Azərbaycan jurnalistləri Fransanın “media rasizmi” siyasətinə qarşı çıxdılar…
Fransa mətbuatında, guya AZƏRTAC-ın əməkdaşlarının Yeni Kaledoniyaya Fransada sabitliyi pozmaq üçün göndərildiyi, hətta onların “casus” adlandırıldıqları dezinformasiya tirajlanır.
Məlumat üçün bildirək ki, AZƏRTAC-ın iki jurnalisti redaksiya tapşırığını yerinə yetirmək üçün 2023-cü il dekabrın 3-də Yeni Kaledoniyaya ezam olunmuşdu. Onlardan biri vizanın olmaması bəhanəsi ilə ölkəyə buraxılmayıb, bir sutka polis nəzarətində saxlanıldıqdan sonra ölkədən çıxarılıb.
Feyk məqalədə qeyd edilir ki, Fransanın müdafiə naziri həmin ərəfədə Yeni Kaledoniyaya səfər edib və jurnalistlər də məhz bunu işıqlandırmaq üçün oraya gediblər. Həmçinin məqalədə jurnalistlərin “casus” olduğu yazılır. Bununla da onlar özlərini təkzib etmiş olurlar – bir tərəfdən yazırlar ki, jurnalistlər ora hadisələri işıqlandırmağa gediblər, ardınca isə onları “casus” adlandırırlar.
Vasif Həsənli: “Bu gün rəsmi Paris bütün imkanları ilə erməni diasporunun xidmətindədir”
Demokrat.az xəbər portalının baş redaktoru Vasif Həsənli “Bakı Xəbər”ə açıqlamasında qeyd etdi ki, Fransa mediasında azərbaycanlı jurnalistə qarşı başladılan kampaniya ilk növbədə bu ölkədəki medianın azad olmadığını nümayiş etdirir. Çünki azərbaycanlı jurnalistə qarşı təzyiq birbaşa rəsmi Parisin siyasətidir: “Fransa hakimiyyəti anti-Azərbaycan siyasətini açıq müstəvidə davam etdirir, xüsusilə Cənubi Qafqazda maraqlarını təmin etmək məqsədilə bunu edir. Azərbaycan hazırda Fransanın Cənubi Qafqazda xaos planlarının qarşısını alan əsas ölkədir, eyni zamanda, Fransa müstəmləkəsindən əziyyət çəkən xalqlar üçün də ümid yerinə çevrilib. Fransa da məhz buna görə Azərbaycana təzyiqn etməyə cəhd göstərir. Jurnalistimizə qarşı edilən hücumlar da bu prosesin bir hissəsidir. Lakin bununla Fransa özünü ifşa edir.
Birincisi, bu ölkədə söz azadlığının olmadığı bir daha məlum oldu. İkincisi, Fransa mediasının Makron hakimiyyətinin nəzarətində olduğu isbat olundu. Bununla da Fransa demokratiyasının, söz və media azadlığı imicinin yalandan başqa bir şey olmadığı ortaya çıxdı.
Bununla yanaşı, azərbaycanlı jurnalistə qarşı edilən təzyiqlər həm də Fransada mövcud olan, Makron administrasiyasını ələ alan erməni diasporu və lobbisinin istəyidir.
Göründüyü kimi, bu gün rəsmi Paris bütün imkanları ilə erməni diasporunun xidmətindədir və lazım olanda demorkatiyanı, söz və media azadlığını əzərək keçə bilir”.
Hacıbəy Heydərli: “Dünyaya demokratiyanın carçısı, söz azadlığının müdafiəçisi kimi göstərilən Fransanın əsl niyyəti, siması üzə çıxır”
Mətbuat Şurası İdarə Heyətinin üzvü, Azxeber.com saytının baş redaktoru Hacıbəy Heydərli “Bakı-Xəbər”ə açıqlamasında bildirdi ki, Fransa mediası Azərbaycana qarşı ilk dəfə deyil ki, kampaniya aparır. Bu ölkə hər zaman Azərbaycana qarşı dezinformasiyalar yaymaqla məşğul olub. Hətta Birinci Qarabag müharibəsində də biz bunun şahidi olduq. Fransız jurnalistləri Xocalıda törədilən soyqırım, vəhşiliklərin Azərbaycan tərəfindən edildiyini yazırdılar. O zamanlar belə ölkəmizlə bağlı həqiqətə uyğun olmayan məlumatlar yayılırdı: "Fransa günü bu gün də Azərbaycanla bağlı feyk məlumatlar yaymaqla məşğuldur. Fransa Ermənistanla bərabar Azərbaycana qarşı informasiya müharibəsi aparır. Bu da səbəbsiz deyil. Çünki Azərbaycanın qələbəsi, zəfəri Fransanı çox narahat edir".
Həmsöhbətimiz onu da əlavə etdi ki, Fransa müstəmləkə altında saxladığı xalqlara, ölkələrə qarşı zülmkar siyasət yürüdür. Fransa bu siyasətin dünyaya yayılmasının qarşısını almağa çalışır: "Məlumdur ki azərbaycanlı jurnalist Kaledoniyaya iş fəaliyyəti ilə bağlı getmişdi. Başqa bir niyyət yox idi. Ancaq Fransa azərbaycanlı jurnalisti ordan qovdu. Bununla da öz çirkin niyyətini dünyaya nümayiş etdirdi. Bu ölkə bununla kifayətlənməyib azərbaycanlı jurnalisti ləkələməyə çalışır. Bir sözlə, bu ölkə Azərbaycan mediasına qarşı qara piar kampaniyası aparır. Dünyaya demokratiyanın carçısı, söz azadlığının müdafiəçisi kimi göstərilən Fransanın əsl niyyəti, siması üzə çıxır. Onların Azərbaycana qarşı apardığı kampaniyanın heç bir önəmi yoxdur".
Günel CƏLİLOVA
