Adi kənd toyuqları məsələsində də idxaldan asılıyıq...
Protein anbarı olan toyuq ətinin qidalanmada vacib yeri var. Bu gün istehlakçılar diri kənd toyuğu ilə yanaşı, broyler toyuğundan da istifadə edir. Ancaq əhali daha çox kənd toyuğuna üstünlük verir. Yerli diri toyuq daxili təlabatı tam ödəmədiyi üçün Azərbaycana kənd toyuqları həm də xaricdən idxal olunur.
Bu ilin yanvar-mart aylarında Azərbaycan xarici ölkələrdən çəkisi 185 qramdan artıq olmayan 3 milyondan çox diri ev toyuqları idxal edib. Maraqlıdır, kənd toyuqlarına olan tələbatı niyə ödəyə bilmirik?
Mürvət Həsənli: “Quşlar arasında yayılan xəstəliklərlə əlaqədar müəyyən çəkiyə qədər olan diri toyuqların yerli bazara idxalı qadağandır”
Quş əti, Yumurta İstehsalçıları və İxracatçıları Assosiasiyasının sədri Mürvət Həsənli “Bakı-Xəbər”ə açıqlamasında bildirdi ki, quşlar arasında yayılan xəstəliklərlə əlaqədar müəyyən çəkiyə qədər olan diri toyuqların yerli bazara idxalı qadağandır. Ölkəyə ancaq Türkiyə və Gürcüstandan 80 qrama kimi olan cücələr gətirilir: “Dekorativ toyuq idxal oluna bilər. Bizə yalnız 1 günlük cücə və damazlıq cücə idxal olunur. İstehlakçılar kənd toyuğuna daha çox üstünlük verir. Organik olduğu üçün kənd toyuğu çox istehlak edilir. Bununla bağlı kəndlərdə sənaye üsulu ilə az bir miqdarda olsa da istehsal var”.
Akif Nəsirli: “Daxildə diri toyuğa olan tələbat tam ödənilmədiyi üçün idxal olunur”
Liberal İqtisadçılar Birliyinin sədri Akif Nəsirli “Bakı-Xəbər”ə şərhində bildirdi ki, daxildə diri toyuğa olan təlabat tam ödənilmədiyi üçün idxal olunur: “Diri toyuq idxalının artmasının səbəblərindən biri sahibkarların istəyi ilə bağlıdır. Sahibkar fəaliyyət göstərdiyi sahə üzrə idxal məhsula üstünlük verir. Məsələn, sahibkar Avropa toyuğu satmaqla özünə müştəri cəlb edib, müəyyən bazar formalaşdırıb. Bu baxımdan ölkə daxilində təlabat qədər toyuq istehsal olunsa da idxal olunur. Hindistan çayı ilə məşhur olsa da bu ölkəyə bir sıra ölkələrin çayı idxal olunur. Bu səbəbdən də toyuq idxalının artması normaldır”.
Günel CƏLİLOVA
