Əliyevlə seçki yarışında müxalif namizədlər hansı siyasi dividendləri qazana bilər...
Qabil Hüseynli: “Onun alternativlərinin siyasi karyeralarına belə bir siyasətçi ilə eyni marafonda yarışmaq kimi müsbət bir müddəa yazılacaq”
Azərbaycanda 2024-cü il fevralın 7-də növbədənkənar prezident seçkiləri keçiriləcək. Bu barədə dekabrın 7-də Prezident İlham Əliyev sərəncam imzalayıb. Növbədənkənar prezident seçkiləri Azərbaycanın Qarabağda suverenliyini bərpa etməsindən sonraya təsadüf edir.
Bununla yanaşı, növbədənkənar prezident seçkilərinin elan edilməsinin səbəbləri hələ rəsmi qaydada bəyan edilməyib. Azərbaycanın hazırkı lideri İlham Əliyev 2003-cü il oktyabrın 15-də Azərbaycan Prezidenti seçilib. O, həmçinin, 2008-ci il oktyabrın 15-də, 2013-cü il oktyabrın 9-da, 2018-ci il aprelin 11-də prezident seçkilərində qalib olub. Azərbaycan Konstitusiyasına görə, Azərbaycan Prezidenti ümumi, bərabər və birbaşa seçki hüququ əsasında sərbəst, şəxsi və gizli səsvermə yolu ilə 7 il müddətinə seçilir.
"Seçki Məcəlləsi"nə görə, seçki hüququ olan hər bir vətəndaş və yaxud vətəndaşlar prezidentliyə namizəd irəli sürmək üçün azı 100 nəfərdən ibarət olan təşəbbüs qrupu yarada bilərlər. Seçkilərin təyin edilməsi haqqında qərar rəsmi dərc olunduqdan sonra prezidentliyə namizədlər irəli sürülür. Siyasi partiya, siyasi partiyaların bloku və yaxud seçicilərin təşəbbüs qrupları prezidentliyə irəli sürdükləri namizədin müdafiəsi üçün 40 mindən az olmayan sayda seçici imzası toplamalıdırlar.
Yeni qəbul olunmuş siyasi partiyalar haqqında qanun siyasi partiyaların qarşısında seçkilərdə iştirakı bir vəzifə kimi qoyur. Demək seçkidən kənarda qalmaq, yaxud onu boykot etmək mümkün görünmür. Təbiidir ki, bəzi müxalif partiya sədrləri İlham Əliyevə alternativ olmaqla bağlı qərar verəcəklər. Ancaq İlham Əliyevin reytinqinin belə yüksək dönəmində kiminsə ona qalib gəlmək şansı sıfıra bərabərdir. Belə olan təqdirdə, İlham Əliyevə opponentlik edəcək siyasilər seçkidən hansı dividendləri götürmüş olacaqlar?
Politoloq Qabil Hüseynli “Bakı-Xəbər”ə açıqlamasında bildirdi ki, seçki hər bir siyasi təsisatın və ya siyasətçinin fəaliyyətində ciddi təcrübə anlamına gəlir: “Seçki təcrübəsinə malik olmaq siyasətçinin həm zehni, həm də peşəkar cəhətdən inkişafında çox böyük rol oynayır. Təbiidir ki, bizim heç bir müxalif liderin hazırda İlham Əliyevə qalib gəlmək şansı yoxdur. Çünki İlham Əliyev çox böyük tarixi uğurlara imza atıb. Onun alternativlərinin siyasi karyeralarına belə bir siyasətçi ilə eyni marafonda yarışmaq kimi müsbət bir müddəa yazılacaq. Bu, onlar üçün doğrudan da böyük təcrübə anlamı daşıyacaq. Onlar Prezidentdən çox şey öyrənə bilərlər. İdarəçiliyi, daxili və xarici siyasətin inkişaf dinamikası və konturlarını ondan əxz edə bilərlər. Onun ordu quruculuğu sahəsindəki təcrübəsindən geniş yararlana bilərlər. Təcrübədən başqa, dövlətçilik prinsiplərinin necə qorunmasını da mənimsəyəcəklər. Onların dividentləri, sözsüz, olacaq. Hələlik mən siyasi dividendlər barədə söz açmıram. Başqa hansı dividendlərin olacağı haqqında danışmaq isə çətindir.
Bu, həm də həmin siyasətçilərə özlərini ifadə etmək baxımından ciddi önəm daşıyacaq. Onlar öz konsepsiyalarını məhz bu cür mötəbər auditoriyadan cəmiyyətə çatdıra biləcək. Təbiidir ki, bu seçki kampaniyasında edilən çıxışlar hətta ölkə rəhbərliyi tərəfindən diqqətlə izlənəcək. Bu, həm də həmin alternativlərin özlərini reallaşdırmaq, tanıtmaq baxımından ciddi önəm daşıyacaq. Bu şansı yaxalaya biləcək siyasilər ümumi nəticəni uduzsalar da, digər istiqamətlərdə normal dividend götürəcəklər”.
Məhəmmədəli QƏRİBLİ
