv işlər aparılır. Mənfur düşmənin əsarətindən xilas olan bütün yurd yerlərimizə yenidən həyat verilir. Düşmən üzərindəki tarixi Qələbəmizdən sonra ölkə başçısı dəfələrlə işğaldan azad edilmiş ərazilərə səfərlər edərək bildirib ki, Qarabağda bütün infrastruktur bərpa olunacaq. İndi həmin ərazilərdə tikinti-abadlıq, yenidənqurma işləri geniş vüsət alıb.
Ölkənin müxtəlif ərazilərində yataqxana, sanatoriya, pioner düşərgəsi, yarımçıq tikililər və inzibati binalarda müvəqqəti məskunlaşmış ailələrdən ibarət növbəti köç karvanı Qaradağ rayonundan yola salınıb. Bu mərhələdə Füzuli şəhərinə bu gün (dünən) 22 ailə - 94 nəfər köçürülüb. Xatırladaq ki, indiyədək Füzuli şəhərində 380 ailənin, yəni 1392 nəfərin daimi məskunlaşması təmin edilib.
“Məskunlaşma prosesi ilə yanaşı, vətəndaşların işlə təminatı məsələsi də diqqətdə saxlanılır”
Füzuliyə geri qayıdış barədə əslən Füzuli şəhərindən olan millət vəkili Vüqar Bayramovla həmsöhbət olduq.
- Məlumdur ki, Füzuli şəhərinə qayıdışa start verilir. Bu haqda nə deyərdiz?
- Füzuli şəhərində məskunlaşma Qarabağa Böyük Qayıdışın başlanğıcıdır. Bu gün 22 ailə yeni qurulan Füzuli şəhərində mənzil sahibi oldu. Məskunlaşma prosesi intensiv şəkildə həyata keçirilir. İlin sonuna qədər 2000 vətəndaşımızın məskunlaşacağı gözlənilir.
- Füzuliyə geri qayıdan vətəndaşların işlə təminatı hansı səviyyədədir?
- Təbii ki, məskunlaşma prosesi ilə yanaşı, vətəndaşların işlə təminatı məsələsi də diqqətdə saxlanılır. Vətəndaşların işlə təminatı üçün Füzuli və digər şəhərlərdə əmək yarmarkaları keçirilir. Onu da deyim ki, Qarabağda məskunlaşan vətəndaşlarımızın bir qismi artıq dövlət qurumlarında, o cümlədən infrastruktur layihələrində də işlə təmin olunublar. Məskunlaşma geniş vüsət aldıqca özəl sektorun həmin ərazilərdə xidmət göstərməsi daha da böyüyəcək. Bu da yeni iş yerlərinin yaradılması baxımından vacibdir. Bütövlükdə məskunlaşmada məşğulluğun təminatı prioritetdir. Məlumat üçün deyim ki, bununla bağlı Prezident İlham Əliyev tərəfindən xüsusi göstəriş və tapşırıqlar var. Bu səbəbdən də öz doğma yurdlarına geri qayıdan vətəndaşların işlə təminatı prioritet olaraq qalacaq.
- Gələn il Füzuli şəhərində məskunlaşma daha intensiv olacaqmı?
- Fasiləsiz olaraq Füzuli şəhərində yaşayış binlarının inşa edilməsi artıq ondan xəbər verir ki, Füzuli şəhər sakinləri daha qısa vaxtda öz ata-baba yurdlarına qayıdır və qayıda biləcəklər. Gələn ilin əvvəlindən etibarən Füzuli şəhərində məskunlaşmanı daha intensiv müşahidə edə biləcəyik. Ümumiyyətlə, Füzuli rayonunun bərpa edilməsi ilə bağlı artıq tədbirlər planı var və həmin tədbirlər planına əsasən, 2026-cı ilədək ilkin bərpa ediləcək kəndlərin siyahısı dəqiqləşdirilir. Bu istiqamətdə, xüsusən də minalardan təmizləmə ilə bağlı işlər davam edir. Ona görə də çox qısa zamanda uzun müddət məcburi köçkün həyatı sürən vətəndaşlarımız Füzuli şəhərinə və digər kəndlərinə qayıtmaq imkanə əldə edəcəklər.
Onu da deyim ki, 2024-cü ildə məskunlaşmanın coğrafiyası genişləndiriləcək, Şuşa və Ağdam şəhərlərində də məskunlaşmanın olacağı gözlənilir. Buna paralel olaraq məşğulluğun miqyası da genişlənir. Vətəndaşlarımızın ixtisas və peşələrinə uyğun işlə təmin olunması “Böyük Qayıdış”ın mühüm tərkib hissəsidir. Azad olunmuş ərazilərdə məşğulluğun təmini növbəti illər üçün də əsas hədəflər sırasında qalacaq.
- Füzulidə Özbəkistanın dəstəyi ilə orta məktəb inşa edilib…
- Bəli, Fizulidə Özbəkistanın dəstəyi ilə qurulan orta məktəbin inşası başa çatıb. Hər iki ölkənin dövlət başçılarının iştirakı ilə açılış olub. Bu, Özbəkistanın Azərbaycanın qələbəsinə dəstəyidir. Həmin məktəbdə şagird və müəllim sayının təminatında heç bir problem olmayacaq. Artıq bu istiqamətdə işlər gedir. Sentyabrın 15-də Füzulidə 30 ildən sonra ilk zəng səslənəcək. Bütün bunlar ondan xəbər verir ki, Füzuli rayonunda intensiv şəkildə məskunlaşma reallaşmaqdadır. Son olaraq deyim ki, ilk dəfə olaraq sakinlərimiz Dünya Azərbaycanlılarının Həmrəylik gününü və Yeni ili öz doğma torpaqlarında qeyd edəcəklər.
Günel CƏLİLOVA
