Ermənistan Rusiyanın əleyhinə 3 il sonrakı qərarın anonsunu verdi...
Elşad Həsənov: "Bütün bunlar Ermənistanın addım-addım Rusiyadan aralanmasının göstəricisidir"
Ermənistan 2027-ci ildə MDB Oyunlarına ev sahibliyi etməyə hazır deyil. Bu barədə Ermənistanın elm, mədəniyyət və idman nazirinin müavini Karen Giloyan Gümrüdə MDB-yə üzv ölkələrin Bədən tərbiyəsi və idman Şurasının forumunda deyib.
Giloyan təəssüf etdiyini deyib ki, Ermənistan həmin vaxt üçün başqa böyük idman tədbirlərinə ev sahibliyini planlaşdırır və bunlardan biri də Frankofon İdman Oyunlarıdır. Nazir əlavə edib ki, 2027-ci ildə Ermənistanda habelə Avropa Gimnastika Çempionatı, ağırlıqqaldırma üzrə Dünya Çempionatı və Ümumerməni Oyunları keçiriləcək. Giloyan onu da bildirib ki, İrəvan 2029-cu ilin MDB Oyunlarına ev sahibliyi məsələsini müzakirə etməyə hazırdır.
Nəzərə alsaq ki, 2027-ci ildə keçiriləcək MDB Oyunlarına hələ üç il var, indidən Ermənistanın buna hazır olmadığını bəyan etməsi səmimi görünmür. Çünki 3 il hazırlaşmaq üçün az müddət deyil. Sadəcə, Ermənistan bunu istəmədiyi üçün MDB Oyunlarına ev sahibliyi etməyəcəyini indidən bəyan edir.
"Özlərini sığortalamaq üçün yalandan bəyan edirlər ki, guya 2029-cu ildə məsələyə baxarıq"
Sözügedən məsələni "Bakı-Xəbər"ə şərh edən siyasi ekspert Elşad Həsənov hesab edir ki, bununla Ermənistan Rusiyanın təsirinin böyük olduğu qurumlara qarşı olduğunu ortaya qoyur: "Bu, Ermənistanın növbəti hiyləgər siyasətidir. Artıq Ermənistan il yarımdır ki, Rusiyadan aralanmaq üçün müxtəlif addımlar atır. Onlardan biri 23 noyabr 2022-ci ildə Ermənistanda keçirilən KTMT toplantısında atıldı. Belə ki, həmin vaxt Ermənistan KTMT-nin Kollektiv Təhlükəsizlik Şurasının növbədənkənar sessiyasında yekun sənədə imza atmaqdan imtina etdi. Halbuki, həmin tədbirdə Putin özü şəxsən iştirak edirdi. Eyni zamanda 2023-cü ilin yanvarında Ermənistanda KTMT təlimləri keçirilməli idi. Ancaq rəsmi İrəvan bundan da imtina etdi. Sonra elə oldu ki, KTMT-nin heç bir tədbirinə nə Paşinyan, nə də müdafiə naziri qatılmadı. Bütün bunlar Rusiyadan qopmağın tərkib hissəsidir. Ona görə də Ermənistan 2027-ci ildə MDB Oyunlarına ev sahibliyi etməkdən indidən imtina edir. Özlərini sığortalamaq üçün yalandan bəyan edirlər ki, guya 2029-cu ildə məsələyə baxacaqlar. Çünki bugünkü hakimiyyətin məramı, məqsədi Rusiya təsirindən çıxıb Qərbə yönəlməkdir və onlarla işləməkdir. Bu istiqamətdə də artıq addımlar atılır. Məlum olduğu kimi, aprelin 5-də Brüsseldə Avropa Komissiyasının prezidenti Ursula von der Leyen, ABŞ dövlət katibi Entoni Blinken və Ermənistanın baş naziri Nikol Paşinyan üçtərəfli görüş keçirib. Görüşdə Aİ və ABŞ Ermənistanın iqtisadi dayanaqlığının gücləndirilməsinə dəstəklərini ifadə ediblər. Digər tərəfdən, Ermənistana gizli hərbi yardım vəd edilib. Görünən odur ki, Ermənistan rəsmiləri, siyasiləri tez-tez Avropaya səfərlər edir, NATO ilə görüşlər keçirir. Mərkəzi Kəşfiyyat İdarəsinin təmsilçiləri İrəvana səfər edir, müxtəlif təmaslar qurulur. Bu gün erməni tərəfi çəkinmədən NATO ilə inteqrasiya məsələlərini gündəmə gətirir, birgə təlimlər keçirilir. Halbuki, Ermənistan KTMT üzvüdür. Bütün bunlar Ermənistanın addım-addım Rusiyadan aralanmasının göstəricisidir. Sadəcə, bütün bunları ermənilərə xas hiyləgərliklə həyata keçirirlər".
Vidadi ORDAHALLI
