Alimlərimizin də məqalələrini Vikipediyadan silməyə başlayıblar...

“Vikipediya”dan azərbaycanlı alimlərin də, şair və yazıçıların da məqalələrinin silinməyə başlandığı barədə sosial şəbəkələrdə məlumatlar yayılıb. 

“Vikipediya”dan məqaləsi silinən alim, professor və ziyalıların bir neçəsinin adları ictimailəşdirilib. Filologiya üzrə fəlsəfə doktoru, ictimai fəal Elyar İslamoğlu öz feysbuk səhifəsində onların siyahını təqdim edib. 

1.Tarix üzrə fəlsəfə doktoru, dosent Ziyad Əmrahov, Tarix və Etnologiya İnstitutunun Qərbi Azərbaycan Tarixi şöbəsinin aparıcı elmi işçisi

2. Cavid Bağırzadə, Tarix üzrə fəlsəfə doktoru, dosent, GDU, Sosial fənlər kafedrasının müdiri

3. Fuad Süleymanov, ARDNŞ Təlim və Tədris İdarəsinin rəisi, texniki elmlər üzrə fəlsəfə doktoru, "Əməkdar mühəndis", beynəlxalq sertifikatlara malik neftçi 

4. Rizvan Hüseynov, siyasi şərhçi, analitik, tarixçi,Qafqaz Tarixi Mərkəzinin direktoru, UNESCO-nun fəxri professoru 

5. Fərhad Cabbarov, tarix elmləri doktoru, dosent, Milli Azərbaycan Tarixi Muzeyinin direktor müavini.

Qeyd edək ki, erməni faşizmini ifşa edən əsərlərin, kitabların müəllifi olan yazıçı Aygün Həsənoğlunun da barəsində olan məqalə silinib. Elm və Təhsil Nazirliyinin İqtisadiyyat İnstitutunun şöbə müdiri., i.e.d., dosent, tanınmış şairə Rəsmiyyə Sabirin də (Abdullayeva) vikipediya məqaləsi silinib. Bu barədə feysbukda onlar özləri yazıblar. 

Rəsmiyyə Sabir: “Bu məqalələri niyə sildiklərinə, bunu hansı məqsədlə etdiklərinə  açıqlama verməlidirlər” 

Rəsmiyyə Sabir “Bakı-Xəbər”ə bildirdi ki, onun haqqında məqalənin silinməsini təsadüfən bilib və təəccüblənib: “Bir müddət əvvəl bir mövzu ilə bağlı google-də  axtarış vermişdim. Adətən axtarışlarda birinci “Vikipediya” məqalələri çıxır. Barəmdəki məlumatları yeniləmək üçün öz “Vikipediya” məqaləmə baxdım. Bu məqaləni köməkçim yaratmışdı, o, həm də elmi rəhbəri olduğum doktorantdır. Məqaləm açılmadı, səbəbini axtarmağa başladım. Doktorantımdan xahiş etdim ki, “Vikipediya”ya yazıb məqalənin açılmamasının səbəbini soruşsun. Ordan da bizə cavab gəldi ki, sizin akademik dərəcəniz uyğun olmadığı üçün məqalə silinib. Bilirsiz ki, mən iqtisad elmləri doktoruyam və ən mötəbər bazalarda 150-yə yaxın elmi əsərim var. Sonra bəzi fəlsəfə doktoru olan şəxslər barəsində olan məqalələrə baxdım, gördüm ki, onların məqələsi silinməyib, amma elmlər doktoru olduğum halda mənim məqaləm silinib. Onlar deyirdilər ki, orada professorlar barədə məqalə ola bilər.  Amma sonra gördüm ki, orda elə adamların məqaləsi var, onlara heç toxunulmayıb, elmlər namizədlərinin məqalələri qalıb, mən isə elmlər doktoruyam. Buna görə bildim ki, burada subyektiv amillər var. Amma açıqlamalıdırlar ki, nə üçün siliblər, səbəb nədir, qərəzləri nədir? 

Mən, sözün düzü, bu məsələni daha sonra araşdırmaq istəyirdim. Amma bir qrup gəncimizi gördüm. Biz həmişə gəncliyə gələcəyə aparan qüvvə kimi baxmışıq. O gənclərin 3 min şəhid barədə məqaləni silməsini çox ürək ağrısı ilə qarşıladım. Bizi siləndə bu bizə çox ağır təsir etməyə bilər, amma şəhidlər barədə məqalələrin silinməsi mənə qat-qat pis təsir etdi ki, onları biz yaşatmalıyıq. Hardan silirlər-silsinlər, onsuz tarix onları yaşadacaq…

Azərbaycan əsgərinə yazdığım şeirdə:

“Sən Vətən torpağında silinməyən bir izsən”-demişəm.

Bu vətən, bu torpaq üçün canı, qanı ilə döyüşən, şəhid olan, yaxud qələmi ilə vuruşan elm adamlarını heç zaman tarixdən silə bilməyəcəklər. Onların bu davranışını pisləyirəm. Bu məqalələri niyə sildiklərinə, bunu hansı məqsədlə etdiklərinə  açıqlama verməlidirlər. Təkcə biz deyilik ki. Bizdən başqa da görün nə qədər adamın səhifəsi silinib… “-deyə R.Sabir bildirdi.

Müsahibimiz qeyd etdi ki, bu məqalələrin silinməsi ilə bağlı məsələ KİV-də ətraflı müzakirə olunmalı və bunun səbəbinə aydınlıq gətirilməlidir, xüsusən də şəhidlərimizə qarşı edilən bu davranışa qanunvericiliyə uyğun tədbir görülməlidir. 

Aygün Həsənoğlu: “Təəssüf ki, “Vikipediya”dan Azərbaycanın millətçi, vətənsevər ziyalılarına qarşı belə açıq hücum başlanıb” 

Yazıçı Aygün Həsənoğlu da bildirdi ki, yazısının silinməsini bir neçə gün əvvəl görüb, amma əvvəlcə problemin bilgisayarda olduğunu, yaxud bunun texniki problemdən qaynaqlandığını düşünüb. “Düşündüm ki, yəqin yeniləmə olacaq və məqaləm yenidən yüklənəcək. Ancaq yüklənmədi. Elə bu vaxt 3 min şəhidimizin məqaləsinin silindiyi barədə məlumatı oxudum. Doğrudan da təəccübləndim ki, buna necə cəsarət ediblər. Bu ölkənin oğulları, Azərbaycan ordusunun əsgərləri Vətən üçün döyüşüb şəhid olublar. Kimin nə ixtiyarı var ki, şəhidlərimiz barədə yazıları və şəkilləri silsin, şəhidlərimizin xatirəsini əks etdirən hanısa materialı yox etsin? O yazıları silənlər Vətən qarşısında nə ediblər? Onların nə ixtiyarı var ki, Azərbaycan dövlətinin maraqlarını müdafiə edən, ərazisini qoruyan əsgərin adını silib. Yaxud da “Vikipediya”da səlahiyyəti olanların nə  ixtiyarı var ki, Aygün Həsənoğlunun məqaləsini silib? Yəni belə bir yetkini, belə bir səlahiyyəti onlara kim verib? Onlar nə etmək istəyirlər, bizi tarixdənmi silmək niyyətindədirlər? Bununla tarixdən kimisə silmək mümkündürmü? Yeri gəlmişkən, əvvəllər mən bunun erməni məsələsi ilə məşğul olduğuma görə olduğunu düşündüm. Amma mənə xəbər gəldi ki, şair, tərcüməçi və elmlər doktoru, professor Rəsmiyyə Sabirin də səhifəsi silinib. Cavab olaraq bildirilib ki, elmi dərəcən standarta tam cavab vermir. Başa düşə bilmirəm, elmlər doktoru dərəcəsi “Vikipediya”çıların hansı standartlarına cavab vermir? Yaxud Aygün Həsənoğlunun kitabları, məqalələrinin adları hansı standartlara cavab vermir? Təəssüf ki, “Vikipediya”dan Azərbaycanın milliyyətçi, vətənsevər ziyalılarına qarşı belə açıq hücum başlanılıb. Çünki mən orada elə yazıçıların, hətta namizədliyi olmayan elmi işçilərin məqalələrini gördüm və çox təəccübləndim. Bu adamlar ki, bir-iki kitab, bir neçə məqalə yazıblar,  amma onlara aid məqalələr saxlanılıb, tanınmış, cəmiyyətdə vətənpərvərliyi, Vətənə, dövlətə sədaqəti ilə seçilən insanların səhifələri silinib. Bunu edən kimdir? Mənə elə gəlir ki, bu artıq starteji məsələdir, bu, Azərbaycan Dövlət Təhlükəsizlik Xidməti tərəfindən araşdırılmalıdır.

Yeri gəlmişkən, professor Abid Tahirlinin də səhifəsi silinib. Abid müəllim vətənpərvərliyi, ziyalılığı ilə seçilən, xüsusən də mühacirət ədəbiyyatının araşdırılmasında xidməti olan şəxsiyyətdir. Kifayət qədər də məqalələri, kitabları var. Çox qəribə bir məsələdir ki, belə bir alim barədə də məqalə “Vikipediya”dan silinib”-deyə A.Həsənoğlu bildirdi.

İradə SARIYEVA