Bakı Təşəbbüs Qrupu 4 həmlə ilə Fransanın nüfuzunu yerə sürtdü...
Rauf Zeyni: “BMT-nin Təhlükəsizlik Şurasının 5 daimi üzvünün kimlərdən ibarət olduğu, onların əsl mahiyyətinin nədən ibarət olduğunu bəşəriyyətə çatdırmaq çox vacibdir”
BMT-nin Cenevrə ofisində Bakı Təşəbbüs Qrupunun (BTQ) təşkilatçılığı ilə “Neokolonializm: İnsan hüquqları, sülh və təhlükəsizlik” mövzusunda beynəlxalq konfrans işə başlayıb.
Konfransda çıxış edən Fransanın keçmiş və indiki koloniyalarından gələn təmsilçilər rəsmi Parisin bu ölkələrdə hələ də davam etdirdiyi yeni kolonializm siyasətinin ağır fəsadları barədə məlumat veriblər.
Xüsusilə qeyd olunub ki, Fransa keçmiş müstəmləkələrinin daxili işlərinə kobud şəkildə müdaxilə edir, bu ölkələrdə stabilliyin pozulması siyasəti həyata keçirir, eyni zamanda hazırda müstəmləkə altında saxladığı ölkələrdə fundamental insan hüquqlarını kobud şəkildə pozur, bu xalqların təbii sərvətlərini qanunsuz olaraq istismar edir.
Bildirilib ki, təbii ehtiyatlarla zəngin bu ölkələrin xalqları materik Fransasından qat-qat çətin şəraitdə yaşayır, işsizlik və yoxsulluq səviyyəsi dəfələrlə yüksəkdir. Fransanın bu ərazilərdə həyata keçirdiyi nüvə sınaqları, uranın zənginləşdirilməsi istiqamətində fəaliyyəti əhalinin səhhətində ciddi fəsadlar yaradıb, ətraf mühitə böyük ziyan vurub. Süni şəkildə yerli xalqların assimilyasiya edilməsi siyasəti və qeyri-qanuni miqrantların bu ərazilərə köçürülməsi davam etdirilməklə yerli xalqların müstəqillik uğrunda mübarizəsinə zərbə vurmağa çalışılır.
Qeyd edək ki, Konfransda ABŞ, Böyük Britaniya, Fransa, Türkiyə, İsveçrə, Əlcəzair, Pakistan, Serbiya, Qətər, Seneqal, Kamerun, Vyetnam, Qəmər Adaları İttifaqı, Qvadelupa, Fransız Qvianası, Yeni Kaledoniya, Korsika, Martinika, Fransız Polineziyası, Korsika, Valis və Futuna, Solomon adalarından, İslam Əməkdaşlıq Təşkilatı və BMT-nin Qadınlara qarşı Zorakılığın Ləğv edilməsi üzrə Komitəsindən 50-yə yaxın nümayəndə, eləcə də insan hüquqları və dekolonizasiya üzrə ixtisaslaşan QHT-lərin rəhbərləri, xarici media təmsilçiləri iştirak edir.
Sayca 4-cü olan bu qəbildə tədbirlərin Fransanın dünyadakı nüfuzuna nə kimi təsiri olur?
Milli Qeyri Hökumət Təşkilatları Forumunun prezidenti Rauf Zeyni “Bakı-Xəbər”ə açıqlamasında bildirdi ki, BMT - nin Cenevre ofisində Bakı təşəbbüs qrupunun təşkilatçılığı ilə “İnsan hüquqları, sülh və təhlükəsizlik “ mövzusunda beynəlxalq konfransın keçirilməsi əhəmiyyətli tədbirdir: “Çünki belə tədbirlərin keçirilməsi beynəlxalq aləmdə real vəziyyətin nədən ibarət olduğunu, hansı ölkənin hansı yerdə, məqamda olduğunu çox gözəl göstərə bilir. İndiyə kimi müxtəlif səbəblərdən Fransanın keçmiş və ya indiki kaloniyalarının hər hansı bir təmsilçii bu fikirləri lazımı səviyyədə açıqlaya bilməyib. Belə tədbirlərin keçirilməsi Fransa kimi demokratiya və insan hüquqları iddiaçısı kimi çıxış edən ölkələrin həm də kolonializm ölkələri olduğunu göstərir. Dünyada kolonializmin yaranması və dırnaqarası çiçəklənməsinə xidmət edən ölkələr olduğunu göstərir. Əsl simalarını göstərir və bu çox vacibdir. Çünki dünyada BMT-nin Təhlükəsizlik Şurasının 5 daimi üzvünün kimlərdən ibarət olduğu, onların əsl mahiyyətinin nədən ibarət olduğunu bəşəriyyətə çatdırmaq çox vacibdir. Onların gündəlik qayğılarına başları o qədər qarışıb ki, bəşəriyyət dünyada hansı iddialardan söhbət getdiyinin fərqində deyil. Fransa kimi ölkənin həm öz daxilində, həm kənarda demokratiya adı altında hansı siyasəti yürüdüyünün bütün dünyada tanıdılması vacibdir. Ancaq bu ölkənin kolonializm siyasəti aparması, millətlərin, xalqların hüquqların tapdalaması haqqında dünya ictimaiyyətində məlumat həddən artıq azdır. Ona görə də, bu cür tədbirin təşkilatçılarına, Bakı təşəbbüs qrupuna vətəndaş cəmiyyəti adından öz minnətdarlığımı bildirirəm və düşünürəm ki, belə tədbirlər çox keçirilməlidir. Çünki dünya ictimaiyyəti bu cür ölkələrin əsl mahiyyətini, əsl simasını bilməlidir”.
Məhəmmədəli QƏRİBLİ
