Parisdə Azərbaycan Bayrağına təcavüz edildi...
Kənan Məstəliyev: “Çünki Azərbaycana qarşı ikili standartlar, birmənalı münasibətlər ilk gündən başlayıb”
Paris-2024 Yay Olimpiya Oyunları zamanı Azərbaycan idmançısına qələbəni bayraqla qeyd etməyə icazə verilməyib. Yayılan görüntülərdə azərbaycanlı cüdoçu Hidayət Heydərovun qələbə yürüşünün dövlət bayraqları ilə edilməsinə icazə verilmədiyi əks olunub.
Müqayisə üçün qeyd edək ki, ABŞ və Yaponiya idmançılarının qələbəni bayraqla qeyd etdikləri görünür. Lakin fransız qadın əməkdaşlardan birinin azərbaycanlı idmançıdan bayrağı almağa çalışdığı müşahidə edilir.
Bu təxribat Ermənistanı öz “bacısı” adlandıran Fransanın Azərbaycana qarşı mövqeyindən qaynaqlana bilərmi? Belə çirkin siyasi ambisiyaları idmana qatmaq nə dərəcədə doğrudur?
İdman mütəxəssisi Kənan Məstəliyev “Bakı-Xəbər”ə açıqlamasında bildirdi ki, bunu Fransanın bilərəkdən atdığı addım hesab etmək olar: “Bunun bir neçə səbəbi var. Obyektiv olmaq üçün hər iki tərəfin mövqeyini bildirmək lazımdır. Bayraq məsələsi ilə bağlı problemlər hər zaman olub. Bayraqla bağlı xüsusi qaydalar var ki, o qaydalara riayət olunması vacibdir. Qazaxıstan və Azərbaycan idmançısının bayrağı dalğalandırmasına mane olunması, eyni addımın Yaponiya və Amerikaya qarşı atılmamasını belə izah etmək olar ki, yaponlar və amerikalılar bu bayrağı yarış məkanı deyilən yerdə dalğalandırıblar. Həmin vaxt da dayanıb şəkil çəkdiriblər. Həm bizim, həm qazaxıstanlı idmançı azarkeşlərlə görüş zamanı bunu etmək istəyib. Sırf bu səbəbdən də qadağa ola bilər. Ancaq məsələ nədən ibarətdir? 2024 Olimpiya oyunlarının yarışlarının keçirilmə əsasnaməsində, 13 - cü maddənin b bəndində qeyd olunur ki, idmançılar özləri ilə mükafatlandırma mərasiminə heç bir əlavə aksesuar gətirə bilməz. Bunların içərisində telefon, bayraq da var. Əgər bayraq gətirmək olmazsa, necə olur ki, həmin bayraqla yaponlar, amerikanlılar şəkil çəkdirə bilir, ancaq azərbaycanlılar şəkil çəkdirə bilmir? Düşünürəm ki, bu, qaydaların pozulmasıdır, buna uyğun olaraq Paris 2024 olimpiya oyunlarının təşkilat komitəsi, Beynəlxalq Olimpiya Komitəsinin yarışlarda cavabdeh olan təşkilat komitəsi ən azından kiçik də olsa izah verməlidir. Ola bilər ki, cüdo yarışlarında durumun başqa, gimnastikada, futbolda başqa olduğunu deyə bilərlər. O da ola bilər ki, idman növündən fərqli olaraq, bayraqla bağlı qaydalar dəyişə bilər. Ancaq bu barədə mütləq bir izah verilməlidir. Çünki Azərbaycana qarşı ikili standartlar, birmənalı münasibətlər ilk gündən başlayıb. Onların bizə münasibəti məlumdur. Bayraq məsələsindən sonra ikili standartlara gəlib çıxır. Qarşı tərəfin, Paris Olimpiadası və Beynəlxalq Olimpiya Komitəsinin bununla bağlı hər hansı bir izahat verməsi lazımdır”.
Fransa bütün hüquq və əxlaq normalarını aşaraq ölkəmizə qarşı qərəzli siyasətini davam etdirir. Rəsmi Paris beynəlxalq təşkilatlarda ona verilmiş statusdan sui-istifadə edərək dövlətimizə qarşı əlinə düşən hər fürsətdən yararlanmağa çalışaraq qarayaxma kampaniyası aparır. Öz maraqları üçün başqa xalqları əzməyə, onların milli–mənəvi dəyərlərini məhv etməyə, təbii sərvətlərini mənimsəməyə və kolonialist siyasətini həyata keçirməyə vərdiş etmiş Fransa, Prezident İlham Əliyevin bildirdiyi kimi, Azərbaycanın Cənubi Qafqazda hadisələri dəyişdirməsi nəticəsində düşdüyü məğlubiyyətini qəbul edə bilmir.
Məhəmmədəli QƏRİBLİ
