COP29-un icraçı direktoru enerji keçidini sürətləndirmək üçün yeni investisiyalara çağırdı
Enerji keçidini sürətləndirmək üçün yenilikçi həllər və yeni sərmayələrə ehtiyacımız var. Trend xəbər verir ki, bunu Azərbaycan energetika nazirinin müavini, COP29-un baş icraçı direktoru Elnur Soltanov Bakıda COP29 çərçivəsində bildirib.
"Bir neçə əsas prioriteti vurğulamaq istəyirəm: bərpa olunan enerji mənbələrinin istifadəsinin genişləndirilməsindən tutmuş, iqlim dəyişikliyinə davamlılığın artırılmasına qədər, təbii mühafizə həllərindən tutmuş, gender məsələlərini nəzərə alan təşəbbüslərə qədər. Bütün bu məsələləri həll etmək və hamı üçün daha yaxşı gələcək qurmaq üçün vahid yanaşmaya ehtiyacımız var. Diqqət etməli olduğumuz ən vacib sahələrdən biri isə tərəfsiz subyektlərin səylərinin milli hökumətlərin ambisiyaları ilə uyğunlaşdırılmasıdır", - deyə E. Soltanov bildirib.
Onun sözlərinə görə, könüllü tədbirlər və dövlət siyasətinin uyğunlaşdırılması, milli səviyyədə müəyyən edilmiş iqlim üzrə hədəflərin və milli uyğunlaşma planlarının effektiv icrası üçün vacibdir.
"Burada olan bütün maraqlı tərəfləri, hökumətləri, beynəlxalq təşkilatları, müəssisələri və vətəndaş cəmiyyətini cəsarətli və qətiyyətli öhdəliklər götürməyə çağırıram. Keçid dövrünü sürətləndirmək üçün yenilikçi həllər və yeni sərmayələrə ehtiyacımız var. İndi liderlik və hərəkət etmək vaxtıdır. Gəlin bu çağırışı qəbul edək və gələcək nəsillər üçün dayanıqlı bir dünya qurmağı vəd edək", - deyə E. Soltanov qeyd edib.
O, Azərbaycanla qürur duyduqlarını və COP29-u qəbul etməyə və bu qlobal tədbirin bir hissəsi olmağa böyük məmnuniyyətlə yanaşdıqlarını qeyd edib.
"Biz inklüziv, çoxsəviyyəli və əməkdaşlıq əsaslı fəaliyyətləri dəstəkləməyə çalışırıq. İrəlilədikcə bu tədbirin əsas mesajını unutmayaq. İqlim dəyişikliyi sahəsində hər bir sektordan cəsarətli hərəkətlər yalnız arzuolunan deyil, həm də zəruridir", - deyə Elnur Soltanov bildirib.
