Ən çox saxta diplom vermiş təhsil ocağı hələ susur...
İlqar Orucov: “Müəllimlər İnstitutunun Gəncə filialı saxta diplomlarla bağlı rekord vurub”
Azərbaycanda orta məktəb müəllimlərinin bəzilərinin saxta diplomlu olması heç kimə sirr deyil. Rəsmi qurumlar dəfələrlə bu mövzuda açıqlamalar verib, problemdən xəbərdar olduqlarını diqqətə çatdırıblar.
Lakin müxtəlif yollarla diplom əldə edən dırnaqarası müəllimləri müəyyən edərək, onların hamısını təhsil ocaqlarından uzaqlaşdırmaq hələ ki, mümkün olmayıb. Bu isə şagirdlərin keyfiyyətli təhsil almasına ciddi mane olmaqla yanaşı, gələcək nəsillər üçün böyük təhlükə vəd edir.
Bu günlərdə təhsil eksperti Kamran Əsədov belə bir iddia ilə çıxış edib ki, Azərbaycanda ən çox saxta diplom məhz Müəllimlər İnstitutunun Gəncə filialı tərəfindən verilib. Onun sözlərinə görə, bu ali təhsil müəssisəsindən verildiyi güman edilən saxta diplomların sayı 600-dən çoxdur: “Saxta diplomların artması əsasən köçürmələr hesabına olur. Azərbaycanda keçirilən qəbul imtahanında keçid balını toplaya bilməyən gənc xarici ölkələrin, xüsusən də Rusiya, Ukrayna, Gürcüstan və Türkiyə universitetlərinə saxta yolla qəbul olunur, sonra isə Azərbaycanın dövlət universitetlərinə və ya rayon filiallarında birbaşa 2-ci kursa köçürülürlər”.
Məsələ ilə bağlı Azərbaycan Müəllimlər İnstitutu ilə əlaqə saxlamağa çalışdıq. Lakin zənglərimizə cavab verən olmadı.
“Mikayıl Cabbarov illər öncə Təhsil naziri təyin edilən zaman bu sahədə geniş mübarizəyə başladı, hətta o zaman 2500 saxta diplomlu müəllim aşkar olunaraq işdən kənarlaşdırıldı”
Gənc Alim, Doktorant və Magistrlər Cəmiyyətinin sədri İlqar Orucov “Bakı-Xəbər”ə açıqlamasında qeyd etdi ki, zamanında tək Müəllimlər İnstitutunun Gəncə filialı deyil, digər filiallarında da bu hal yaşanıb: “Ancaq Müəllimlər İnstitutunun Gəncə filialı saxta diplomlarla bağlı rekord vurub. Əlbəttə ki, bu xoşagəlməz haldır. Danılmaz faktdır ki, müstəqilliyin ilk illərində bəzi universitetlər diplom alveri ilə məşğul olub. Vaxtilə Azərbaycan Beynəlxalq Universitetində də (ABU) bu kimi hallar qeydə alınıb. Bu universitetdə qanunsuz tələbə qəbulu həyata keçirilirdi. Bəzi özəl ali təhsil ocaqları dövlətin onlar üçün yaratdığı şəraitdən istifadə edə bilmədi. Onu da deyim ki, Müəllimlər İnstitutu özəl deyil, dövlət universitetidir. Buna baxmayaraq, müstəqilliyin ilk illərində adıçəkilən universitetin bölgə filialları saxta diplom alveri ilə məşğul olurdu”.
Həmsöhbətimiz onu da əlavə etdi ki, hazırda ölkədə sağlam təhsil mühiti formalaşıb. Tələbə qəbulu, tələbə köçürməsi və digər prosedurlar qanun çərçivəsində həyata keçirilir: “Saxta diplomlu müəllimlərlə mübarizə illərdir aparılır. Xatırladım ki, Mikayıl Cabbarov illər öncə Təhsil naziri təyin edilən zaman bu sahədə geniş mübarizəyə başladı. Hətta o zaman 2500 saxta diplomlu müəllim aşkar olunaraq işdən kənarlaşdırıldı. Belə bir iddia səslənir ki, saxta diplomlu müəllimlərin sayı həddindən artıq çoxdur. Təəssüf ki, həmin şəxslər günü bu gün də məktəblərdə dərs deyir. Saxta diplomlu müəllimlərin aşkara çıxarılması üçün onların sertifikasiya olunması olduqca vacibdir. Sertifikasiya sayəsində saxta diplomlu şəxslər bəlli olur və olacaq”.
Günel CƏLİLOVA
