2-ci bakalavr təhsilinə maraq niyə bu qədər artıb?..
İlqar Orucov: “Əmək bazarında artıq elə tələblər formalaşıb ki, insan bir diplomla ömür boyu işləyə bilmir”
Daha yaxşı iş arzusunda olanlar və bəzən də bir işlə kifayətlənməyənlər adətən ikinci ali təhsil almağa üstünlük verirlər. Bu baxımdan son illər ölkədə əlavə təhsillə maraqlananların, ikinci ali təhsil almaq istəyənlərin sayında artım müşahidə edilir.
Qeyd edək ki, 2024-2025-ci tədris ili üzrə ikinci təhsil üçün ümumilikdə 8392 müraciət qeydə alınıb.
Dövlət qurumlarında çalışan ictimai fəal insanlar arasında təkrar ali təhsil almağa maraq hiss olunur. Ən maraqlı məqam isə təkrar ali təhsil almaq üçün müraciət edib müsbət cavab alanların ixtisaslarında əlaqənin kəskin fərqlənməsidir. Elə gənclər arasında da təkrar ali təhsilə maraq artıb.
“Son zamanlar kompüter mühəndisliyi sahəsində təhsilə maraq artıb, bu ixtisas üzrə təkrar ali təhsilə müraciət edənlər əmək bazarında iş tapmaq istəyənlərdir”
Azərbaycan Gənc Alim, Doktorant və Magistrlər Cəmiyyətinin sədri, fəlsəfə doktoru İlqar Orucovun sözlərinə görə, ikinci ali təhsilə hər zaman maraq olub: “Əvvəllər hüquqşunas ixtisası üzrə ikinci ali təhsilə daha çox maraq var idi. Bir də görürdün ki, 48 yaşında məmur təkrar ali təhsil alır. Bu, təhsilə olan maraqdan irəli gəlmirdi. Burada məqsəd təhsil aldığı sahə üzrə bilik almaq yox, diplom alaraq bu diplomdan karyerada irəliləyiş üçün istifadə etmək idi. Amma son illər biz təkrar ali təhsilə fərqli baxış müşahidə edirik. Artıq fərqli ixtisaslara meyl var. Məsələn, kompüter mühəndisliyi sahəsində təhsilə maraq artıb. Bu ixtisas üzrə təkrar ali təhsilə müraciət edənlər məmur olmaq istəyənlər yox, özünə əmək bazarında iş tapmaq istəyənlərdir. İnsan ömür boyu təhsilə ehtiyac duyur. Əmək bazarında artıq elə tələblər formalaşıb ki, insan bir diplomla ömür boyu işləyə bilmir. Ona görə də təkrar ali təhsil günün tələbinə çevrilib. Danılmaz faktdır ki, gənclər valideynlərinin təkidi ilə istəmədikləri ixtisası seçir. İkinci təhsillərini isə öz istəklərinə uyğun almalı olurlar. Bəzən ixtisaslar kəskin fərqlənsə də, insanlar sevdiyi işdə çalışmalıdırlar. İnsanlar hansı ixtisasa sahib olmasından asılı olmayaraq təkrar ali təhsil alırsa, bu alqışlanmalıdır. Yetər ki, onlar özlərinə uyğun əmək bazarında iş tapa bilsinlər”.
Günel CƏLİLOVA
