Rusiya-İran ittifaqına Azərbaycan da qoşula bilərmi...
![Image](/uploads/posts/2023-12/iran-rus.webp)
Yeganə Hacıyeva: “Hazırkı mərhələdə bu bizim üçün cazibədar deyil”
Moskva və İran arasında Qərbin sanksiyalarına qarşı mübarizəyə dair bəyannamə imzalanıb. Bu barədə Rusiyanın xarici işlər naziri Sergey Lavrov Moskvada iranlı həmkarı ilə görüşdə bildirib:
“Biz birtərəfli məcburetmə tədbirlərinin mənfi nəticələrinə qarşı mübarizə, yüngülləşdirmə və kompensasiya yolları və vasitələri haqqında bəyannamə imzaladıq. Bu, ABŞ və onun müttəfiqlərinin qanunsuz sanksiyalarının aradan qaldırılması üçün dünya ictimaiyyəti üzvlərinin səylərinin əlaqələndirilməsinin artırılması istiqamətində vacib addımdır”.
Nazir qeyd edib ki, tərəflər, həmçinin, ikitərəfli gündəlik və regional məsələlər ətrafında fikir mübadiləsi aparacaqlar.
Görüş Xəzəryanı ölkələrin (Rusiya, İran, Qazaxıstan, Azərbaycan, Türkmənistan) nazirlər görüşü çərçivəsində keçirilir.
Azərbaycanın da bu ittifaqa birləşmək şansı varmı?
Politoloq Yeganə Hacıyeva “Bakı-Xəbər”ə açıqlamasında bildirdi ki, Moska və Tehran arasında Qərbin sanksiyalarına qarşı əldə olunan razılaşmanın məqsədi məhz Avropanın təzyiqlərindən yayınmaq istiqamətindədir: “Bəllidir kj, hazırda Qərb hər iki ölkəyə müxtəlif sanksiyalar tətbiq edir. Onlar bundan mümkün çıxış yollarını axtarırlar. Hər iki ölkənin sanksiyalardan yayınmasına dəstək verən qonşu ölkələr var. Onlar zaman-zaman selektiv əsaslarda Qərbin diqqətini cəlb edirlər. Məsələn, Ermənistan Rusiya və İranın sanksiyalardan yayınmasında birbaşa iştirak edir. Dünyadakı etnik erməni əsilli iş adamları belə əməliyyatlardan milyardlar qazanır. Nədənsə, bu haqda heç kim danışmır. ABŞ konqresmenlərinə bu yöndə ünvanlanan suala yalan cavablar verməklə kifayətlənirlər. Türkiyə ilə bağlı isə fərqli qərar verirlər. Rusiyaya kömək etdiyi üçün Türkiyəyə təzyiqlər göstərirlər. Sanksiyanın əsas məqsədlərindən biri həm də çox pul qazanmaqdır. Elə silahlar var ki, Ermənistan onları öz adına alıb, sonra Rusiyaya satır ki, Ukrayna ilə müharibədə istifadə etsin. Azərbaycan sanksiyalardan yayınmaqla bağlı ittifaqa üzv olarsa, əvvəlcə “bu bizə nə verər” sualına cavab vermək lazımdır. Biz bu ittifaqa qoşulmaqla ciddi dividend götürə bilmərik. Hazırkı mərhələdə bu bizim üçün cazibədar deyil. Çünki bizə qarşı onsuz da istənilən doğru olmayan məlumatlardan istifadə olunur. Bundan dost olmayan ölkələr bizə qarşı ciddi təzyiq aləti kimi istifadə edə bilər. Bu yöndə olan bundan sonrakı addımlarımızı isə şərtlər diqtə edəcək. İndiki halda optimal deyil”.
Məhəmmədəli QƏRİBLİ