Bələdiyyələr ləğv edilir - sensasion detallar...
Qoşqar Salmanlı: “Bələdiyyə seçkilərinin gecikməsi paytaxt Bakıda keçiriləcək COP29-a görədir”
Azərbaycanda 2024-cü ildə bələdiyyə seçkiləri keçirilməyəcək. Qeyd edək ki, bundan əvvəlki bələdiyyə seçkiləri hər 5 ildən bir dekabrın 23-də keçirilib. Sonuncu bələdiyyə seçkiləri 2019-cu ildə keçirilib. Bu ilin sonuncu ayında bələdiyyə seçkilərinin keçirilməsi gözlənilirdi. Səsvermə Mərkəzi Seçki Komissiyası (MSK) tərəfindən seçkilərə 60 gün qalmış elan edilməlidir. Ancaq 60 günlük hədd artıq bitsə də, bələdiyyə seçkilərinin nə vaxt keçiriləcəyi açıqlanmayıb. Bu isə onu deməyə əsas verir ki, bu il bələdiyyə seçkiləri keçirilməyəcək.
Ekspertlər hesab edir ki, bələdiyyələr lazımsız bir quruma çevrildiyi üçün ləğv edilməlidir. Maraqlıdır, nüfuzdan düşmüş bələdiyyələr ləğv edilə bilərmi? Həmçinin, ötən bələdiyyə seçkilərinin 5 ilinin tamam olmasına 60 gündən az vaxt qalmasına baxmayaraq seçki ilə bağlı hər hansı məlumat açıqlanmayıb. Bu da o deməkdir ki, bələdiyyələr 5 ildən artıq postda qalmış olacaqlar, bu isə qanun pozuntusu sayılır.
Bələdiyyə sahəsi üzrə ekspert Qoşqar Salmanlı baki-xeber.com-a açıqlamasında qeyd etdi ki, bələdiyyə ən vacib olan qurumlardan biridir: “Dünyada bələdiyyə sistemi tələb olunan sahələrdən biridir. Inanmıran ki, Azərbaycanda bu sistem ləğv edilsin. Müasir dövr və ölkənin inkişafı üçün bələdiyyə sisteminin formalaşdırılması və inkişafı vacibdir”.
Bələdiyyə seçkilərinin keçirilməsinə gəlincə, ekspert bildirdi ki, bu yaxınlarda Mərkəzi Seçki Komissiyasının açıqlaması olub ki, seçkinin 2025-ci ildə keçirilməsi nəzərdə tutulur: “Hesab edirəm ki, bələdiyyə seçkilərinin gecikməsi paytaxt Bakıda keçiriləcək COP29-a görədir. 2025-ci ildə bələdiyyə seçkiləri keçiriləcək”.
Fuad Ağayev: “Seçkilərin təyin edilməsi ilə bağlı qərar ən azı 10 gün bundan əvvəl dərc edilməli idi, amma bu barədə heç bir məlumat və izahat verilmir”
Hüquqşünas Fuad Ağayevin sözlərinə görə, Seçki Məcəlləsinin 8.1-ci maddəsinə əsasən, seçkilərin təyin edilməsi haqqında qərar səsvermə gününə azı 60 gün qalmış dərc edilir: "Nəzərə alaq ki, sonuncu bələdiyyə seçkiləri 23 dekabr 2019-cu ildə keçirilib və bu ilin 23 dekabrında bu müddət bitməlidir. Seçkilərin təyin edilməsi ilə bağlı qərar ən azı 10 gün bundan əvvəl dərc edilməli idi. Amma bu barədə heç bir məlumat və izahat verilmir. Seçki Məcəlləsinin 213.1-ci maddəsinə uyğun olaraq, bələdiyyələrə seçkilərin təyin edilməsi səlahiyyəti Mərkəzi Seçki Komissiyasına məxsusdur. Seçkiləri təyin etməməklə MSK öz funksional vəzifələrini pozmuş olur".
Günel CƏLİLOVA
