İstehsalata cəlb olunmuş tələbələrə niyə də vergi güzəşti edilməsin?!...
Nizami Hüseynov: “Müəssisələrin bu işdə maraqlı olması üçün müəyyən vergi güzəştləri tətbiq olunmalıdır”
Hər bir ölkənin tərəqqisini şərtləndirən mühüm amillərdən biri milli təhsilin inkişafıdır. Bir çox ölkələrin təcrübəsinə nəzər saldıqda görürük ki, təhsil sahəsində sistemli və kompleks xarakterli tədbirlərin həyata keçirilməsi ümumi inkişafa xidmət edir, qarşıya qoyulan strateji hədəflərə çatmağa imkan yaradır.
Ölkədə həyata keçirilən islahatlar, müasir infrastrukturun yaradılması nəticəsində təhsil sahəsində də yeni keyfiyyət dəyişiklikləri yüksək səviyyədə təmin olunub. Təsadüfi deyil ki, son illər ərzində təhsilin maddi-texniki bazasının böyük dərəcədə yenilənməsi artıq həll olunub, 3500-dən çox məktəb ya yenidən tikilib, ya da əsaslı təmir edilib. Azərbaycanda təhsil infrastrukturunun yenilənməsi bilavasitə dövlət əsaslı vəsait qoyuluşu hesabına həyata keçirilir.
Onu da qeyd etmək lazımdır ki, XXI əsrin çağırışları və yeni trendlərinə müvafiq olaraq təhsil sahəsində islahatlar çərçivəsində peşə təhsilinin müasirləşdirilməsi istiqamətində də məqsədyönlü tədbirlər həyata keçirilir. Bir neçə il öncə Azərbaycanda peşə təhsilinin inkişafı üçün yeni dövlət agentliyi təsis olunub. Dövlət peşə təhsili müəssisələrinin büdcədənkənar gəlir və xərclərinin şəffaf, səmərəli və mərkəzləşdirilmiş qaydada idarə olunmasının təmin edilməsi və peşə təhsilinin inkişafında maliyyələşmə mexanizmi rolunu oynamasının həyata keçirilməsi məqsədilə Peşə Təhsilinin İnkişafı Fondu yaradılıb, peşə təhsili sahəsində bir sıra normativ hüquqi aktlar hazırlanıb. Bu sahənin inkişaf etdirilməsi üçün Vergi Məcəlləsinə dəyişiklik aparılması gözlənilir. Peşə Təhsili üzrə Dövlət Agentliyinin direktoru Ceyhun Kərəmov “Effektiv kommunikasiya” mövzusunda keçirilən seminarda çıxışı zamanı qeyd edib ki, istehsalata cəlb olunan tələbələrin aldıqları müavinətlərə müəyyən vergi güzəştlərinin tətbiq edilməyini istəyirik. Bu, gəlir kimi yox, xərc kimi qeydə alınmalıdır. Elə edilməlidir ki, müəssisələr də gənc kadrları cəlb etməkdə maraqlı olsunlar. Hazırda özəl müəssisələr tələbələri istehsalat təcrübəsinə cəlb etməkdə maraqlı deyillər.
“Peşə təhsilinə marağı artırmaq üçün həm də yeni innovativ vasitələrdən, mütərəqqi modellərdən istifadə etmək lazımdır”
Mövzu ilə bağlı fikir bildirən təhsil eksperti Nizami Hüseynov “Bakı-Xəbər”ə açıqlamasında qeyd etdi ki, peşə təhsilinin inkişafı göz önündədir. Bu istiqamətdə görülən işlər mütləq vurğulanmalıdır. Peşə təhsilini inkişaf etdirmək, gəncləri cəlb etmək üçün müəyyən addımlar atılmalıdır: “Peşə təhsilinə nə qədər gənc cəlb olunarsa, bir o qədər əmək bazarının zəruri yönləri ilə bağlı kadr təminatımız artacaq. Müəsisələrin bu işdə maraqlı olması üçün müəyyən vergi güzəştləri tətbiq olunmalıdır”.
Ekspert hesab edir ki, peşə təhsilinə marağı artırmaq üçün həm də yeni innovativ vasitələrdən, mütərəqqi modellərdən istifadə etmək lazımdır. Birincisi müasir trendlərə uyğun və yaxud zamanın tələb etdiyi peşələri müəyyənləşdirmək, onları inkişaf etdirmək, ikincisi isə, peşə təhsilini stimullaşdırmaqdır. Ölkəmizdə bu istiqamətdə müvafiq addımların atılması bu sahədə dinamizmin təmin olunmasına xidmət edəcək. Yeni yaradılan peşə məktəblərində də hər bir sahə üzrə gənc, peşəkar mütəxəssislər yetişdiriləcək. Bu, həm də bölgələrin sosial-iqtisadi inkişafına mühüm töhfə kimi olduqca böyük önəm kəsb edəcək.
Günel CƏLİLOVA
