Türkmən qardaşlarımız erməni oyununa gəldilər - Sayat Nova hardan erməni oldu...
Azər Həsrət: “Məhtimqulunun yanı başında Sayat Novaya abidə qoyulması, əlbəttə ki, xoş bir şey deyil”
Türklərə qarşı açıq düşmənçilik edən ermənilər hansısa yollarla qardaş Türkmənistana yaxınlaşmağa meyl edirlər. Onlarla türkmənlərin arasında heç bir tarixi bağ olmadığı halda özlərini türkmən xalqına “dost” kimi göstərməyə çalışırlar.
Təəssüflər olsun ki, gerçəklikləri araşdırmağa o qədər də həvəs göstərməyən türkmənlər asanlıqla erməni toruna düşürlər. Belə olmasaydı, onlar Sayat Novanı (Səyyad Nəva) erməni aşığı” kimi qəbul edib ona Türkmənistanın paytaxtı Aşqabad şəhərində, Məhtimqulu parkında abidə ucaltmazdılar.
Mətbuatda və sosial şəbəkələrdə yaylan məlumatlara, fotogörüntülərə görə, Türkmənistan paytaxtında "erməni aşığı” Sayat Novanın abidəsinin açılışı olub. Məlumatlara görə, açılış mərasimində Ermənistan nümayəndə heyəti, 20 ölkədən qonaqlar iştirak edib.
Halbuki, Sayat Nova-Səyyad Nəva alban-türk aşığı və şairdir, o, öz şeirlərini Azərbaycan dilində yazıb, bu dildə təbliğ edib. Onun ermənilərlə heç bir əlaqəsi olmadığı halda, onu ermənilər öz adlarına çıxırlar. Səyyad Nəvanın xristian dininə tapınması o demək deyil ki, o erməni olub, o öz dinini saxlayan alban-türk olub. Bunu tarixi mənbələr də, tədqiqatçıların üzə çıxardığı faktlar da təsdiqləyir.
Abidədə Səyyad Nəva (Sayat Nova) əlində kamança ilə təsvir olunub. Dediyimiz kimi, nə onun, nə də kamançanın ermənilərə aidiyyəti yoxdur, bunu türkmənlər yaxşı bilməlidir axı.
Tutalım, o erməni aşığıdır (baxmayaraq ki, ermənidən aşıq olmaz), bəs nə üçün Azərbaycanla hələ sülh müqaviləsi imzalamayan, hələ də bizə qarşı torpaq iddiasından əl çəkməyən Ermənistana, ermənilərə qucaq açır, hansı səbəbdən ermənilərin hiyləsinə uyğub o abidəni ucaldır? Türkmən qardaşlarımız niyə ermənilərin toruna düşür? Ermənilərə nə üçün belə xoş münasibət göstərirlər?
Ekspertlər bildirir ki, Türkmənistanla Ermənistan arasında yaxşı münasibətlər var, bir müddət əvvəl İrəvanda böyük türkmən şairi Məhtimqulunun 300 illik yubileyi münasibətilə sərgi də təşkil edilib. O da vurğulanır ki, türkmən və erməni alimləri qarşılıqlı olaraq əməkdaşlıq edir, Türkmənistanda keçirilən elmi konfransalara ermənilər də dəvət edilir, onlara tribuna verilir, bu da onlara öz saxtakarlıqlarını təbliğ etmək üçün imkan yaradır. Bir türkdilli ölkədən ermənilərə belə isti münasibət bəslənməsini duymaq doğrudan da çox ağırdır. Amma nə edək ki, hər dövlətin öz siyasi maraqları var...
Qeyd edək ki, yazar Azər Qismət öz sosial şəbəkə hesabında “Türkmənistanın paytaxtı Aşqabadda, Məhtimqulu parkında Sayat Novanın abidəsi ucaldılıb. Açılış mərasimində Ermənistan nümayəndə heyəti, 20 ölkədən qonaqlar iştirak edib. Türkmənistan müstəqil ölkədir, kimin abidəsini istəsə ucalda bilər. Sadəcə, gərək xəbər saytlarında Sayat Nova şair olmaqla yanaşı, aşıq kimi təqdim edilməyəydi. Türkmən qardaşlar yaxşı bilir ki, aşıq sənəti azərbaycanlılara məxsusdur. Bir də çox istərdik ki, Məhtimqulu parkında Höte, Dante, Şota Rustaveli, Dostoyevskinin abidələri ilə yanaşı, Nizaminin də heykəli ucaldılsın. Sayat Novanın əlində tutduğu isə qopuz, ya sazdan çox kamançaya bənzəyir. Səhv edə bilərəm. Şərqə məxsus çalğı alətinin erməninin əlində əks etdirilməsi, heç də yaxşı görünmür”-deyə yazıb.
“Ora bütün türk dünyasının zəif nöqtəsidir, ermənilər də bundan istifadə edib”
Siyasi şərhçi Azər Həsrət “Bakı-Xəbər”ə şərhində “Çox təəssüflər olsun ki, Türkmənistan ümumi qlobal müstəvidən özünü kənara çəkir. Eyni zamanda da türk dünyası ilə bağlı proseslərdə arzuolunan fəallığı göstərmir. Yəni o ölkənin fəaliyyəti, yanaşması ümumiyyətlə türk inteqrasiyasında elə də böyük rol oynamır. Çox təəssüflər olsun ki, onlar guya neytrallıq adı altında özlərini faktiki olaraq təcrid ediblər. Ermənilərin də orada aktivləşməsi təsadüfi deyil. Çünki ermənilər bir qayda olaraq zəif nöqtələri tapırlar, hardasa olan boşluqları dərhal fərq edirlər və həmin boşluqlardan öz məqsədləri üçün istifadə edirlər. Bu da növbəti istifadə cəhdidir və təəssüflər olsun ki, alınıb. Əlbəttə, Sayat Nova ilə bağlı fərqli fikirlər də var, o, azərbaycanca da yazıb, türk dilində yazıb, bu məsələ də faktdır. Amma bütün bunlarla bərabər Məhtimqulunun yanı başında Sayat Novaya abidə qoyulması, əlbəttə ki, xoş bir şey deyil. Biz özümüz, yəni Azərbaycan da bunda az günahkar deyil (ik). Niyə? Ona görə ki, biz oranın Türkmənistan olduğunu bilirik, zəif nöqtəmizdir. Yəni ora bütün türk dünyasının zəif nöqtəsidir, ermənilər də bundan istifadə edib. Nə etmək lazımdır? Əlbəttə ki, orada nəzarəti daha yüksək səviyyədə həyata keçirmək lazımdır”-deyə bildirdi.
A.Həsrətin sözlərinə görə, elə etmək lazımdır ki, bu cür boşluqları ermənilər doldurmasın. “Həmişə hər yerdə demişəm ki, dünyada müxtəlif istiqamətlərdə boşluqlar olur, ermənilər bizdən qabaq oranı tutmasın deyə biz gedib oranı tutmalıyıq. Əlbəttə, bu proses anidən baş verməyib ki. Bir heykəl tikilirsə, açılışı edilirsə və sair bunlar birdən-birə olmur. Bu uzun prosesdir. Bu prosesin niyə baş tutması sualının cavabını özümüzdə, Azərbaycanda, Türkiyədə axtarmalıyıq. Türkmən qardaşlarımız bizi eşitməzdilərmi? Eşidərdilər. Görünür, bizim oradakı səfirliyimiz “yatır”, işləmir, dünyadan xəbəri yoxdur. Bir zəhmət çəkəydilər, xəbər tutaydılar, qarşısını almaq üçün tədbir görəydilər. Tədbir görüblərsə və onları dinləməyiblərsə, buyursunlar, o haqda açıqlama versinlər. Biz bunları gözləyirik. Bu baxımdan erməniləri qınayırıq. Əlbəttə ki, onlarla bağlı narahatlıq ifadə edirik, ancaq bir az özümüzə baxaq, özümüzü də qınamalıyıq. Çünki biz boş durduqca onlar fürsətdən istifadə edib o cür işlər görürlər. İlk dəfə deyil ki, biz bunu dəfələrlə dünyanın hər yerində görmüşük. İndi də, şəkililər demişkən, yavaş-yavaş gəlib “ağzımızın içində” də bu işi görürlər”-deyə A.Həsrət vurğuladı.
İradə SARIYEVA
