Rusiyaya ixrac olunan meyvə-tərəvəz bu cür yoxlanılır - bəs özümüzə satılanlar?...
Son zamanlar Azərbaycandan Rusiyaya ixrac olunan bəzi kənd təsərrüfatı mallarının geri qaytarılması ilə bağlı xəbərlər diqqət çəkir. Ölkəmizin, xüsusilə pomidor ixracında maneələrlə qarşılaşdığına şahid oluruq. Xaricdən geri qayıdan məhsulların tərkibində əksər hallarda bitkiçilik üçün təhlükəli mikroorqanizmlər olur.
Məlumata görə, ötən həftə Azərbaycandan Rusiyaya ixrac olunan 47 ton pomidor və 14 ton çiyələk saxlanılıb. Ümumilikdə, ölkə ərazisindən Rusiyaya 61 ton bitki məhsulunun ixracı qadağan edilib.Bu hal tez-tez kartof və digər tərəvəzlərlə də qeydə alınır. Baş verən hadisələr göstərir ki, xaricə göndərilən meyvə-tərəvəzin tərkibi ciddi şəkildə yoxlanılır. Maraqlıdır, eyni prosedur ölkə daxilində satılan meyvə-tərəvəzə də tətbiq olunurmu? Yəni daxildə satılan meyvə-tərəvəz ciddi şəkildə yoxlanılırmı?
Kamran Məmmədli: “Ölkə bazarında satılan meyvə-tərəvəz məhsullarının keyfiyyəti istənilən səviyyədə yoxlanılmır”
Iqtisadçı Kamran Məmmədli “Bakı-Xəbər”ə açıqlamasında bildirdi ki, ölkə bazarında satılan meyvə- tərəvəz məhsullarının keyfiyyəti istənilən səviyyədə yoxlanılmır. Qida həm təhlükəli ola bilər, həm də keyfiyyətsiz: “Aidiyyəti qurumlar daxildə satılan meyvə-tərəvəzin tərkibini ciddi şəkildə yoxlamır. Elə buna görə də bu gün mədə-bağırsaq, onkoloji xəstəliklərdən əziyyət çəkənlərin sayı artır. Xarici ölkəyə ixarc olunan hər bir məhsul yoxlanılır. Bizdə isə yola verirlər”.
Eyyub Hüseynov: “Bazarlarda açıq satılan məhsullar yoxlanılmır”
Azad İstehlakçılar Birliyinin sədri Eyyub Hüseynovun sözlərinə görə, hər il rəhbərlik etdiyi birliyin xətti ilə sadə aparatlarla qarpız və yemişlərin tərkibi yoxlanılır. Bu tərəvəzlərin tərkibində nitratların miqdarı çoxdur: “Nitrat bağırsaq mikroorqanizmlərinin fəaliyyətində kəskin zəhər olan nitritə çevrilir. Alınan bu maddə orqanizmdə maddələr mübadiləsində iştirak edərək insan və heyvanlar üçün ciddi təhlükə yaradır. Nitrat suda, torpaqda və nəhayət, bitkinin bütün orqanlarında həddən artıq toplanır. Bu isə azot gübrəsinin torpağa tələb olduğundan artıq verilməsi ilə bağlıdır. Qarpız və yemişin tərkibində nitratlar ildən-ilə azalsa da, hələ istənilən səviyyədə deyil. İnsanlar hansı kənd təsərrüfatı məhsulunun tərkibində nə olduğunu bilmirlər. Onu yalnız laboratoriyalar araşdırır. Ona görə də vətəndaşlar nəinki daxili bazarda yoxlanmayan, hətta xarici bazardan da geri qaytarılan məhsulları tükədirlər. Bazarlarda açıq satılan məhsullar yoxlanılmır. Məsələn, Azərbaycanda daim fındıq və qozun tərkibində göbələklər olur ki, bu, insan sağlamlığı üçün təhlükəlidir. AQTA ilə fermer təsərrüfatları sıx işləməli, güclü nəzarət olmalıdır”.
Günel CƏLİLOVA
