Ermənistanı sərhəd danışıqlarına təşviq edən Qərbin örtülü maraqları var...
Turab Rzayev: “Nəticədə Ermənistan Rusiya hərbi bazasını öz ərazisindən çıxarıb, Qərbə inteqrasiya edəcək”
Əldə olunan razılaşmaya əsasən, noyabr ayının 30-da Azərbaycanla Ermənistan arasında sərhəd bölgəsində dövlət sərhədinin delimitasiyası və sərhəd təhlükəsizliyi məsələləri üzrə Komissiyanın növbəti 5-ci iclası keçiriləcək.
Ermənistan XİN Azərbaycanla noyabrın 30-da iki ölkənin sərhədində delimitasiya ilə bağlı görüşün keçirilməsi barədə razılığa gəlindiyi barədə məlumatı təsdiqləyib.
Xatırladaq ki, bir müddət əvvəl Azərbaycan Ermənistana sərhədyanı bölgədə təkbətək görüş keçirilməsini təklif etmişdi. Noyabrın 22-də rəsmi İrəvan sərhədlərin delimitasiyası üzrə komissiyanın iclasının keçirilməsinə razılıq veib.
Bəlli olur ki, Azərbaycan və Ermənistanın sərhədin delimitasiyası üzrə komissiyaları noyabrın 30-da sərhəddə görüşəcək. Bu, Bakının sülh danışıqlarının sərhəddə aparılmasına dair təklifinin tam həyata keçirilməsi anlamına gələ bilər.
Sərhəd görüşünə razı olduğunu Ermənistanın da rəsmən təsdiqləməsi bəzi sualları ortaya çıxarır. Bəllidir ki, Ermənistan Qərbin sözü ilə oturub-durur. Belə olan təqdirdə, Qərb üçün belə format niyə cəlbedici görünür? Çünki sərf etməsəydi, Ermənistana 30 noyabr görüşünü keçirməyə imkan verməzdi.
Siyasi şərhçi Turab Rzayev “Bakı-Xəbər”ə açıqlamasında bildirdi ki, Azərbaycanla Ermənistan arasında olan sülh danışıqları, xüsusilə sərhədlərin delimitasiya və demarkasiyasında ən maraqlı tərəf Qərbdir: “Qərb bu niyyətini gizlətmir. Məhz Qranada sammitinin, daha sonra ölkələrin Vaşinqtona dəvət edilməsinin də altında yatan əsas məqsəd budur. İstəyirlər ki, iki ölkə artıq sülh müqaviləsi imzalasın. Çünki Qərb Ermənistanın Rusiyadan uzaqlaşıb Qərbə inteqrasiya etməsini istəyir. Ermənistan Azərbaycanla delimitasiya və demarkasiya məsələsini həll etməsə, sülh müqaviləsi imzalanmasa münaqişələrin yaranma risqi var. Mümkündür ki, müharibə yenidən başlasın. Bu da dolayı yolla Ermənistanın Rusiyadan uzaqlaşıb Qərbə yaxınlaşma prosesini baltalayır. Bu isə Ermənistanın indiki hakimiyyətinə təhlükə törədə bilər. Hətta Avropa İttifaqının sonuncu xəbərdarlığı bununla bağlı idi ki, Azərbaycan Ermənistana qarşı sərhəddə hansısa əməliyyata başlasa, bunun çox ağır nəticələri olacaq. Avropa İttifaqı qorxur ki, başlayacaq olan hər hansı bir əməliyyat Ermənistanın, Paşinyan hakimiyyətinin məğlubiyyəti ilə nəticələnəcək. Ona görə də, Paşinyan hakimiyyətini qarantiyaya almaq, Ermənistanın Atlantik məkana inteqrasiyasına dəstək vermək üçün sərhədlərin delimitasiya və demarkasiyasını istəyirlər.
İkinci Brüssel görüşündə bununla bağlı Avropa İttifaqı tərəflərə yardım da təklif etmişdi. Ermənistana 2,6 milyard avro, Azərbaycana 2,2 milyard avro təklifi olmuşdu. Görüşdən qayıdandan sonra Azərbaycan Prezidenti də sərhədlərin delimitasiya və demarkasiyası ilə bağlı sərəncam vermişdi. Görünür ki, Qərb bu məsələdə ciddidir. Ən azından sərhədlərin delimitasiya və demarkasiyası münaqişə və müharibə risqini azaldır, gələcəkdə də sülh müqaviləsinin imzalanmasına dəstək ola bilər. Qərbin əsas marağı məhz bununla bağlıdır. Rusiya da düşünür ki, sülh olarsa, Ermənistanın Rusiyaya ehtiyacı olmayacaq və Rusiyanın Ermənistana təzyiq imkanları azalacaq. Nəticədə Ermənistan Rusiya hərbi bazasını öz ərazisindən çıxarıb, Qərbə inteqrasiya edəcək”.
Məhəmmədəli QƏRİBLİ
