Ermənistan siyasətçiləri Polşada Tuskun baş nazir seçilməsinə sevinir. Niyə...
![Image](/uploads/posts/2023-12/tusk.webp)
Samir Hümbətov: “Görünür ki, ABŞ-da olan müəyyən dairələr tərəfindən bu məsələdə Donald Tuska dəstək verilib və onun içərisində erməni lobbisi də var”
Polşa Seymi (parlamentin aşağı palatası) Donald Tusku ölkənin Baş naziri seçib. “Qafqazinfo” xarici mediaya istinadən xəbər verir ki, 248 deputat Tuskun namizədliyinin lehinə, 201 deputat isə əleyhinə səs verib.
Bildirilir ki, deputatlar dekabrın 11-i 2017-ci ildən ölkənin Baş naziri Mateuş Moravetskinin müvəqqəti hökumətinin işinin müddətini uzatmaqdan imtina ediblər.
Qeyd edək ki, 66 yaşlı Donald Tusk “Vətəndaş koalisiyası” müxalif alyansının rəhbəridir. O, 2007-2014-cü illərdə Polşanın Baş naziri olub, 2014-2019-cu illərdə isə Avropa İttifaqı Şurasının sədri olaraq fəaliyyət göstərib.
Görünən budur ki, erməni siyasətçilər Tuskun baş nazir seçilməsinə hamıdan çox sevinir. Bunun səbəbi nə ilə bağlı ola bilər?
Siyasi şərhçi Samir Hümbətov “Bakı-Xəbər”ə açıqlamasında bildirdi ki, Donald Tusk əqidə, siyasi mövqe baxımından daha çox ermənimeylli siyasətçidir: “Onun istər Avropada, istərsə də ABŞ - da erməni lobbisi ilə əlaqələri var. Bu hər zaman olub. Avropa İttifaqı Şurasının sədri olduğu müddətdə də açıq - aydın görünürdü. Donald Tuskun indi Polşada baş nazir seçilməsi erməniləri ona görə daha çox sevindirir ki, onlar erməni lobbisinin əli ilə Polşa ilə, xüsusən də NATO və Avropa İttifaqı ilə əlaqələrini dərinləşdirməyə çalışır. Nəzərə almaq lazımdır ki, Polşa həm Avropa İttifqqının, həm də NATO - nun üzvüdür. Belə olan halda erməniləri məmnun edəcək. Donald Tuskun, xüsusilə erməni lobbisi ilə əlaqəsi olması erməniləri daha çox razı salacaq. Biz bilirik ki, Polşa böyük dövlətdir və Polşa üzərində həm Rusiyanın, həm də ABŞ - ın ciddi mübarizəsi var. Siyasi mübarizə gedir. İndi seçilən Donald Tuskun da ABŞ-meylli siyasətçi olması hər kəs tərəfindən bilinəndi. Görünür ki, ABŞ - da olan müəyyən dairələr tərəfindən bu məsələdə Donald Tuska dəstək verilib və onun içərisində erməni lobbisi də var. Bu baxımdan düşünürəm ki, onlar Polşada öz maraqlarını icra etmək üçün bu qədər çox sevinirlər. Onu da unutmaq olmaz ki, Polşa Azərbaycanla strateji tərəfdaşdı. Bu məsələ xüsusi önəmlidir. Yəqin ki, yeni hökümət də bunu gözardı etməyəcək”.
Görünən budur ki, ermənilər yenə də utopik düşüncə tərzindən əl çəkmıyiblər. Onlar bilməlidir ki, elə ciddi məsələlər var, onu şəxsiyyət faktoru deyil, dövləti və milli maraqlar həll edir. Tusk qəlbində olan erməni sevgisinə görə Polşanın dövləti maraqlarını qurban verə bilməz.
Məhəmmədəli QƏRİBLİ