Azərbaycan-ABŞ münasibətləri barədə səfir Libbidən gözlədiyimiz ilk konkret bəyanat...
Elşən Manafov: “Rəsmi Bakı bu amildən milli maraqlarımız kontekstində istifadə etməyə çalışacaq”
Məlum olduğu kimi, ABŞ-ın Azərbaycana yeni təyin olunmuş səfiri Mark Libbi Bakıya gəlib. O, Azərbaycan dilində mətbuata qısa açıqlama verməklə kifayətlənib və Bakıya gəlişindən çox şad olduğunu bildirib:
“Mən öz etimadnaməmi təqdim etmək, ABŞ-Azərbaycan əlaqələrini inkişaf etdirmək və regionda davamlı sülh naminə çalışmaq üçün işə başlamağı səbrsizliklə gözləyirəm. Həmçinin sizin gözəl ölkənizi daha yaxşı tanımaq istəyirəm”.
Maraqlıdır, ABŞ-ın yeni səfiri Libbinin Azərbaycanda əsas işləri nə olacaq?
“Libbi Azərbaycana ABŞ-la münasibətlərimizdə gərginliyin yaşandığı bir şəraitdə səfir təyin olunub”
Sözügedən məsələyə aydınlıq gətirən politoloq Elşən Manafov “Bakı-Xəbər”ə açıqlamasında bununla bağlı bir sıra məqamlara toxundu: “ABŞ-ın Azərbaycandakı səfirinin fəaliyyət müddəti ötən ilin iyununda başa çatıb. Azərbaycana səfir təyin edilmiş Mark Libbinin namizədliyi ABŞ prezidenti Bayden tərəfindən keçən ilin 25 mayında Konqresin Xarici Əlaqələr Komitəsinə təqdim edilib. Lakin Konqres tərəfindən təsdiqini tapmamışdı. Konqres onun namizədliyi ilə bağlı təklifi bu ilin 3 yanvarında Bayden adminstrasiyasına qaytarıb. Lakin elə həmin gün Dövlət Departamenti tərəfindən Libbinin namizədliyi irəli sürülüb. Bu fakt Libbiyə Ag Ev və Dövlət Departamentinin yüksək kuluarlarında dəstək verən ciddi qüvvələrin olmasından xəbər verir. Bütün hallarda Ag Ev, Dövlət Departamenti ilə birlikdə Konqresdə əsasən respublikaçıların qurmuş olduğu səddi adlamağa müvəffəq olub. Libbi Azərbaycana ABŞ-la münasibətlərimizdə gərginliyin yaşandığı bir şəraitdə səfir təyin olunub. Səfir olaraq onun burada ABŞ-ı təmsil edəcəyi, onun maraqlarını qoruyacağı birmənalıdır. ABŞ-ın Azərbaycanla münasibətlərdə müəyyən etdiyi siyasi kursun bölgənin yeni geosiyasi reallıqları konteksində həyata keçirilməsi Libbinin başçılıq edəcəyi diplomatik heyətin əsas vəzifəsi olacaq. Hazırda ABŞ Azərbaycan və Ermənistan arasında münasibətlərdə vasitəçilik etməyi, rəsmi Bakıya Ermənistanla Qərb formatı çərçivəsində sülh müqaviləsini imzalamağı təklif edir. Rusiyanın Cənubi Qafqazın regional təhlükəsizlik problemlərinin həllində imkanlarının məhdudlaşdırılması, onun regiondan uzaqlaşdırılması üçün amerikalı diplomatın rəsmi Bakı ilə əməkdaşlıq münasibətlərinə gedəcəyi birmənalıdır, Azərbaycanın İranla coğrafi anlamda yaxınlığı da ABŞ üçün həmişə prioritet əhəmiyyətli gerçəklik olub. Bu istiqamətdə, habelə rəsmi Bakının Qərbə inteqrasiyası, həmişə olduğu kimi, yenə də ABŞ-ın diplomatiyası üçün önəmli olacaq. Libbinin diplomatik fəaliyyət sahəsində təcrubəsi olsa da, fövqəladə səfir kimi yeni ampluada Vaşinqtonun onu məhz Bakıda sınaqdan keçirməyi qərara alması ona olan yüksək etimadın göstərici kimi mühüm əhəmiyyət kəsb edəcək hadisədir. Rəsmi Bakı yəqin ki, bu amildən milli maraqlarımız kontekstində istifadə etməyə çalışacaq”.
Vidadi ORDAHALLI
