Təhsil işçiləri 65 yaşına çatmadan işdən çıxarılacaq?
Akif Nəsirli: “Nazirin fikirlərindən belə nəticə çıxarmaq olar ki, müəllimləri pensiya yaşına çatmadan da işdən çıxarmaq olar”
“Bu gün kimsə işindən ayrılanda ciddi problem yaranır. Halbuki, proqram dəyişirsə, kadr dəyişikliyi də qaçılmazdır”. Bunu elm və təhsil naziri Emin Əmrullayev Heydər Əliyevin 100 illik yubileyinə həsr olunmuş “Güclü iqtisadiyyat üçün Azərbaycanda peşə təhsilinin inkişaf yolu: gələcəyə baxış” adlı konfransda çıxışı zamanı deyib.
O bildirib ki, işçinin pensiya yaşına qədər işdə qalması yanaşmasının dəyişməsi ağrılı qərardır.
“Biz seçim etməliyik, ya heç kimə dəymirik və hər şey də olduğu kimi qalacaq, ya da dəyişiklik üçün ağır qərarlar verməliyik. Məzmun və keyfiyyət arasında əlaqə kiminsə əməkhaqqı və ya vəzifədən çıxması ilə bağlılıq təşkil edir”, - deyə nazir əlavə edib.
Emin Əmrullayev vətəndaşların yenidən ixtisas dəyişmə və kvalifikasiyanın artırılmasının asan görünsə də, çətin proses olduğunu söyləyib. Nazir peşə təhsilində mərhələli şəkildə adambaşına maliyyələşdirmə mexanizminə keçidin təmin edildiyini və prosesin olduqca səmərəli olacağını vurğulayıb.
Nazirin açıqlaması geniş müzakirəyə səbəb olub və insanlarda bir sıra suallar yaradıb. Əksəriyyət belə anlayır ki, nazir işçilərin pensiya yaşına qədər işdə qalmağa ixtiyarı olmadığını demək istəyib. Bu baxımdan, elm və təhsil nazirinin açıqlaması bir qədər anlaşılmazlıq yaradıb.
Sual edilir ki, nazir demək istəyir işçilərin pensiya yaşına qədər heç də işdə qalması vacib deyil? İşçiləri işdən tez çıxarıb yola salmaq olar? Bu nazir nə demək istəyir?
Ekspertlərə görə, əgər o deyirsə ki, işçi pensiya yaşına qədər işdə qalmamalıdır, getməlidir, bu absurd bir məsələdir. Ekspertlər deyir ki, pensiya yaşına qədər işləmək işçinin konstitusiya hüququdur. Bu baxımdan vətəndaşın hüququnu kim əlindən ala bilər? Təhsil işçiləri 65 yaşına çatmadan işdən çıxarılacaq?
“Burada 65 yaşa çatmayan bütün müəllimlər nəzərdə tutulmamalıdır”
Məsələyə şərh verən Liberal İqtisadçılar Mərkəzinin sədri Akif Nəsirli “Bakı-Xəbər”ə bildirdi ki, hansısa bir məmurun, nazirin öz peşəsinin ustası olan müəllimlərin, yaxud başqa peşə sahiblərinin pensiya yaşı çatmadan işdən çıxarılmağının qaçılmaz olduğunu deməsi absurd yanaşmadır. “Nazirin fikirlərindən belə nəticə çıxarmaq olar ki, müəllimləri pensiya yaşına çatmadan da işdən çıxarmaq olar. Nazirin dediyinə görə, təhsil işçilərinin bir hissəsi pensiya yaşına çatmadan öz işi ilə vidalaşmalıdır. Hesab edirəm ki, burada 65 yaşa çatmayan bütün müəllimlər nəzərdə tutulmamalıdır. İstedadlı, öz biliyi-savadı, öz üzərində işləməsi ilə seçilən müəllimə bunun şamil edilməsi böyük ədalətsizlik olardı. Bu, öz peşəsini layiqincə təmsil edən müəllimlərə aid edilməli deyil.
Diqqətinizi bir məqama çəkmək istəyirəm. Nazirin dediklərinin arxasında nələr, hansı amillər dayanır? Bunu bilmək maraqlıdır. Hazırda hamımız narazılıq edirik ki, orta məktəblərdə təhsil yoxdur, əlavə xərc çəkib uşaqlarımızı repetitor yanına göndəririk. Fəaliyyət göstərən müəllimlər ya normal təhsil verə bilmir, ya da ki, normal təhsil vermək həvəsində deyil. Bu gün müəllimlərin yarıdan çoxu məktəbə bir maaş yeri kimi baxır. Günortaya qədər gedib məktəbdə başını qatır, günortadan sonra öz işi ilə məşğul olur. Məktəbdən ayrılandan sonra özünü inkişaf etdirməklə məşğul olmur. Belədə də uşaqlar normal təhsil ala bilmir. Müəllimlərin bir hissəsi də qabliyyətlidir, özünü inkişaf etdirir, öz üzərində işləyir, amma məktəbdə keyfiyyətli dərs keçmir, onun repetitor kimi fəaliyyət göstərdiyi sahədə uşaqlar var, enerjisini ora qoyur. Dövlət müəllimə maaş verir, amma ortada təhsil yoxdur. Təhsili verən repetitordu, bizim valideynlərin verdiyi pulun hesabına keçilən dərsdir” - deyə A.Nəsirli vurğuladı.
A.Nəsirlinin qeyd etdiyinə görə, müəyyən müəllimlərin dərsə səhlənkar yanaşmasını aradan qaldırmaq üçün elə bir sistem yaratmalıyıq ki, o çıxdaş olunsun.
A.Nəsirli dedi ki, bu məsələ fəaliyyəti zəif olanlara şamil edilməli və savadlı müəllimdən də keyfiyyətli dərs tələb edilməlidir. O hesab edir ki, müəllimlər sınanacaq, şagirlərin bilikləri yoxalanacaq, məktəblər qarşısında tələblər qoyulacaq.
Leyla QARAXANLI
