Əliyev Türk dövlətlərinə və Körfəz ölkələrinə görünməmiş yol göstərdi…
Günay Hüseynova: “KƏŞ-lə türkdilli ölkələrin də bu mexanizm üzərindən əməkdaşlığı unikal imkan sayıla bilər”
Prezident İlham Əliyev Körfəz Əməkdaşlıq Şurasının Baş katibi Casim Məhəmməd əl-Budeyvini qəbul edib. Körfəz Əməkdaşlıq Şurasının SPECA-nın Zirvə görüşündə iştirakını yüksək qiymətləndirən Prezident İlham Əliyev Körfəz Əməkdaşlıq Təşkilatına üzv ölkələrin dövlət başçıları ilə şəxsi dostluq əlaqələrinin olduğunu, bu ölkələrlə müxtəlif sahələrdə əməkdaşlığın uğurla inkişaf etdiyini bildirərək, investisiyalar, bərpaolunan enerji, turizm və digər sahələrdə əməkdaşlığın daha da genişləndirilməsi üçün böyük perspektivlərin mövcudluğunu qeyd edib.
Dövlət başçısı Mərkəzi Asiya ölkələrinin və Azərbaycanın SPECA ilə yanaşı, Türk Dövlətləri Təşkilatı çərçivəsində bir araya gəldiklərini, Türk Dövlətləri Təşkilatı və Körfəz Əməkdaşlıq Şurası arasında da təsisatlanmış əməkdaşlığın qurulmasının vacibliyini qeyd edib.
Prezident Əliyevin Türk dövlətlərinə və Körfəz ölkələrinə əməkdaşlıq üçün göstərdiyi yol hansı perspektiv vəd edir?
İqtisadçı Günay Hüseynova “Bakı-Xəbər”ə açıqlamasında bildirdi ki, bu yaxınlarda Səudiyyə Ərəbistanının paytaxtı Ər-Riyad şəhərində “Körfəz Ərəb Dövlətləri - Mərkəzi Asiya üzrə Əməkdaşlıq Şurası" strateji dialoqunun ilk nazirlər iclası keçirildi. Bu, iki region ölkələri arasında dövlət başçıları müstəvisində keçirilən ilk sammit oldu. Sammitdə iştirakçı dövlətlər arasında 2023-2027-ci illəri əhatə edən dövrdə strateji dialoq və əməkdaşlıq üzrə Birgə Fəaliyyət Planı təsdiq edildi. Birgə Fəaliyyət Planı siyasi sabitlik, dialoqun gücləndirilməsi, iqtisadiyyat və investisiya sahəsində qarşılıqlı fəaliyyət, eləcə də səmərəli tərəfdaşlıq əlaqələrinin qurulması məsələləri üzərində işləməyi nəzərdə tutur. Körfəz Əməkdaşlıq Şurası ölkələri - Səudiyyə Ərəbistanı, Birləşmiş Ərəb Əmirlikləri, Qətər, Bəhreyn, Oman, Küveytin Mərkəzi Asiya respublikaları - Qazaxıstan, Qırğızıstan, Özbəkistan, Türkmənistan, Tacikistanla ciddi iqtisadi əməkdaşlığı var. Mərkəzi Asiya ölkələrində əsas investor KƏŞ ölkələrindən BƏƏ-dir. Təkcə ötən il Qazaxıstana BƏƏ sərmayələrinin həcmi demək olar ki, 420 milyon dollar təşkil edib. Həmçinin, Birləşmiş Ərəb Əmirlikləri Qazaxıstanın Xəzər dənizindəki liman infrastrukturuna investisiya qoymaq niyyətindədir.
Səudiyyə Ərəbistanı ilə müqayisədə BƏƏ Özbəkistana daha çox sərmayə qoyan ölkədir. Özbəkistanda BƏƏ iş adamları enerji sektoruna, xüsusən də bərpa olunan enerji mənbələrinin - külək və günəş stansiyalarının, qazla işləyən istilik elektrik yarımstansiyalarının tikintisi və quraşdırılmasına fəal şəkildə sərmayə qoyurlar. Diqqət etsək görərik ki, KƏŞ-lə əməkdaşlıq edən Mərkəzi Asiya ölkələrinin Tacikistan istisna olmaqla hamısı Türk Dövlətləri Təşkilatında təmsil olunur. Bu baxımdan da, KƏŞ-lə türkdilli ölkələrin də bu mexanizm üzərindən əməkdaşlığı unikal imkan sayıla bilər. Prezident İlham Əliyev çox unikal əməkdaşlıq modeli təklif edib. Bunun lazımi şəkildə dəyərləndirilməsi bütün ölkələr üçün faydalı olar”.
Məhəmmədəli QƏRİBLİ
