Avropa təşkilatları Azərbaycanla münasibətdə 2-yə bölünüblər - dostlar və düşmənlər...
Elşən Mustafayev: “Bu gün üçün vəziyyət belədir, gələcəkdə dəyişmə ehtimallarını isə zaman göstərəcək”
Dekabrın 8-də Prezident İlham Əliyev Avropa Şurasının Baş katibi Mariya Peyçinoviç Buriçi qəbul edərkən xanım Buriç Azərbaycanın 2001-ci ildən Avropa Şurasının dəyərli üzvü olduğunu vurğulayıb.
O, ölkəmiz tərəfindən Avropa Şurasının bir çox konvensiyasının imzalandığını və ratifikasiya edildiyini, bir müddət əvvəl Azərbaycan tərəfinin Avropa Şurasının İnsan orqanlarının alverinə qarşı Konvensiyasını imzaladığını xatırlayıb və bütün bunları müsbət addım kimi dəyərləndirib. Avropa Şurasının Baş katibi qeyd edib ki, Prezident İlham Əliyevin rəhbərliyi ilə Azərbaycanda həyata keçirilən islahatları yüksək qiymətləndirir.
Avropa Şurası baş katıbı Buriç Bakıda Prezident İlham Əliyevlə görüşdə ölkəmizdə həyata keçirilən islahatları xüsusi qeyd edib. Maraqlıdır ki, Avropanın bir çox qurumları, o cümlədən də Avropa İttifaqının Xarici işlər və təhlükəsizlik siyasəti üzrə ali nümayəndəsi Josep Borrell, Avropa Parlamenti və digər təsisatların təmsilçiləri Azərbaycana çox qərəzli şəkildə yanaşdıqları halda Avropa Şurası kimi təşkilatın baş katibi belə obyektiv münasibət sərgiləyir.
Avropa qurumlarının Azərbaycana münasibətlərində belə müxtəlif mövqe tutmaqlarının səbəbi nədir?
Ekspertlər hesab edirlər ki, bu gün Azərbaycana münasibətdə əksər beynəlxalq qurumlar qərəz göstərir, onların təmsilçiləri ölkəmizə düşmən mövqe sərgiləyirlər, amma bəzi təşkilatlar obyektivliyini qoruya bilir, çünki ikincilər reallığı dəyərləndirməyi yaxşı bacarırlar. Bu baxımdan, Azərbaycan yaxşı bilir ki, beynəlxaq qurumlar arasında ona kim dost, kim düşməndir.
“...Avropa Parlamenti (AP) daha çox qərəzli görünürdü”
Məsələ ilə bağlı siyasi şərhçi Elşən Mustafayev “Bakı-Xəbər”ə bildirdi ki, Avropada müxtəlif beynəlxalq qurumlar zaman-zaman Azərbaycan əleyhinə bəyanatlar və ittihamlar səsləndiriblər. “Qarabağ məsələsi ilə bağlı xüsusilə Avropa Parlamenti (AP) daha çox qərəzli görünürdü. Son illər Avropa Şurasının (AŞ) AP kimi haqsız və aqressiv münasibətinin demək olar ki, şahidi olmamışıq. Bu o səbəbdəndir ki, AP tərkibi yalnız Avropa İttifaqına üz olan dövlətlərin nümayəndələrindən formalaşıbsa, Avropa Şurası bütünlükdə Avropa dövlətlərinin, o cümlədən Azərbaycanın iştirakı ilə fəaliyyət göstərir. Ona görə də bu təşkilatda ərazi bütövlüyümüzə, milli təhlükəsizliyimizə təhdid yaradan hər hansı müzakirələrin açılması uğursuz addım olub. Çünki ora üzv dövlətlərinin bir çoxu reallıqları daha yaxşı bilir və eyni zamanda Azərbaycanla yaxın münasibətləri var. Avropa Şurası baş katibinin söylədiyi fikirləri bu səbəbdən təbii qarşılamaq lazımdır. Digər mühüm məqamlardan biri də odur ki, son 2-3 həftədə Fransanın, Aİ-nin, AP-nin bir ay öncəki aqessiv, ədalətsiz bəyanatlarını, çağırışılarını da görmürük. Hesab edirəm, AŞ və AP əlaqəli qurum olduğundan, Azərbaycan və Ermənistan arasında münasibətlərdən dolayı nəbzi tuta bilirlər. Hazırda bütün qurumlar sülh müqaviləsinin tezliklə imzalanacağına ümid etdiyini söyləyir. Əvvəlki kimi Azərbaycanın qarşısında qəbulolunmaz şərtlər qoymurlar. Çünki indiyədək apardıqları siyasətin reqionda sülhün yaranmasına xidmət etməyəcəyini, həmçinin bu siyasətə görə Azərbaycanı itirə biləcəklərini artıq anlamağa başlayıblar. Bu gün üçün vəziyyət belədir, gələcəkdə dəyişmə ehtimallarını isə zaman göstərəcək”-deyə E.Mustafayev vurğuladı.
İradə SARIYEVA
