İllər qabaq inanırdı ki, Memorial və Soyqırım abidəsi Xocalının özündə olacaq...
Zaur Əliyev: “Memorial Kompleksin yaradılmasında məqsəd bizdən sonra gələcək nəsillərin xatirəsini yeniləməkdir”
Məlumdur ki, ölkə başçısı İlham Əliyev öz ad günlərini, əlamətdar bayram günlərini işğaldan azad olunmuş ərazilərdə xalqla birgə keçirir və bu zaman verdiyi şad xəbərləri ilə hər kəsi sevindirir. Belə ki, Prezident İlham Əliyev ailəsi ilə birlikdə Müstəqillik Günü - mayın 28-də Xocalı şəhərində 15 çoxmənzilli binada təmir və yenidənqurmadan sonra yaradılan şəraitlə tanış olub.
Həmin gün ölkə başçısı Xocalı Soyqırımı Memorial Kompleksi barədə də sakinlərə məlumat verib: "Xocalı soyqırımı memorial kompleksinin yaradılması ilə bağlı uzun illər məsələlər müzakirə edilirdi, hətta yer də seçilmişdi, "Ana fəryadı" abidəsinin yanında. Layihə də hazırlanmışdı. Ancaq hər il mən son təsdiqimi vermirdim. Çünki ürəyimdə saxlayırdım ki, bu memorial kompleks Xocalıda yaradılmalıdır. Və belə də oldu. Həmin o layihəni biz gətirdik və 26 fevral günündə Xocalıda, xocalılılarla bərabər Xocalı Memorial Kompleksinin təməli qoyuldu. Və burada inşa ediləcək və bütün dünya da görəcək erməni vəhşiliyi nədir”.
“Yəni gələcək nəsil o abidə vasitəsilə düşmənini tanıyacaq, bu səbəbdən də abidənin qoyulması çox önəmlidir”
Xocalıda Memorial Kompleksin təməlinin qoyulmasının əhəmiyyəti haqqında danışan tarixçi alim, dosent Zaur Əliyev “Bakı-Xəbər”ə açıqlamasında qeyd etdi ki, Memorial Kompleksin yaradılmasında məqsəd bizdən sonra gələcək nəsillərin xatirəsini yeniləməkdir: “Yeni nəsil Xocalı faciəsini ancaq şəkillərdə, kadrlarda görür. 50 ildən sonra həmin şəkillər, kadrlar itəcək. Yaddaşı qorumaq üçün mütləq şəkildə Memorial Kompleksin olması vacibdir. Xaricdən gələn qonaqlar, yeni doğulacaq nəsil o kompleks vasitəsilə nə baş verdiyini anlayacaq. Biz yaddaşımıza çox önəm verməmişik deyə faciələrimiz ardıcıl olaraq davam edib. 1918-cu ildə Bakıda baş vermiş soyqırımla bağlı xatirəs abidəsi qoyulsa idi ermənilər 1992-ci ildə Xocalı faciəsini törətməzdi. Məlumat üçün deyim ki, 1905-cu il faciəsi zamanı minlərlə insan öldürüldü ancaq onların xatirəsini yad edəcək heç nə yoxdur. Eyni zamanda, 1918-ci il faciəsi ilə də bağlı kompeks, yaddaşı təzələyəcək heç nə olmadığı üçün 1965-ci ildə Ermənistan Qarabağda öz separatçı işlərini apardı və uydurma abidə qoydular. Onlar o abidəni qoymaqla gələcək nəslə başa salmaq istədilər ki, bu torpaqlar bizimdi və burda ermənilər öldürülüb. Xocalıda Memorial Kompleksin yaradılmasının üstünlüyü odur ki, gələcəkdə olacaq hadisələrin qarşısı alınacaq. Yəni gələcək nəsil o abidə vasitəsilə düşmənini tanıyacaq. Bu səbəbdən də abidənin qoyulması çox önəmlidir”.
Həmsöhbətimiz hesab edir ki, işğaldan azad olunan ərazilərdə açıq səma altında dağıdılmış muzeylər saxlanılmalıdır. Yaddaşın bərpası üçün dağıdılmış muzeylərin olması önəmlidir.
Günel CƏLİLOVA
