COP29-a kimi " Həmrəylik paketi" yaradılacaq - məqsəd nədir?..
Elçin İsmayılov: “Bunun həyata keçməsi mühüm bəşəri problemin həllinə töhfə verəcək”
Prezident İlham Əliyev aprelin 26-da Almaniyanın paytaxtı Berlində keçirilən “15-ci Petersberq İqlim Dialoqu”nun Yüksək Səviyyəli Seqmentində iştirakı zamanı “Euronews” telekanalına müsahibə verib.
Müxbirin “Qazıntı yanacağı ideyası ötən il BƏƏ-də keçirilən COP28-də üstünlük təşkil edirdi. Bilmək istərdim, Sizin fikrinizcə, COP tarixində qazıntı yanacağı hasil edən ölkənin dəyişikliklərin edilməsi və keçid prosesində aparıcı rola malik olması müsbət hadisə olaraq qiymətləndirilirmi”, - sualına
Prezident İlham Əliyev cavab verib. Ölkə başçısı bildirib ki, biz məhz buna nail olmağa çalışırıq: “Konfransda verdiyim mesajlardan biri də o idi ki, bizi malik olduqlarımıza görə mühakimə etməyin. Bizi onlardan necə istifadə etdiyimizə, gündəmimizə görə mühakimə edin. Avropadakı, Qoşulmama Hərəkatındakı iştirakımızla bağlı dediklərimdən əlavə, həmçinin bir məsələni da anlamaq vacibdir ki, biz həm də OPEC+ üzv ölkəsiyik. Biz COP-dan əvvəl daha çox maliyyələşməni təmin etmək üçün Azərbaycan və neft hasil edən digər ölkələrin hansı əlavə töhfələri ola bilər kimi həmrəylik paketini yaratmaq üçün bir çox neft hasil edən ölkələrlə işləyirik. Hesab edirəm ki, neft hasil edən ölkələr, xüsusilə neftin qiyməti yüksək olanda problemin öhdəsindən gəlmək üçün daha çox ödəniş etməli və daha çox töhfə verməlidir. Hesab edirəm ki, həmrəylik maliyyələşmənin ayrılmaz hissəsidir”.
Prezident “həmrəylik paketi” deyəndə nəyi nəzərdə tutur?
İqtisadçı Elçin Qurbanov “Bakı-Xəbər”ə açıqlamasında bildirdi ki, Azərbaycan neft-qaz istehsal edən ölkə kimi COP29-da digər dövlətlərə örnək ola bilər:
“Prezidentin bu müsahibəsi Azərbaycanın neft-qaz istehsal edən ölkə olması, bunun isə COP prinsiplərinə zidd olduğu ilə bağlı xarici mediada müşahidə edilən tənqidlərə əsaslı cavab idi. Azərbaycanın neft-qaz ölkəsi olaraq böyük tarixi var. Bu gün Azərbaycanın hədəflədiyi yaşıl artım proqramları və icra olunmuş layihələr göstərir ki, ölkə və cəmiyyət olaraq biz bu baxımdan kifayət qədər təcrübəyə sahibik. Bu da təkcə Azərbaycan üçün yox, region ölkələri üçün də örnək ola bilər. Azərbaycanda qəbul olunan proqramları, həm də 2030-cu ilədək hədəflədiyimiz 30 faizədək alternativ enerji mənbələrinin yaradılması, geniş artım strategiyasının qəbul olunmasını digər ölkələrlə bölüşəcəyik. Bu baxımdan COP29 bizim üçün fürsətdir. Azərbaycan neft-qaz hssilatından tam imtina edə bilməz. Ancaq ekoloji tarazlığın qorunması ilə bağlı məsələdə kənara da çəkilmir. Prezident demək istəyib ki, dünyada bizdən də qat-qat artıq neft və qaz istehsal edən ölkələr var. Onlar da prosesə töhfə verməlidir. Birgə səylərlə daha ciddi nəticələrə sahib ola bilərik. Əminəm ki, ölkə başçısının bu təklifi reallaşacaq. Yadınızdadırsa, pandemiya dönəmində vaksinlərin paylaşdırılmasında ədalətsizliyə yol verilirdi. Prezident bu məsələni dünya səviyyəsində qaldırdı və prosesdə dönüş yarandı. Ölkə başçısının “həmrəylik paketi” təklifi də yerində qaldırılan təşəbbüsdür. Bunun həyata keçməsi mühüm bəşəri problemin həllinə töhfə verəcək”.
Məhəmmədəli QƏRİBLİ
